Blog tuah cu cathiamnak

Ca hman tein ttial hi fimcawnnak ah bawmtu ttha tuk a si zia hi ca ttial ka fel lo hnu lawng in ka lung piang. Blog ka tuahka kum 1 hrawng hi ca ttial ka fel tuk. Zarh khat ah post 1 tal cu ka ttial. Thla 3 hrawng ka ttial in ka nundan ah zeidah aa dang ti ahcun thil pakhat khat ka thluak le ka lung ah a luh tikah khua tam deuh ka ruat, thuk deuh vak in ka kherhhlai (analyse), ka reflect ka ti lai cu.

A biana ah kawl movie pakhat ka zoh tikah a hlan bantuk in nihsawh le soi sawh lengin khua a ka ruah ter. Kawl movie cheukhat (a tam deuh) cu a sullam a um bak lo khi mu, nain mah movie pawl a sertu le minta le mintami pawl hi misawhsawh an si lo, talent an ngei mi lawngte an si, zei ruangah dah movie a chia pipi a chuah ti tikah rianttuan tti thiam lo, market sining, tinhmi parihtat (audience) ho te dah an si, timi pawl tiang khi tuak ka a ka hman ter.  A tthatnak cu mi soi ka ngamh ti lo.

London with Flo, Spring 2015 <3 Mah trip dih in hin blog ttial ka thawkmi a si.

Blog ka ttial tlawmpal ah master ka thawk i keimah caah cun master le bachelor hi aa dang tuk. Bachelor ka kai lio ah ca kaa zuam lo tuk caah a si ko rua khah. Sianginn nih ca rel le rel lo kong ah control a tlawm tuk tikah pumpak in sikaan a ngei lomi caah cun bachelor cu holiday khi a si ko. Master ah cun, an zei dik a ti, zarh fatin an kan control, discussion ah kan chimmi zong a hrihhram a um lo ahcun an kan chalh (chalh hei ti ko u sih). Zarhfatin ttial ding a tlawmbik 3 a um pinah, pumpak essay le group essay pawl a um peng. Mah lak i blog va tuah khi hruh hoi hna a lo. Nain khuaruah har a si, blog hi zarh thawk ka ah ka ttial tawn i ninga ni ca ap ding ka ttial tikah ka thluak rian a ttuan dan a rang tuk. Hmanmi holh hmanh aa lo lo nain mu.

Kensington Palace, London

Ca ka rel zong ah, mi biachim ka ngeih tik zong ah, an chim duhmi a muru khi fawi deuh in ka dawi khawh, cun keimah nih ka hmuh dan ti bantuk he rem tein ka thluak nih a chiah (organize) colh hna. Ca ka ttial tik zongah zeitin dah ka ttial duhmi ka hram ka domhh lai i ka duhmi ka langhter tikah zei tindah cohlan tlak dingin ka chim ali ti bantuk khi rang deuh in ka ruat kho. Ka ca ttial zong a rang an i pehtlaihdan zong aa rem deuh thluahmah. Sianginn kai le ca zoh a zaang deuh ngai.

Perth, Australia (2013 Summer)

Kan hnu tthal rian ka ttuan, a dihin London ah kaa tthial i, Norway sianginn he London sianginn he ka kemh i cattial ka daithlang thluahmah. Sianginn ca cu ka ttial peng ko nain blog hman tein ka ttial tawn lio bantuk in ca ka ttial tikah kaa nuam tuk ti lo. Ka khuaruah dan zong a nuar thluahmah. Sianginn ca ttial khi cawnnak, practice nak ah si lo in, thil rit bantuk ah ka ruah. Mah bak ahcun kaa fiang.

Putrajaya,, Malaysia (Winter 2014)

Minung cu thil kan cawn dan aa lo cio lo, keimah kaa ziakmi hi ahopoah nih an i ziak lai ka ti bak lo. Nain test ding ah cun a tlakmi a si. Siangngakchia ca hrim ah cun san a tlai lai ti ka ruahnak cu kan duh zong duh lo zong ah ca ttial kan herh peng ko caah a leng ca ttial lengmang hi caan thlau men sawhsawh cu a si hrim lai lo. Blog tuah hi a tthat chinnak cu mi zapi hmuh ding in tarmi a si caah ralrin deuh a si. Nain perfect tuk i zuam le mi nih an duh lai maw duh lai lo ti i buaipi tuk ahcun bawmtu a si lo pinah hna a hnok lai tiah ka ruah.

Lai blog a tam thuahmah nak kong ah ka hmuhning

Nai hrawng hi laimi nih laica tein tuahmi blog a chuak thluahmah. A ttha tuk tiah aa lawmmi an um len bantuk in blog tuah a laar ruang ah an i cawng dih tiin a nuam lomi zong an um len. Nang zeitin an ruah ti ka hngal lo, ruah awk zong ah na rel kho lo men J Ka ruahnak atu post ah hin langhter ka duh ve.

Kan ngakchiat tein hin diary ttial hi a hopoah forhfial bal kan si ko rua ka ti, an in fial bal lo lo maw? Mah i a ruang pakhat an chim tawnmi cu, minung pakhat nunnak in fimnak tampi i chap khawh a si caah an thih tikah an dairy relnak thawngin tantakmi nih fim tampi kan i chap kho, ti hi a si. Kan nunnak hi kanmah tein kan sermi si loin, Pathian serhmi a si caah, kan chan hi a tawi te kan ti ko nain minung nunnak pawl hi thil mak tuk an si ka ti, a interesting tuk. Atu chan ahhin cun globalization ruang ah le technology a tthancho tuk cang caah thil i hrawmh/share hi a fawi chinchin cang. Mah caah cun minung pawl le an nunnak kong cawn ruah ah an thih tik i an diary rel hngah nak cun an nun lio tein an ttialmi rel, komh hna, an palhnak in fim i cawn cu a ttha deuh tuk lo maw ka ti.

Jesus le Samaria nu @Pinacoteca museum in Vatican city, Rome
Jesus le Samaria nu @Pinacoteca museum in Vatican city, Rome

Blog le dairy cu zeidah aa saaing ti ding khi a um, blog chung i kan ttialmi phun (content) zeidah a si ti nih bia tampi a chim nain a tam deuh cu ka ruahnak ah blog ca pawl hi dairy he an i naih tuk ka ti. Blog hi cu a formal tuk lomi a si caah a ttial tu nih hin lungthiang tein, hman tein, ititer lo tein ttialmi deuh hi chiah a si. Nifa tin tonmi harnak, har lo nak, pawl in a chuakmi hmuhtonmi he tampi aa pehtlaimi ttial a si caah minung nunnak kong le ziaza cawnnak ah a ttha tuk ka ti. Mah caah cun blog post a si caah zei huaha a si lo ti lo ding tampi a um. Mui i dawh le dawh lo ti cu a zohtu mit he aa saing, ti bantuk in hmuh thiam ahcun i lak ding a tam pi ko lai. Kanmah palh hau lo tein mi palhnak in fim kan cawn ahcun a miak tuk cu ti? Vawlei cung i palh ding tamtuk an palh ta hnu lawng i fim kan cawn cun zei huahua aa tuah manh lai lo.

Nunphung (culture) le nun dan (lifestyle) hi blog ah a lang bik ah an i tel ve ka ti. Mah ruang hrimhrim hin blog rel ka huam, videoblog zoh ka huam. Fa no tete a ngei kami nutung pawl nih an tonmi harnak le nuamhnak pawl an share tik zong ah zoh le rel a nuam, siangngakchia nih an nundan an kan share tik zongah, a hrintthan mi nih an nunnak ah zeitin dah Pathian rian a ttuan ti an kan share tik zongah rel le zoh a nuam tthiamtthiam. Ramdang ah a pemmi miphun pakhat, Laimi hei ti ko u sih, ramdang ah kan um tikah nunphung a cawh dih dan zong a langh caah rel le zoh a tthat bantuk in Laitlang bak ah a ummi nih an nundan an kan hmuhter tikah kan hram ah tampi an kan kir ter tthan. Mi nunphung le nundan kan cawnnak i zei bantuk minung kan si zongah kan karah i theihthiamnak le dawtnak a karh ter ka ti.

12665742_10156456939360263_2136178270_n
Nifa tin eimi rawl hmanh ah nunphung aa cawh cang (aw, behrum si 😉 )

Ramdang ah a pem nain Lai nunphung le nundan a hngal rihmi i kan phanhnak ram nunphung le nundan zong a fiangmi 1st generation asi lo ah “ 1.5 th generation´ ´ (Canada Malen nih a hmannak in ka theihmi term a si) pawl ko nih hin Lai ca in blog hi kan tuah ding a si ka ti. 1. 5 generation ti cu, kan ram teah kan chuak ko nain kan ram ah a cheu, mi ramdang ah a cheu a tthangmi khi mu. Kan chuahkehnak ram le kan phanhnak ram nunphung le nundan aa dan tikah ramdang i a chuakmi caah kan chuahkehnak he i pehtlaihnak lam hi a tlawm chin lengmang. Kanmah nih nunphung pahnih caah hlei kan donh lo ahcun a tlau ding tam dawh in kan um. A chuak tawnmi Lai cauk pawl ah ramdang ummi mino rel huammi lungfian mi konglam a ttialmi cauk an tlawm tuk. Laica le holh cawnnak ah a har chinchin lai. Blog hi a man zong a fawi i san zong a tlaimi a si.

Mah caah cun kei cu Lai ca in blog a chuah lengluang mi hi kaa lawm. Miphun le holh caah tiin ruahnak ttha tuk he a rak ttialmi blogger pawl zong, keimah bantuk a mah le amah i kawl ruahah a blog mi zong, hi tha kan pek tuk hna. A sunghnak a um lo. Nan ttialmi zong rel ka huam. Blog a tuahtu thazaang a pemi pawl zong kan uar bak hna. Blog aa tim pahmi zong blog ko uh, minawl aa cawn an ka ti lai, ti ruah ruang i thil ttha tuah duh ko mi tuah lo tluk a miak lomi a um lo.

Biaralkah piin, ka blog address aa thlen mi na hmu maw? Ca ttial hi peh kaa timh ko caah ka thilri a tam hlan ah keimah nih tam deuh control khawh ding mi website ah kaa tthial. WordPress in inn dang a chuak kan ti lai cu. Ka hmantawnmi url min hi thlen lo ka duh nain mi nih an rak i cawk diam cang i tlawmpal te aa dangmi ka lak tthan.

100th Post – Pathian nih an pekmi talents vialte ah zeizat dah na hmuh cang?

2015 May 5 ah hi ka blog hi ka thawkmi a si i, tutan ka post hi a 100nak a si. 2012 le 2013 ah blog voi 2 ka tuah nain a rauh hlan ah ka ngol tthan hna. Ca ttial cu ka huam nain zeiruang sat ah dah blog ka tuah ti ka rak hngalh lo caah a si. Zei ni dah ca ttial a ka thawk ter tthan timi hi post ah hin ttial ka duh.

Hi blog ka thawk tthannak hi Lana Del Ray a chimmi bia ruang ah a si, Will Smith nih a chimmi bia ruang ah a si, Rick Warren nih a chimmi bia ruang ah a si, Salm i David nih a ttialmi bible cacang ruang ah a si, Jesus nih a chimmi ruangah a si. Will Smith cu acting lei he hla lei he a thiam bak ti in cohlanmi a si, Ellen show ah bia an halmi pakhat ah thil thar pakhat cawn tthan a duhnak kong a chim, Pathian nih hin tam tuk an kan pek ti ka ruah i mah cu kawl rih ka duh, ti phun khi a si. Mah bia cu ka lung ah a cam i khua a ka ruah ter taktak.

Minung hi Pathian kutchuak kan si, Pathian nih a sermi ah a ttha lomi a um lo cu ti? Pathian zei tluk in dah ser a thiam le a kutzung aa dawh cu kan hngalh dih ko i, mah tluk a thiammi Pathian nih ralring tein, khuaruahhar taktak in sermi (Salm 139:14-15) kan si. Amah lo in sermi kan si, pek chapmi cu chim lo an kan ser lio hmanh ah hin thiltikhawhnak tamtuk a telh cang. Mi kaa in ka thluak a chia tuk an timi ka theih ahcun ka sia a rem lo taktak. Pathian nih thluak chiami a ser lo, kan thluak nih a lak ci te a um cio caah zeidah ka thiam phun a si ti kan hmuh rih lo bia tu a si lai tiah ka ruah.

12606757_10156433875105263_1335852177_n

Hlasakthiam Lana Del Ray nih a chimmi cu, ka nunnak a dongh tik i Pathian hmai ka dir tikah ka talent hi zeihmanh tang ti hlah sehlaw, na ka pekmi vial te ka hman dih ti khawh ka duh, ti a si. Jesus nih an kan cawnpiak mi reng a si, Matthew 25:14-30 ah mirum pa nih a sal le talents a pek tak hna nak kong kha kan theih pah dih ko. Bawipa Jesus nih talent hman lo hi uar lo ngai dawh a si. Karh ter an kan fial.

Hi pawl nih hin ka talent zeidah a si ti hngalh a ka duh ter ngai. Mah le mah i hngalh hi thil fawi lo a si. Keimah hi zeipaoh tuah a huam i thiam setmi a ngei lo phun khi ka si ve rua: rawl chuan ka ti, guitar ka ti, make-up ka ti, interior ka ti, photography ka ti, video eidit ka ti, ca ttial ka ti, thiam lak in ka tuahmi an um set lo, ka huammi a tam tak hoi. Mah caah cun Pathian ka hal, nain Pathian aw ngeih hi ka thiam lo tak hoi. Rick Warren ttialmi, the Purpose Driven Life, timi ka rel in khan Pathian nih hin ka lu chung i biahalnak ka ngeihmi hi Pastor Rick hmang in tampi a ka chimh cuahmah ti ka lung a van fiang.

Pastor Rick phung chimmi tampi chung ah voikhat cu, Pathian nih a kan serhhnawh chan le hi vawlei ah hin zei mission dah a ka chiah piak, timi kong phun khi ka ngai. Mah ah a chimmi cu Pathian nih zei bantuk thiamnak lei ahdah thluachuah a ka pek khun ti hngalh na duh ahcun zeidah na huam phun a si, zein na tuah ahdah naa lawmh, ti na kawl hmasa lai a ti. A bia ning bak in kaa hmahthah ti lo i ka ngaithiam uh. Tahchunnak ah a chimmi cu, minung nih hin lahkhah le rian sang rian niam hi kan thleidan caah kan huam phun te nakin lahkhah a sang deuhmi maw, minung upat deuhmi rian maw kan ti thim tawn, zei bantuk rian poah khi lahkhah aa khat dihmi siseh law zei rian dah naa thim lai timi in ruah i thawk, a ti.

11313134_10155576638005263_3597711763129146741_o
I love and enjoy writing and I blog because I have a theory that writing might be one of my God-given talents/tasks that He wants me to develop. 🙂

Pathian pekmi talent le mission kawl ruah ahcun ka rak tuah balmi rian pawl kong cu ka tuak tthan, online ah test phunphun le quiz phunphun kaa test hen ta hehe. Ka ngakchiat lio in atu tiang ka tuahmi a tam bik cu cattial hi a si, taang 7 in hin sianginn i ca ttial zuamnak vialte ka vai i tel, cazual, megazine, timi pawl he lawng te rian ka ttuan, eidit phunphai, caholh leh ti phunphai, report ttial ti phunphai hi a tam bik ka tuahmi a si i, kaa hne e, ti a um bal lo. Ka tuah taktak ahcun kaa nuamh ngaimi rian a si. Mah tikah, cattial cawnter le cattial lei ah tthanchoter hi Pathian nih a ka timh piakmi pakhat ah aa tel ve men lai tiah khua ka ruat.

Cattial lei ah talent ka ngei ka ti BAK LO mu, a si maw si lo ti ka test lio lawng a si rih. Ka huam phun a si pin ah ca pakhat ka ttial i ka lim tikah daihnak ka hmu i ka lung di a riam i mah hi Pathian nih a ka pekmi homework a si ko lai ti ka ruah bia a si. Ka caah Pathian tinhpiakmi ka kawlnak pakhat a si i mah cu hi blog ka ttialnak a ruang, a biapi bik a si. Minung pa zeizat nih an rel ti hi kaa buaipi lai lo ka ti nain nan rak rel i thazaang nan ka pek tikah kaa lung aa nuam tuk. Kaa lawm tuk. Keimah ca lawng ah si loin, minung tam deuh caah a si ahcun mah cu thluachuah nganpi a si ka ti.

A chim tawnmi ka pom ngai ve mi cu, zuamnak le teimaknak he aa fonh lomi talent nih cun teinak a chuahpi lo, timi hi a si. Pathian pekmi le tinhpiakmi tuan teah a hngalmi cu lawmh nan um tuk. Phaisa tampi a chuahpi lo zong ah zul chih ko, paw cawmnak le midang tlawmpal cheuh ding le khualthawnnak a tan ahcun a za ko ;).

First Thing to Do in Heaven! Vancung Ka Kai Ni ah Ka Tuah Ding

Khual ka tlawn i vanlawng cung ka um paohah Pathian he kaa naih deuh tawn tiah ka ruah. A ruang a pakhat cu ka mipum hrim hi Pathian inn he aa naih tiah ka ruah bak caah a si. Adang aruang pakhat cu Pathian tel lo in cun ka nunnak hi minung sermi seh thilri cung bakah aa hngat a hauh tikah seh thilri le minung nakin Pathian ka zumh deuh nak hi kaa fiang tuk. Khual kan tlawn lo zong ah, khoika kan um poah ah kan nunnak cu zeitik hmanhah kan uk khawh lomi cu hngalh a si ko e, nain, vanlawng pakhat cung ah vanlai ah ka zuan ah hin minung sinak in ka nunnak cungah control ka ngei lo bik tiah ka ruah ti bia. Thihnak chance a tam bik tiah ka ruah, tiah fiang lawlaw in hei chim ko ning.

Vanlawng cit kongah ttihnak khua tamtuk ka ruat bal tuk lo nain nai hrawng vanlawng rawh le tlak le tlau thawngpang chia a tam tikah, keimah nih tuak setsai kaa timh lo hmanhah kanu le kapa a thli tein an lung dai ziar lo ti ka theih tikah ruah lo awk a ttha lo. Thih ttih ruangah khualtlawn hrial tiangtiang ngai kan si lem lo nain vanlawng minmei karlak in van lei a van kai i a ther pah bak khin khuaruah hram kaa thawk. Vanlawng a tlaumi a rak i citmi hna nih khan an tlak lai teah zei bantuk khua dah an ruah hnga i zei bantuk bia pawl dah an i ruah hnga heiti le an panhnak hmun phak ah zei tuah dah an i timh hnga heiti pawl khi ka tuak.

Minmei pawl a van lonhin vanlawng cu a dai thluahmah, a leng ka zoh ah minmei raangraang pawl cu an khat. An i dawh tuk ka ti. 11165144_10155495564595263_6647507463810058377_o

Nan tuah ve bal cio ma dik, ka ngakchiat lioah minmei tom pawl ngang lakin zoh i minmei pungsan pawl khi thil dang a phunphun ah canter thluahmah ka rak hmang, saram tete, tarpa, ngakchia pa tbk khi mit in suai ka rak uar tuk. Taang 5 ka kai lio ah ka rak tuakmi atu tiang ka nih a chuahmi cu minmei khi cake (kake) bantuk in ei ah a thaw lai tiah ka rak ruahmi a si. A thaw lai ti reru khin cun atu ah ka ruat ti lo nain atu tiang minmei ka uar rih ko, an raang i a tom tete in a um i a chah nawn fawn i an i dawh tuk ka ti.

Vancung ka phak ni bakah Pathian minmei cungah ka vahpi ta tiah ka ti hrimhrim lai tiah kaa tim. Minmei cung tlik lai kaa ngaih bak, kan ngakchiat lio Wu Khung zaawngte nih khan a kan inspire tuk ko rua hi ta, haha.

Khua zaza ka ruah pahin a tanglei a van zoh ah minmei a kiannak hmun in tikulh (islands) tete hna khua tete kan van lonh pah thluahmah hna. IMG_6898

A hme tete in ka hmuhmi khua pawl le inn pawl tete ka zoh ah Pathian nih a kan hmuh dan ah hi bantuk maw kan si lai ti ka ruat. Pathian caah minung kan va hmet lai zia, deh men i a dih ko dingmi minung nih phurh khawh lo tiangin a nganmi lungthin ttha lo he amah hna kan va doh len, kan va tlik tak len, mah bu i a biapi tuk ah a kan chiah dan, pakhat hmanh tlau a kan sian lo dan ka ruah ah Pathian ka upat dan hi a sang chinchin. A hmai bak ka khap lo, Pathin hi, a caan caan ah cun.

Khat lei in ka ruahmi cu Pathian nih keimah huhphenh aa fawih lai ti kaa fiang tuk hoi. Pathian nih kan huhphenh lai a ka ti ko ahcun aa fawih tuk ti ka hngalh ko mi cu zei hen ttih awk a um ti khi fiang deuhin ka lung a van pem. Mah pinah rumter a ka duhah aa fawih lai ning, cawisan a ka duh ah aa fawih lai ning le amah caah zeihmanh a har lo ning khi tam deuh ka lung a van piang. Pathian dawtnak, tthawnnak, fimnak, rumnak, tthatnak hi level tamtuk a um ti cu kan hngalh dih. Dot khat hnu dot khat Pathian nih kanmah le kan sining cio zohin a kan chimh, a kan hmuhsak tiah ka zumh.

Kan Pathian hi cu a mak ko! Hngalh cia dihmi zong a si ko.

Inn ka phanh tthan zaan bak i a relmi bible ca in Pathin nih ka khuaruah cu a rak confirm tiah ka ruah. Zoh hmanh uh:

Jeremiah 18:6,8,10

“Umsertu kut chung i a ummi tlak bantuk khi ka kut chungah nan si… ka tlerhmi miphun nih cu a tthat lonak kha a mer tak ahcun a cung i thil ttha lo ka tuah lai ka timi kha a tthat deuhnak in ka ruah tthan lai … Sihmanhsehlaw, ka mithmai ah thil tthalo kha a tuah i ka bia a ngaih lo ahcun a ca i thil ttha tuah kaa timhmi kha ka ruah tthan a herh fawn ko lai.´´ 11187224_10155495567885263_7248858117720467298_o

A dihlak khan rel tthan te hmanh uh. Mah thil pawl ka hmuh le mah khuaruahnak pawl ka rak ngeih hlanah mah bible hi rel ning law tamtuk i ka tuak hnga lo. Atu cu, Pathian nih a chimmi ahhin, helt enig (ka lung a tling khitkhet) ti bak khi si. Hi bia hi Pathian nih Jeremiah a chimh hlanah hin tlak um sertu sinah a kal ter hmasa ti ka rel hrim ah hin cun Pathian thil tuahning ka uar zia hi a sang chinchin.

Bawipa nih sunparnak co ko seh!

Social Media, Smart Phone, Thau le Der heiti pawl kong ah..

Internet, Youtube, Facebook le Instagram hei ti pawl a chuah hnu, a laar hnu hin ka khuaruahmi a tlawm chinchin. Smart phone pawl an van chuak i ka zual. A tthatnak tampi a um nain, santlaimi nakin tlai lomi ka tuah deuh hen ta. Sianginn kai caan, dawr ah kal caan le i hngilh caan ti dah lo cun ka pc hmai ah ka tthu peng ko. Rawl chuan pah, ei pah, zumput tthutpah, cazoh pah hmanh ah ka pc kaa hunh. Smart phone a van chuak chinchin i a leng ka chuah zong ah internet <> ah ka um peng. Kholh pah zongah ka phone kaa put i hla ka ngai.

Carel hi ka hngakchiat lio tein ka huam tukmi a si i ca ka rel lo hi a um theng lo. Nain, cauk taktak in ka rel lonak a sau tuk cang. PC, ipad, phone in ka rel a tam deuh tikah cauk chung ah luh taktak i a thawtnam ka hngal kho ti lo. Cauk taktak in rel lo kan ti cu ka rel pah in facebook ah ka hei kal ta thlulh, instagram ka hei kal ta thlulh, ttha tein khua ka ruat ti lo. Ka lung le ka ruahnak hi a vai tuk in ka thei.

Zing thawhka in kaa hngilh lai tiang ka phone a si loah pc le ka kut aa tthen bal lo. A caan a van rau i dai tein khuaruah ka thiam tuk ti lo, dai tein ka um poah ah kaa hngilh. Minung he hawikom he ton i bia i ruah a huam tuk tawnmi ka si nain leng chuah nakin ka khan chungah ka pc he tthut i ka huam caan lawngah internet hman i mi chawnh ka huam deuh cang, a si loah netflix he i zit mei ka huam deuh cang.

Univerisity kai kaa thawk in mah ti cun ka um chinchin. Khuadang ah kaa tthial, nu le pa um lo, sianginn le kai peng a hauh lo tikah, sikaan ka ngei lo chinchin. Ka huam lo cun ni 3 chung zong chuak lo in innchung ah kaa benh ko, ei ding ka ngeih paoh ahcun ka zei poi lo hen ta.

Uni Dorm
Uni Dorm

Kan khan tete le a fami tete an si tikah a leng kan chuah lo cun cawl lo bak khi si ko.

Uni kai ka thawk bakin naite tiangah kilo 12 ka kai!! Ka lau tukkkk. Ngandamnak caah zeiti hmanhin a ttha kho lo cu mu.

Youtube video clip pakhat ka zohmi ah minung thluak kong cawnnak sang a ngeimi sibawi pa Dr. Daniel Amen nih a chimmi cu minung hi kan size a tthang deuhdeuh kan thluak a hme deuhdeuh a ti, a phei lei tthan kha chim duhmi mu.

https://www.youtube.com/watch?v=kBBLjnp1-M4

Mah tikah ka nundan, ka lifestyle hi khua a ka ruahter ngai. Ka kilo a kaimi kongah fak tukin khua ka ruat bal lo, a ruang cu “ dawh na duh ahcun der´´ timi tuchan media nih a sawh pengmi hi ka zumh lo ruangah a si. Der cu dawhnak a si lem lo. Ka thau caah Kaa dawh lo ti zong ka ruat lo. Nain thluak hmet cu ka ttih taktak, khuaruahmi ngeih sat lo zong ka huam lo.

Mah caah cun ka nundan/lifestyle tawn ningin um lengmang rih ka ngamh ti lo. Khuaruah deuh le cawlcangh deuh ka hau cang tiah ka ruah. Ca ka ttial ah hin khua ttha tein ka ruah tawn caah cattial ka fel deuh nakhnga blog ttial a voi 3nak kaa timh tthannak a si. A hlan ah voi 2 ka rak i tim cang nain a reltu nih zeitin an ruah lai ti mi ka tuak tuk tawn caah ka huam tthan lo. Keimah ca tu ah a bikin ttial ning law a huammi tu nih rel ve te ko hna seh ka ti lawlaw cang. Ka pum ngandamnak ca tu ahcun nike keden bak mitchinh kamseh kuttum in kaa cawk i a taangmi khi cu hei chim ti duh hlah ning, ka hawi le le ka chung le nih cun an hngalh ko, keimah reru i tliknak keden caah phaisa 1100Kr ka hman khi cu kaa biatak ngai cang tinak a si :D. IMG_6286