New York Diary – Ni 4nak

Nilinak hi zarhpi ni a si i biakinn 4 ah kan i pum. NYC ah minung a ummi vialte chungin percentage tlawmpal te lawng biakinn ah an i pum ti a si nain an biakinn pawl kan phanh taktak i minung an tam ning zoh ah statistic hi a si ngai hnga maw ti ding khin a um. Civui a lo, a nuam tuk.

@Hillsong NYC
@Hillsong NYC

Aa pummi minung pawl an i ttamh dan, an thil hruk dan zoh ah khin cun lai lei nu le pa deuh nih cun piangthar zong ah an ruat hna lai lo, hei ti, sorry, sorry, ka bia a fak tuk deuh. Chim duhmi cu minung a leng lei kan hmuhnak sawhsawh in mah bantuk cu a si ko lai, a si bal lai lo, kan ti tawnmi khi ka chim duhmi a si. Pheh lo tein chim ahcun Laimi hi mah bantuk kan hmang ngai cu mu. Ka nau Thaku hi mission sianginn ah kum khat a kai i Brazil ah fieldwork a va tuah cuh. Dreadlock (sam aa funtom dihmi khi) tuah ka duh a ti i, kanu le kapa nih, “Thaku, mission a kalmi he cun mah bantuk sam cu aa tlak lo,´´an ti i mah cu aa saing lo tuk ning ti ka rak ruahmi khi kaa thei tthan i ka chimmi a si. A leng thil ah kan buai tuk.

Hman thlak a ngah lo an ti hlan ah thlak ta zokmi @Brooklyn Tabernacle Church
Hman thlak a ngah lo an ti hlan ah thlak ta zokmi @Brooklyn Tabernacle Church

A pakhatnak kan i pumhnak hi Brooklyn Tabernacle church ah a si i an choir a ttha tuk tiah a min a thangmi a si. Kan kal, hla kan sa, thla kan cam i phungchim hlanah kan chuak i Hillsong Church ah kan va kal. Phungchim kan um manh i University i ca a chimmi professor pa phung a chim. Iran mi a si i Pathian hi zeizong vialte a ngeitu a si zia le a fa kan si hi zeitluk mirum dah kan si ti kong a chim.

A dihin chuncaw kan ei i Union Square hrawng ah khan kan ke in kan i chawk. Ke in i chawk hi thil tampi hmuh manhnak a si i khualtlawn huam ngai ahcun ke kal tthawn pah a hau ;). Chuncaw kan ei dihin Trinity Grace Church timi ah kan va kal tthan.

Trinity Grace Church
Trinity Grace Church

Annih biakinn hi zing deuh kan kalnak pahnih nak in a phungphai an tlai deuh: amah nih mah a rel caan a si lai, mah hi a chim lai i nan ka zulh lai, ti phun khi a tam ngai. Chawnghlang rel zong a um i Laimi pumh he aa lo ngai. Ngut a fawi tak phun khi. Phungchim hlan ah kan chuak zokzok i Redeemer Prestbyterian Church ah kan va tli zok i phungchim kan tanh fang te bak si.

An senior pastor pa, Timothy Keller, hi a min a thang ngaimi a si i Theology lei a kaimi nih cun an hngalh ngai.

Dr. Timothy Keller
Dr. Timothy Keller

Tim Keller phung a chimmi a tawinak in kan chim tthan ahcun: vawlei cung i rian sang e, rian niam e kan timi hi minung nih khiahmi lawngte a si. Rian poah hi an biapi dih, minung ngandamnak caah a bawmmi sibawi pawl an biapit bantuk in sizung thianhhlimhnak caah ttuanvo a lami hna an rian zong a biapi tuk ve. Ahman tuk ka ti. Mi sang deuh le mi niam deuh tthen hi ram sifak ko ah a tam i ram ttha zong ah a um ve tthiam i uar a um lo tak tiah ka ruahmi a si. Sizung pakhat ah kan zapi doctor si viar u sihlaw aho dah inn a thianh ti lai, lo mei? Aho kan si, zei rian kan ttuan poah ah kan ttuanmi rian i a biapit nak hi kanmah hrim nih kan hngalh a hau i kanmah tein kan nek sual lo a hau. Tim Keller nih a chim bantuk in kan ttuanmi rian cio Pathian rian ka ttuan tiin fel tein upatnak te he kan ttuan ahcun Pathian nih thlua a chuah tuk lai tiah ka zumh ve.

SAMSUNG CAMERA PICTURES

New York Diary – Ni 2nak

Norway cu zaan 10 lawng ah ni a tla i ni a sau tuk cang. A thawh tuanmi caah a sau chin. Tuah manhmi a tam tuk ah a sau chinchin. Mah lawng um ah a sau chinchin chin i ngaihmi um ahcun a sau chinchin chin … Ok, za rih seh, Laiholh zong a si ti lai lo. Chim duhmi cu ni a sau. Nain nikhua a ttha, thli a hran dan zong a za bak te a si. Hmui tein i ttamh, keden kal a nuammi te i denh i zeite dik ei pah (theithiam ma?), hla tthami te ngaih pah bu in i chawh a nuam ngai.

Ka khualtlawn a sau, ka tlun bak in sianginn project a taangmi pakhat tuah ah Kristiansand ka ra tthan i ca ka ttial lo nak zong a sau, khua ttha tein ka ruah lo nak zong a sau. New York kan phanhka nikhat kha cu ca ka ttial, ka fel tuk rua lai tiah ka ruah nain chunnitlak kan vak, minung kan tong hna, biakinn kan leng hna, ka sianginn ca hoi hna tuah pah a hau, hotel internet a chia ngai ti phun khi a si i fel kaa let. I, kan phanhnak in kan van cher tthan lai kan ti ahcun a nihnihnak ttial a si lai.

SAMSUNG CAMERA PICTURES

A sau ngai cang i a rel cu chim lo a ttial hmanh nan ka huam piak hnga maw ti ding khi a si cang nain ka tar tikah rel tthan ka duh lai caah ka ttial ko lai. Vawlei cungah a biapi tiah ka ruahmi pakhat cu thil tampi va hmuh ton (experience) i memory tampi ser, hngalhnak tampi i chap i mah le mah ziaza a ttha deuhmi ah i sersiam chin thluahmah khi a si. Hmuhtonmi le memory ka sermi pawl kan i fim lo, midang kan hrawmh hna lo ahcun a pam ding a tam tuk.

Ka bia a sau tuk cang i New York ah a nihnihnak kan tuahmi a tawi deuhnak in ttial kaa zuam lai. Staten Island timi ah a ummi Salem Baptist church hi kan kal hmasa biknak a si.

12891582_10153328898097127_5976451758877376970_o-2
Photo by Rune R. Thilesen

New York khualipi ah khua (borough) 5 a um cu mu; Manhattan, Brooklyn, The Bronx, Queens le Staten Island cu an si i a hlan kum 100 hrawng ah Norway mi ngatlai tampi an rak pem i a tam deuh cu Staten Island le Brooklyn ah an rak um hna, an ti. Mah lio Norway mipem pawl nih hin an ngeihchiah tampi dih in biakinn pawl hi an rak dirh i an fa le nih an holh le an ca an philh lo nak hnga le Pathian an hngalhnak hnga an rak i zuam sek. Atu Salem biakinn zong cu Norway mipem nih rak dirhmi Norway biakinn a si nain atu ahcun miphun kip an in pumhnak biakinn nganpi a si cang. Kum 50-60 hrawng a si mi Norway mi an pastor pahnih nih an kan ton i Norway holh an thiam ti lo.

SAMSUNG CAMERA PICTURES

Khuachung kan rak kir i khua lai i zoh ding biakinn pawl he inn pawl kan zoh hna, an kan chimh pah. Wall street ah ka i chawk, pawngkam biakinn pawl kan zoh pah, world trade center an kah lio kong le inn sang pipi kong an kan chim pah. Kan tour leader pakhat hi hika ah saupi pastor a rak ttuanmi a si New York kong a hngal ngai. Pastor pa nih a chimmi lakah khua a ka ruahter ngaimi pakhat a um: New York i mi lianngan ti mi pawl nih hawi nak in a sang deuhmi inn ka sak lai timi zia in pumpak min cuan duh le mi tei duh ah inn sang pakhat hnu pakhat an sak dan le bible ca i Babel lungrual kha a tahchunh. Thil lian ngan an tuah i santlaihnak tampi a chuak ko e, nain Pathian zuamcawhnak duhnak tiang a phanmi tinhnak ttih a nun zia kha ka chim duhmi cu a si. Mah lawng si loin mi tei duh tuk le mi cung cuan duh tuk ti phunphai hoi hna tha a bat zia khi ka ti.

SAMSUNG CAMERA PICTURES

Hi inn sang pipi nih hin zei tluk in dah innsatu pawl nunnak, caan le thazaang, a herhnak lengin, a rak lak hnga ti ka ruat ngai. Minung cu kan uar ci le nun hnawh chan aa dang cio i zei bantuk thil/minung ah khin dah ka caan le ka thazaang tambik pek ka sian hnga ti a ka ruah ter ngai ti bia.

Tin pah ah nikhat chung kan tuahmi kong kan ceih tthan
Tin pah ah nikhat chung kan tuahmi kong kan ceih tthan

Za rih seh.

New York Diary – Ni 1nak

April 6-13 tiang hi Norwegian Baptist Union i mino bu a si mi Ung Baptist (Young Baptist) hruainak hi USA ram New York ah Pemnak kong he aa pehtlaimi study tour ah Norway in mino 9 nithum ni zingka tein Oslo in kan i thawh. Oslo in Frankfurt, Germany tiang suimilam 2 hrawng, cun Frankfurt in New York tiang suimilam 8 le cheu hrawng kan zuan hnu ah zaanlei suimilam 4PM ah kan phan hna. Lufthansa in kan zuang i vanlawng hi dot 2 a si i ka voi khatnak vanlawng dot 2 hmuh a si i kaa nuam dom, khuate fa cu kan mawh lo.

Empire State Building
Empire State Building

Manhattan i a ummi Broadway Hotel tiang hi airport in shuttle (mini van) kan hlan i kan zapi caah 130 USD kan dih, a mawngtu nu nih rang takin a thui bak in an kan thui pi i minute 40 hrawng a rauh ah kan hotel kan phan. Kan phanh hnu cun a tawinak in chim ahcun rawl ei i ih colh khi ka si ko. Rawl dawr pawl ah a man leng in tax le service/tips khi an kan lak chih i lau a um ngai. Aa ziak lomi cu an zai len.

SAMSUNG CAMERA PICTURES
Helene´s cup cakes from Magnolia Bakery
SAMSUNG CAMERA PICTURES
Time Square

Tuzing (nili ni) suimilam 10 ah cun kan hotel in thaithawh ei cia in kan chuak cang. Subway kan i cit i Time Square ah kan va kal colh. Zarh khat chung a nguhmi metro ticket (duhzat cit khawh) hi 31 USD a dih. Time Square kan phanh cu kan i nuam tuk i sau ngai kan um. Mah dih cun Rocketfeller centre, St. Patrick Church, Empire State Building ti pawl kan zoh hna. Cun, chuncaw kan ei dih in Central Park, kaa ngaih taktak mi ah kan kal. Tuchun cu ruah a sur pah lengmang, nithawng chinh pah, hngawngerh i khuh pah in kan i chawk.

SAMSUNG CAMERA PICTURES
Central Park

Park pawl hi zeidah dik ka rel, ka huam tuk ci an si. London i Hyde Park le Central Park hi ka kal hlan in kaa ngaih bikmi pahnih an si. Central Park hi kaa ngaih khunnak cu Friends timi tv series kha ka zoh tuk caah a si. A zoh tawnmi nih cun ka chimmi khi nan theih tuk kol ai. Manhattan i an leilighet (flat = tteihkhan) pawl tete zong hi Friends chung i Monica le Joey te inn phunphai an lo tuk i ka lung a leng ngai ;).

SAMSUNG CAMERA PICTURES
Friends i an inn a lo takmi

Eidin dawr a tam tukmi hi a nuam tuk in ka thei. Kannih Norway lei cu eidin dawr a tlawm i, thim ding a tlawm ngai i khua ngan deuh tlawn tik i rawl dawr a phunphun hmuh hmanh khin celh a si ti lo. Thil man cu a fak ngai bak ko. US ka kal tik i ei ding kaa ngaih bikmi hi hot cheetos le corn dog a si, hot cheetos ti mi ka hmu lo nain takis ti mi ka hmuh i an i khat maw dik? A thor, a thak, a al taktak , zing tho bak in ka ei i ka lung zong a fim viar. Corn dog cu kaa ruah ning a si lem lo.

 

IMG_5480

Tuzaan lei cu 4PM ah hotel kan phan tthan. Caan aa khat lo (Jet lag) ruang ah sau kan it kho lo i kan mitkuh a vuai theng lo pinah ruah a sur pah i vah a har pah. Tu zaanlei cu program a um ti lo i KFC ah arsa kaa cawk i lengchuah lo in ei kaa tim. Sianginn ca ap ding ka ngei i hotel lobby ah zaan ihnak bawngbi a hruk a nuam takmi kaa hruk, puan a ngan nawnmi in kaa tuam i ttial kaa tim. Sianginn kan khar rih lo cuh. Tial ding kong ka tuak ah ka thluak ah zeihmanh a um kho rih lo i mah blog post tu hi ka rak ttial :D. Mah dih cun tlawmpal rawl ei in ca tuah hau, mak lo tak.

SAMSUNG CAMERA PICTURES
St. Patrick
St. Patrick
St. Patrick

Hmanthlak tampi post ka duh nain kan hotel internet a nuarh dan hi a mak tuk i hi vial hi si ko kun seh law.