Rome ah ni 3 le cheu – Ni thumnak le Ni linak # 3.5 Days in Rome- Day 3 and 4

Ziah mah cu naa um naa um I Christmas saling ah cun khualtlawn kong cu heh tiah na tanh ti ding khin ka um. Atu zong hi biakinn kan riah hnik i kapa mawttaw cungah ka ttial cuahmah. Ziah mah tluk cun naa zuam ti ding khi ka si, vei mu, ttial kaa timh cangmi a si i ka lung ah aa bang peng i ka van tanh chih ko lai, an ka hnek bak lo nain.

flowershop
A flower shop in Vatican City

Nithumnak cu ka mitkuh vuai bak lo, suimilam 2 le cheu lawng ka it. Nain khan breakfast kan eimi a thawt ngai pinah nikhua a ttha ngai i kaa nuam tthiam ko. Nikhua hi 10-12-14 degree Celsius hrawng hrang a si peng i ka uar ci a si. Kan kalmi a tam bak! A hmasat bik ah Vatican city ah tube/metro in kan kal tthan. Nihnihnak kan kalnak line kha blue line a si I atu hi a senmi line a si. Vatican cu anmah tein state in a dirmi, ram hmete kha an si. Hi ram ah zoh hrimhrim ding pathum cu Vaitcan museums, Sistine Chapel le St. Peter Biakinn a si.

  1. Vatican Museums
Vatican
Entry -16 Euros

Luhman 16 Euros a si, student kum 26 tang caah discount a um. Van tthat ah saupi kan i ttansi (queue) lo, St. Peter ah khan Pope bia a chim ding a si i an kal pah dih rua. Museums tampi a fonhnak museum a si i a luh man kan pekmi a phu tuk ka ti. A chung luh dan cu vanlawng security bantuk khin check a si. A chung cu minung an rak tam bak. A chung zuksuaimi pawl kan zoh dih in a tang dumah kan va tthu, hmanthlak, biaruah dih in mah he a apehmi Sistine Chapel ah kan va lut.

vaticancity

12359965_1058966164134269_2639017713001251458_n
In the garden
  1. Sistine Chapel

sistine chapel

A mak tuk ti leng khin cun ka chim kho lo, Rome hi rothil leiah an rum tuk ka ti. Pope umnak a si. Security an chah taktak. Nai hrawng kha Vatican city kha veilo pawl nih an tlerh hoi hna ti a si chinchap cuh. Nain kanu le an rak kal lio zong ah an security a ttha tuk an ti i tlerh phunphai ruang theng ruang ah a si rua lo.

  1. St. Peter Square le St. Peter´s Basilica

12390935_10156297047125263_343791644101834894_nsaintpetersqu

St. Peter biakinn cu a ngan tuk dan chimnak ding ah adang adjective ka herh. Luh man a um lo, luhnak ah check dih a si i minung kan tam taktak. A kau tuk. Hmanthlak I a langmi tung pakhat hi minung panga kuh a si. Biakinn tang ah Pope pawl an thlan a um.

stpeter
Inside the basilica (no entry fees)
  1. Castle Sant´ Angelo
12359967_424499347754983_480989855466712659_n
About 10 mins walk from St. Peter Square

St. Peter Square he a anaih te I kan va kal lawlaw, a chung kan lut lo, hlei an donhmi in khat lei kam ah kan va kal i mah ka pawng hrawng ah chuncaw kan va ei. Mah bak ah khin cun ka ke a fak taktak cang i mitkuh vuai pah lo he ka zia khi chiat hnik aa tim cang. Pizza pakhat keimah lawng ka van tthuat I ka zia ttha tthan.

Building near stangelo

  1. Piazza Navona

Hika hi Flo rat a a duh tuknak a si i chuncaw kan einak he aa naih ngai. Khua cu a mui cang. Hman kan thlak dih in the Pantheon kawl ah kan kal tthan. Inn karlak lam dawh tete in kal a si I a nuam ngai.

1172_10156297050455263_3566739289684895851_n

  1. The Pantheon

12376034_424498737755044_5339241248727383408_n

Mah te hi a laar taktak I minung an rak tam ngai. Sau kan um lo, Trevi Fountain, zoh ta manh lo ding ka ttih tuk I kan kal colh.

  1. Trevi Fountain

 

trevi8

Mah hi a remh dihnak a sau rih rua lo, kan van ttha. Minung an tam ning hi. Aa dawh taktak. Kal hrim ve ding a si ka ti.

  1. The Spanish Steps

the spanish steps

Zoh ka duh tukmi a si hoi I sau nawn kan kal hnu ah kan phan. A steps pawl cu an khar nain a tang ah minung tampi an tthu. A pawng teah Metro station a um i mah ka cun kan hotel lei ah kan kir.

12369040_10156297039955263_5985278630001104976_n
A painting from one of the museums in the Vatican Museums

Metro in kan ttumnak ding kan phanh lai stop pakhat aa duh ah khin nungak nu te a rak kai. Kan I tet tuk hna cu mu. Mah kha heh tiah a ka chanwh pah i ka bag zal a dah len cuh, a kut ka tlaih, i lungfiang huaha lo in ka um I, ziah na kut hi ka zal chung ah luh a timh, ti phun ka ti lio a lung aa fian ter len lo lio ah ralrin ah ka angki leng zal pur tuah ning ka ti pah lenlio ah khin a kut khat lei ka angki leng zaal hrawng a phan manh cang. Ka tlaih zok nain kan tlanglawng cu a phan i a chuak colh hih. A ranning bak hi. Mah hnu lawng cun ka lung piang.

Mah dih cun kan umnak pawng hrawnghrang dawr pawl kan vak i zaan ttim lai ah kan paw a ttam tuk i Termini pawng i Hong Kong dawr ah kan ei ciammam I an rawl a thawt ning bak cu, kan lau dih.

Nilinak

Nizaan breakfast kan einak a thaw tuk I kan va ei tthan, dih in, airport ah tlanglawng in kan kal tthan. Kan vanlawng a hnu hoi i an airport dawr vialte kan va zoh dih manh. Norwegian vanlawng cu van cung ah an wifi a tthat ning bak hi, kanu le Patlung kha vanlawng cung in ka facetime hna I kaa uah ning bak cu.

1936634_10156297039085263_930065196784109362_n
Best breakfast

Inn tlai nawn van phanh, anthor tihang le sapherh le buh le anttam kio le hmanphek te van ei, thiang te lum tein van ih cu a nuam tuk. Pathian nih a ka dawt tuk ka ti.

 

 

 

Rome ah ni 3 le cheu – Ni hnihnak # 3.5 Days in Rome- Day 2

Rome kan phanh hi nikhat ni a si, a thaizing a nihnihnak cu mitkuh vuai tak, piang tak, nuam tak khin kaa tthang. Nikhua a ttha fawn I ka chungril pawl hi a laam in an laam. 8AM ah kan tho cu mu, khan tikholh, I ttamh dih, rawl einak kawl, kaa thaw takin raw lei dih in tlanglawng station kan phanh tthan khi cu 10:30 hrawng a si cang. Kan hotel man ah breakfast aa tel lo i kaadang ah kawl a hauh caah khin a si. Zingtho bak in Indian rawl bak kan ei i zaanlei tiang kan khim, kan vahnak ding pawl kha minthang an si caah a pawngkam rawldawr pawl hi an man a fak ti thawng kan theih i khim ngai in kan I ei cia kan ti lai cu.

day 2
Fav of day 2 – the Roman Forum and St. Paul´s tomb (see below)

Nihnih hi tlingtein kan um ding a si caah transport caah Roma Pass nihnih ca kan I cawk cia. Tlanglawng, bus, vawleitang tlanglawng (Tube/Metro/T-bane) duhmi paoh cit a ngah pin ah a voikhatnak kan kalnak museum/site hi free in luh khawh a si. Cun, a miak bik nak cu Roma Pass a ngeimi cu museum luhnak caah ttansi (queue) a hau lo, a phu taktak. A man hi 27 Euros kan pek, kiosk ah kan I cawk caah mu.

865_10156297047400263_5285225048690124789_n
27Euros from a kiosk (Free transport +1 free entry to a museum/site with no need to line-up)

An tube hi line hnih (Blue le red) lawng a um I lungfian a fawi tuk, London underground train umkaldan a lung a piangmi caah cun a fawi tuk bak khi a si

  1. Coloseum

Kan zohmi pakhatnak cu Coloseum a si. A hlan chan puai an rak tuah tawnnak, mithahnak, gladiators pawl an vuak ter hna nak pawl kha a si. A hlan ah Rome miphun pawl hi puai phunphai an uar tuk an ti I a si reng lai ka ti, kan puai tuahnak hmunhma pawl hi an kau taktak hna. Coloseum hi a tu ah cun puai tuahnak ah an hmang ti lo.

Colo

December tourist um tuk lo lio mu, nihnih ni rih mu, mah ah khin mi an tam tuk ning hi, Roma Pass um hlah sehlaw sau tuk hngah a hau hnga. Kan tam tuk nak ah khin kawl family pakhat he kan I tong.

col12
Inside the Colosseum

Coloseum a kam te ah Rome khua tthing/hlun a rawkmi kha a um. Coloseum caah ticket na cawk cang ahcun mah na ticket in luh khawh a si.

Khuarop cu min 2 in tthen khawh a si I the Palatine Hill le the Roman Forum ti an si.

  1. Arch of Constantine (Arco di Constantino)

 

Colosseum le Khuarop karlak ah a ummi a si.

  1. The Palatine Hill

Rome khua an rak tlak hmasa biknak tlang a si. Din ti I put a hau lem lo, than khawhnak tete an tuah. Olive kung kan hmuh len.

12347814_1058496487514570_1243047769274482538_n
We´re just discussing food!
  1. The Roman Forum

The Palatine Hill le hi Forum hi Rome lakah zoh ka huam cemmi an si. Kum a thongin a rau cangmi pawl a rawk bu hmanh ah a tangmi an feh dan le rumra an ngeih dan khi khuaruahhar bak a si ka ti. 12:30 PM in 4PM tiang bak kan I chawk.

roman forum

  1. Piazza del Campidoglio

Atu lio cozah headquater a si I a ummnak hi Capitol Hill timi Rome a ummi tlang 7 laki a sang bik ah aa tel vemi a si.

  1. Roma dal Cielo (Terrace of the Chariots)
12391085_1058495197514699_6938772205927150389_n
Brilliant view of the city from the top – Cost 7 Euros with lift

A pawngte ah a ummi Vittoriano Museum Complex a inncung ah a ummi a si. Kaiman kha 7 Euros a si, a leng lei a lang dihmi lift in khin kai asi. A cung I Rome khua chung vial te 360 degree in hmuh khawh dih a si. A mak taktak! Hi museum ah hin café a um I a man a fak taktak lai tiah kan ruah nain hawi nakin a fak bak lo.

Atu hmunhma vialte hi aa peh dih ti awk a si. Café ah kan paw le kan phone datsi kan van rawn dih in vawlei tang tlanglawng cu kan i cit tthan.

  1. Pyramid

Hika chikhat te kan ttum ta, zeidah a lawh reng ti ruah ah mu,

 

8. Basilica of Saint Paul Outside the Walls (Basilica Papale di San Paolo fuori le Mura)

Metro kan I cit than I Paul thlan kan va zoh. Kan luh lai ah an kan check dan hi mitkuh a vuai lomi caah cun ttahchuak pah si lai ka ti. Paul an phumnak te ah upatpeknak/thlacamnak te zong an ser.

 

paulthlan
Tomb of St. Paul

Suimilam 6PM bak ah an I pum I tlawmpal kan tthu ta ve.

Zaanlei 7PM hrawng ah kan hotel lei kan phan i nizan hi thideng kan kawlmi Korea restaurant cu lam ki teah, vawlei tang teah kan va hmuh. Norway ah ka theih tawk ah Korea dawr a um lo i ei rengreng kan duh. Kan paw zong a ttam tak i tam ngai kan tthuat. Minung pakhat ah 25Euros cio kan dih I za rem ruam seh kan ti. An rawl cu a thaw bak, Hana ti a si.

Mah dih cun laksawng kan caw, kan I chawk I hotel kan phanh tthan cu 22:30PM a si.

Ni 3nak kong caan ka ngeih tikah ka rak ttial te lai. Vatican city kan kal, cun zaanlei ah tlanglawng ah pakhat nu te nih a ka fir hnik (ka thil).

Ka palhmi a tam tuk cun ka ngaithiam uh, ka pc aa uah tuk, khuaruahhar si.

E! Merry Christmas! Norway cu 24 khi Christmas ni a si, Laimi cu ni 2 peh :D.

Rome ah ni 3 le cheu – Ni khatnak # 3.5 Days in Rome- Day 1

Nai kha Rome ah ka hawi le pahnih he kan kal cu mu. Blog post pakhat ah ka ttial dih lai ti kaa tim ko nain a sau lai caah le hmanthlak tam deuh tar khawh ka duh caah nikhat tete in kaa tial lai mu. Bia ruah zong a nuam pah tiah, Christmas lai a si fawn, coffee silole tea van i lak hna u sih!

12376740_10156297040900263_5703207415479082518_n
Let´s go to Roma!

Zingka thawh ka uar lo tuk nain Europe chung khual tlawn ah hin cun zingka deuh aa thawhmi vanlawng hi kaa thim deuh tawn: a man a fawi deuh pinah zingka deuh phanh ahcun tam deuh vah khawh a si i hotel man liammi a phu deuh ka ti. Tutan zong hi kan vanlawng 8:50 AM in a kal ding a si i kei cu kaa hngilh kho hoi ti lo. 5AM in kan tho i 6 AM ah kapa nih Flo he Lillestrøm tiang an kan thlah i tlanglawng in kan lan, Oslo Airport kan phanh cu 7:20 hrawng si rua ka ti. Minung pathum caah check-in bag 1 kan cawk, hnahnokmi ttamhnak tipawl poah kan rawn dih i a zaang deuhmi tete le airport security caah hnahnok lo mi tete deuh kan i ken.

airportg
All ready!

Nikhua a chia i kan vanlawng suimilam pakhat bak a hnu. Tlawmpal Norway kan lonh ahcun nikhua bak a ttha colh i ka mitkuh a vuai lo bu bak khin ka ha lawng a lang cang. Oslo in Rome hi suimilam 3 chung cit a si i eidin pawl a zuar in an zuar. Norway phaisa le Denmark phaisa an lak nain Euro an la lo i ka khuaruah a har ngai. Kan phaisa ngeihmi chun a tam deuh cu Euro ah kan thlen cang i Euro van pek khi kan i ngaih ngai cu mu. Aw, kan kalnak airline cu Norwegian a si.

Norwegian a kalnak khua ka tlawn ahcun anmah in zuan ka duh bik ko. Ka uar tuk hna nak cu vanlawng cung ah first class le economy tbk. an tthen lo caah a si. Mah te khi ka uar nak cu a si.

Rome i Fiumicino airport kan phanh cun 1PM hrawng a si, tlanglawng kan i cit i khuachung Termini tiang suimilam cheu hrawng kan i cit.

onthewaytoRome
On the way to Rome
ontw
This view reminds me so much of Yangon in Burma

Termini cun anmah central station khi a si i mah ka zawn cun khoika kal poah a fawi, kan hotel zong Termini pawng teah a um, cun a pawng ah hin rawl dawr phunphun a tling.

Mah hi termini cu a si.

Rawl man zong khika hrawng ah aa deng bik. Nan kal tik cu mah ka hrawng khan tlung te uh mu. Tlanglawng man hi machine ah mah tein i cawk ahcun 14Euros a si nain kiosk phun ah kan cawk i 16 Euros kan pek, kan rak thei lo cu mu. Minung pathum hrawng si ahcun taxi zong a ok pah ko rua nain, ttha tein bia i ruah cia ah a ttha.

airporttransport
Airport to/from city -train ticket 14 Euros from the machine

 

2 PM hrawngah ah khuachung kan phan, chuncaw kan ei dih cu 3PM hrawng a si i hotel ah kan kal. Europe cu khuasik ahcun khuamuih a tuanh pinah kan tha zong a ba pah i a dang ah kal rih loin kan umnak pawngkam i a min thangmi pawl kan ke in kan vah zoh.

12390957_10156287972945263_4011112523649111406_n
Rome at night @Right in front of Termini (The Central Station)

Mah lakah zoh hrimhrim ding ka timi pathum a um.

1.The Basillica of Santa Maria Maggiore

majore
A must see!

 

Hi biakinn hi Rome i Catholic biakinn ah a ngan bik (siloah a ngan bik pakhat aa tel ve) a si 4th-5th Century hrawng ah rak dirhmi a si. Jesus a nu Mary upatnak ah an sakmi a si.

2. The Bassilica of St. Mary of the Angels and the Martyrs

Anmah holh in cun Santa Maria degli Angeli e dei Martiri tiah an auh i Mary le vanmi le Khrihfa sinak ruangah thahmi matyrs pawl upatnak caah an tuahmi a si. A chung luh bak ding a si ka ti. Ka lung ah a tang tukmi cu a lu an tanmi John a lu an piahmi a si.

12369137_10156287974420263_4380541895604619742_n
Head of John the Baptist inside the church

Hi biakinn hi Piazza della Repubbica timi ah a ummi a si.

3. Piazza della Repubblica

rep

Hi zong hi minthang a si. Rome i an lampi (main road) aa thawknak zong a si.

12357175_10156287975375263_2950732806666844054_o

A dang zong kan zoh chih len nain kan phone battery a dih pah nawn dih i aa kawl kho ti lo. Zaanlei cu pasta kan ei i 10PM hrawng ah kan ttin.

Ni hnihnak hi kaa nuamh bik ni a si i adang tein ka rak ttial lai mu.

12373447_1058498157514403_5155141179029231989_n-2
Sneak peak of Day 2

Ciao!