KAN I BOCHAN MI TETE HI.. (Mi uh-ttanh, Deuh, Kawlram Tilianh le Ramdang NGOs Pawl Kongah Ruahnak Tawite)

Mi uh-ttanh hman le mi i bochan ngai hi mi tampi nih kan uar cio lai lo tiah ka ruah ko, lungfim bu tein cun mu, cun a si khawh ahcun. Uh-ttanhmi le bochan mi nih an kan deuh tikah, asiloah, an kan hrial tikah lung a fah ning le ning a zah ning khi a tuar balmi nih cun nan hngalh ko lai. An van kan uah hnawh hrim ah khin cun kan sining nakin san a tlai deuh lo chinchin mi le a hme chinchin mi le a biapi lo chinchin mi ah khin an kan ruah ter viar cu ti?

Pumpak minung pawl nih an kan deuh tikah a fah bantuk in kan i bochan ngaimi bu (organization) pakhat khat nih an kan deuh tik zong ah hin a fah dan a ding deuh hlei lo in ka thei.

A photo to break your reading
A photo to break your reading

Nai kan miphun le kan ram nih kan tonmi ngeihchiatnak kongah, ramdang a ummi ka si caah tampi hmanh ka tuarpi kho hna lo nain, Pathian nih hin fim a ka chimhmi a tam hringhran ve.

Pathian zaangfahnak in pumpak minung i bochan tuk le uhttanh phun hi ka hmang lo, ka rak hmang bal maw ti zong ka hngalh ti lo caah ka rak hmang tuk lo i a si lai. Nain, nai kan tonmi kong ah kanmah lawng i bochan in thil tuah khawh lo mi a tam tuk caah khoika a ummi paoh nih zeiti lei tal in dah bawmhnak kan pek khawh lai, kan kawl khawh lai, ti khuakhan cio a si cu mu. Kan pawngkam ummi bochanmi, uhttanhmi bu pawl cu banh cio cu a si.

11120049_10155576619180263_1434815549428620506_o

Cozah a si lomi, bochan ngaimi le uh-ttanh ngaimi, a kan dirpi tuk lai tiah ruahmi NGO a hme he, a ngan he kan i pehtlaihnak ah hin a lengin hmuh khawh theng lomi a cangmi thil tete a um len. Nuamh lo lei in ka khuaruah a ka har ter mi tete an um len. Atu ka ttialmi zat hmanh nih hin mi lung a nuamh ter lo ngai cang lai i, khi bantuk tonmi tete le an organization min pawl cu a dikthlir in ka ttial lai lo. Kawlram caah ka dir aa ti mi bu pawl le emergency relief caah ka ttuan aa ti ko bu in bawmhhal tik ah hrial rumro aa tim mi zong an um. Mah cu kan tuah piak hna lai tiah mipi sin thawngthanh ttung i a chungah zei huaha tuah ttung lo mi zong an um len hoi.

Mi bawmh bakah ka dir aa timi organization cheukhat pawl hi an make-up van hnawh ah a mui a chiami an tam tuk. Ka dua, zei cu hen nan dir hnawh chan cu a si, van ti ding khi an um len. A zei si zongah ka zainak cu mah khan va dih sehlaw, na rel ahcun tlawmpal cu na lung cu kan nuamh ter lo ngai lai caah ka palh ngai ko. Kan i ton tik tu ah coffee kan dangh te hna lai mu.

I´m slipping of the edge, I´m hanging by a thread...

Pathian hlei hlei cun aho hmanh, zei bu hmanh, i bochan len ding a si lo zia Pathian nih hmuhtonnak in a ka fianh chinchin i mah zong cu keimah caah cun thil ttha ngai a si ko. Minung an si ah, bu an si ah, an kong an chimning tein zumh ka hmang ngai fawn i mah zong khua a ka tuak ter tthan tu a si te ko lai tiah ka ruah.

Cu pawl kha cu um ko hna sehlaw, kan hngalh dih bang, an kan zuanhnawh colhmi cozah he, bu he an um len. Ka uar tuk hna i anmah kong post dang tein ka rak ttial te lai.