Songs that bring back memories – No. 2

Mirror (Justin Timberlake)

Nai ah khan Kungkung nih mah bantuk hi ttial rih a ka ti i ka lung a chuak tak i ka rak ttial. Cazoh liomi ngol i mah bantuk kong ruah hi a nuam tuk ka ti cuh. Zei bantuk celebrity hmanh hi tam tuk in uar ka hmang bak lo, ka lung a fim hnu in ti bia mu. Taang 9 ka kai lio cun Westlife kan rak uar tuk hna i voi khat cu an thi, ti bak khi a thang i ka hawi le he kan rak ttap pah. Hakha ngai te khi ka ti, an thi, ti phun le, an tli ti phun bia a um kho peng. Ngaih a um ngai. Chim ka duhmi cu ka lungfim hnu kum 19 hna ka tlin hnu in ka bizu ah a hmanthlak ka tar ngam bak mi cu Justin Timberlake a si, bizu kutka a chung lei ah, atu ahcun ka ningzak tuk cang. Aho hmanh chim hna hlah u law tiah.

I, mirror cu 20/20 Experience timi album chung in a si i a chuah hi 2013, March 15 hrawng a si. Mah hi Uni kum 2nak, semester 4 ka kai lio a si i Sydney, Australia ah exchange ka tuah lio a si. Mah semester hi kaa nuamh bik pakhat a si ve. Australia cu March thla hrawng in an thawk i January le February khi cu korea zatlan he mithli he kaa ciah. Ca tuah ding phunphai um lo a nuamh ve ning hi ka ti, ka ngai bak. February 20 ah Sydney ah keimah te lawng ka va zuang. Tlawmpal cu mirror cu a chuak ko hen cu.

248448_10151191794138728_1213099616_n
Sydney Opera House

Na hawi le ah khin hla pakhat nih a suai cang ahcun aa nolh pengmi, huat a tlai ngai mi khi an um ahcun, mah bantuk cu ka si. Ka ngaih tuk nak ah hin ka hawi le nih keimah he ttuai in hmahthahmi hla ah aa cang thai. Hla dang zong cu ka ngai ko e, nain ka hla meilah a si. Amah orginal lawng hmanh si lo in an cover mi kip khi ka ngaih dih. A lyrics khi ka thiam sual lai ti ka phang (hla ka thiam ngai hnu cun ka ngai huam tuk ti lo) i a ret in kaa ret.

Sydney ka um lio kaa nuamh ning khi khuaruahhar bak a si, nikhua zong a ttha peng, anmah lei khuasik a si i keimah caah cun a za bak a si. Annih lei cu rawl dawr a tam tuk fawn khi mu. Holiday bak a lo peng. Ei ka tthawn rih ning hi loh bak khi si i ka hawi le zong keimah bantuk lawng te an si. A sawng bantuk ah khin ah um tti, ei tti a si i kan i kom tuk hna. Ihnak khaan lawng khi mah tein ngeihmi a si i a dang poah cun kan i hrawm. Zaan ttim zong ah burger ka haw tuk ti phun a si ahcun a rak haw vemi an um peng. Nihchuak tuk a si. Drama zong a tam tak, hawi an tam tuk i bia phuntling kan thei i Korea zatlan peh bak khi a si ko. Norway lei cu mikong ceih kan huam lo i drama um lo.

 

Dawt Ttha te inn bbq lio
Dawt Ttha te inn bbq lio (Melbourne)

Ka rak kal hlan ah khan cun Australia ka phanh ah cun ka work-out (exercise) lai i ka thau vial te ka thlau dih lai ti bak khi ka si. Kan sawng ah khin gym a hme te, free in i celh khawhmi a um cuh. Kan phanh ka, ka lung a thawh tak lio ah minute 4 bak te ka til i calorie 17 ka khangh i kaa ngol thai. 3 kilos a hlei he ka rak kir, mah hmanh cu ka vah tuk caah a si i a sawng ah i benh ning law cu mah nak tam deuh he ka kir hnga.

Thawhtthan (Easter) cu Melbourne ah ka va tlawng i ka hawi le 3 kaa phorh hna cuh. Kan chungkhat pawl nih an kan dawt tuk i ka hawi le cu Laipa kan va lai ti lawng te an si dih i mah kong cu voi tam ngai ka chim cang i ka ngaithiam ko uh. Sydney ka va um in hin Lai community a sunlawinak tam tuk in ka lung a va fiang i a si.

New Zealand ah kanu te le ka va tlawng hna i kaa nuamh ning le ka nih a tam ning hi. Nelson ah khan a si i an khua hi Hakha a lo tuk i ka uar tuk, Hakha a thiang phun kan ti ko lai. An khua hrawnghrang kha Lord of the ring an i thlaknak cu a si i ka nau le pawl an i uang tak, an ring an sernak kha anmah khua ah a um cuh. Zingka i dap tete a um dan le tlang tete a um dan khi Hakha a lo ka timi cu a si i, Ed Sheeran hla, I see fire, kha ka ngaih fatin Nelson ka ruat i ka khuasik saisem a chuak.

1052913_10152979510050263_1512353809_o
at Centre of New Zealand (New Zealand hi aa cheu cu mu, hika Nelson hi NZ i a lai bak te a si

Wellington ah suimilam tlawmpal te ka um nain an khua a ummi ka hawi le nih an khua tlang an ka kai pi manh i kaa nuam tuk. Museum pakhat zong kan zoh manh i mah ka ahcun Norway mi chungkhar phakhat he kan vai i tong chap. Wellington in Perth ah kanu te le sin ka va tang pah. Kawl dawr a ummi khi a nuam tuk ka ti. Perth in ka tlun lai hrawng cu mawttaw radio ah Naughty boy le Sam Smith hla, La la la, kha a ra peng i atu tiang mah hla ka theih ahcun Hannah lawng te ka mitthlam a cuang. Ka rak tlun bak in Sungku te puai a si i, we can´t stop bak kha a laar tuk hoi i mah hla ka ngaih ahcun Thatha kaa thei tuk hoi i hi post caah hin cun za pah rih seh.

2013 March in July lio hrawng ah kan hmuhtonmi ka hawi le chungkhat le vialte kan ngai tuk hna e <3 .

Ka tlun lai ah ka tta a thin hung @Perth <3
Ka tlun lai ah ka tta a thin hung @Perth <3

Songs that bring back memories- No. 1

Everything (Michael Buble)

A hlan deuh kong kaa hmahthahmi (memories) pawl khi hla he ka pehtlaih ter ngai hna. A biana ah zihmui pakhat kan hnimh tikah mah zihmui a rak hmang tawnmi kan hngalhmi minung kan i theihthan mi bantuk khi a si.

Hla hlun pawl ka ngeih tikah mah hla a rak laar (popular) tuk lio caan pawl kaa thei tthan tawn. Keimah bantuk nan tampi lai cu a fiang. A caan ah fak piin ka ngai tthan, a caan ah ka nih chuak, a caan ah ka ningzak, a caan ah kaa lunghmuih, a phunphun khi a si ko.

Mit dinhnak (Aurskog, Spring 2015)

Tutan cu Michale Buble hla “Everything´´ kong ka ttial lai mu.

You´re a falling star

You´re the get away car… timi hla kha.

Mah hla nih a ka hngalhter tthan tukmi cu 2007 Tthal (Summer) a si. Norway hi 2006 Khuasik ah kan phan i Oslo pawngkam a ummi Laimi ti dah lo cu minung kan hmuhmi an rak tlawm tuk rih. 2007 Tthal ah ka u Lily (a ngaingai ahcun kani a si) va a ngei lai, cun Hriphi tefa tonnak a um lai, cun Norway Laimi mino civui a um lai, ti a rak si kan chungkhar in kan rak i ngaih tuk ning bak hi.

Egersund ka u le puai cu Norway ah a hmasa lei puai a si caah minung kan tam taktak. God´s Shadow band a rak um lio a si i kan rak i uan tuk hna lio chan khi a si cu mu. Hawi hlun he zong kan i tong i hawi thar tampi zong kan rak i hmuh lio Tthal a rak si. Kaa nuamh dan khi kaa thei ngai rih. Egersund in khan “ Everything´´ cu a laar thluahmah cang. 2007, April ah a chuahmi a si.

Egersund puai dih in khan Kvinnesdal ah Hriphi tefa tonnak cu um kaw, Kvinnesdal kan phanh ahcun kan zapi te in, so …la…la…la ..la ..la, lawngte bak khi kan si cang. Mah lio ah ka u Hrepi (kapa Hrepi tiah Borte pa nih na auh lai a ka ti lengmang ko nain,) le ka u Manu (atu ahcun Grimstad Cung Chin Nu, aleh!) he kan rak i ttuai tuk lio khi a si. Kum 18 ka si lio, kaa nungak ter tuk lio khi si i, keimah nak ngakchia deuh he cun kaa kom duh tuk ve lo cu mu.

Ca a tam pah i ttamhnak ah
Ca a tam pah i dinhnak ah

Kvinnesdal tonnak a dih bakin Grimstad ah mino civui ah kan va lan. Ka u Chinchin (Mrs. Aa Paw) te inn ah kan tlung. Mino kan tling ti awk a si, Mah lio kha kaa nuam taktak, atu Grimstad le ahlan Grimstad khi aa dangmi a lo, mah lio kha a rak nuam deuh hei ti ning law.

Bawlung chuih a um ti kaa thei, concert a um i Flo nih hla a phuahmi a rak sak ti kaa thei, cun, kaa kholh lioah tilum a dih ti kaa thei, cun ka u Hrepi nih lam ah saveh te a rak tleih i Norway tar nu te nih a rak thlah ter ti kaa thei. Mah kum ah Norway ah mino bu aa dirh i mah mino bu cu nihin tiang NCCYF in a dir kho.

Airport kalnak lam

Michale Buble i Everything nih hin tthal nikhua a ka theih ter, thli thiang te a ka theih ter, ram hring a ka theih ter, van thiang a ka theih ter. Mah hla ka ngaih ah hin cun thiang le hmui tein suk i nitlang ah ttha tein pho i rem tein tteihmi puankhuh kaa lawh ter.