Phaisa khon a thiammi siangngakchia (Saving money while studying)

Siangngakchia na si buin zeitin dah khualtlawnnak phaisa na ngeih ti hi an ka hal pah lengmang. Khual tlawn cu tenh a hau i phaisa tampi a ngei lomi (siangngakchia) nih cun a hman dan thiam a hau ka ti. A hlan deuh ah hin ka nu le kapa inn ah ka um, rawl man le inn man ka pe lo, stipend ka ngah lengah sianginn ah part-time in ca ka chim i lahkhah zong ka ngah nain phaisa a hleimi ka ngei bal lo. Keimah tein ka um hnu, zei poah keimah tein ka cawk a hauh hnu, rian zong ka ngeih lo hnu tu in hin lung fim kaa thawk, caan saupi a rau ve mu, i ka phaisa hman dan khi ttha deuh in ka zoh cang. Kan lifestyle nih hin bia tampi a chim, tlawmpal te kan nun dan kan thlen hmanh ah hin thil ngan deuh tampi aa tuah kho ti hi ka hmuhmi bak a si. Mah kong cu share ka timhmi a si.

11357176_10155576637835263_6982697702917093851_o

1. Cheu hra cheu khat pek

A biapi tuk ti leng cu ka chim kho lo, Pathian nih nan ngeihmi cheu hra ah cheu khat hi keimah ta a si, a ti ahcun zum ko, cheu 2 hi a si a ti zong ah zum ko. Zeitik hmanh ah an hleng bal lai lo. Kei hi cheu hra cheu khat kong ah Pathian nih style tak in, fak nawn tein a ka cawnpiak cang i ka lung a fim cikcek. Cu hnu cun phaisa ka hmuhmi chun te Pathian nih thluachuah a pekmi ka hmuh thluahmah.

2. Hman taktak ding thil te lawng caw

High school ka kai lio hi thil ka caw tuk, thil man an tthumh ai pat ti in tam tuk cawk i thlau viar ka hmang. Hman satsai lo ding tam tuk cawk hi a pam tak tak tak ka ti. Nungak caah fashion cu a biapi tuk ko, nain thil man fak le thil a paw mi (trendy mi)tampi ngeihnak/ihruknak in kan confidence a rat a si ahcun mah cu ngeihchia tuk a si cang. Confidence cu chunglei in a ra ding a si i, a leng i kan i hrukmi cu a kan bawmtu lawng a si ding a si. Thil tampi ngeih nakin, ngeihmi dawh tein , i tlak ding tein i hruk hi a biapi deuh cu, ti ko? 1000Kr man kha 200Kr in an tthumh zong ah voi khat lawng hna naa hruk ding a si ahcun cawk lo a miak deuh ka ti.

IMG_6059

3. Ttamhnak ttha tein kilkawi

Nungak nih cun ttamhnak a man a fah dan hi kan hngalh cio ko. Kan i cawkmi a dihlak in kan hman nak in kan khuai ruang ah maw, kan thlau ruang ah maw a tlaumi an tam deuh. Cun thil pakhat kan hmanmi a dih hlan ah, a man an tthumh ruangah maw a thar a chuah ruangah maw, cawk chih kan hmang. Mascara hna fung 2 van ngeih, hman satsai ttung lo i car ter dih ti bantuk khi a pam tuk. Puai kal tik i hawi le nih na ttamhnak an i hlan tik zong ah ttha tein zuldawi law fim tthan. Ka ttamhnak ttha tein ka kilkawi hnu hin kum khat ah voi 2 hrawng lawng ttamhnak ka caw cang. A ttha tiah an cawngia (advertise) mi poah test duh hlah, a hlan na test i zei hlei a si lomi deuh khi an si ko lai. Na hnabei a sei tuk belte ah cun dawr ah test ding hal hmasa hna. Phaisa a tlo ning hi chim awk a ttha lo.

Ttamhnak lawng si lo in adang thil kan ngeihmi, electronic thilri siseh, thil puan siseh, felfai deuh tein kan zohkhenhnak khawh ahcun a herh lo ah phaisa hloh a hau ti lai lo.

4. Eidin cawkmi thut ter/hlonh hlah

Mah te lawng a ummi si ahcun ei chom te lawng cawk hi a ttha. Tam nawn cawk i ei manh hlanh ah thut viar hna hi a um kho ngai cu mu. Ttha tein tuak cia tein cawk ko nain ruah lo pi in hawi le chuahni ti bantuk a ummi a leng ah na ei pah ruang ah na eidin rawh an timh ahcun, chuan cia in freezer chung ah khumh khawh a si ko. Banhla hna, thei hna thut an timh ah cun par law freezer ah chia hna law a hnu ah smoothie, juice tbk. ah ser khawh an si ko. Na buh hna ni 3 chung ah a dih rih lo ahcun hlonh nak in pakhat khat he thaw tein kio law ei ko (kei zong ka thi lo i thih cu nan thi theng lai lo :D).Phaisa zong a tlo, pawngkam ca zong ah a ttha, Pathian thluachuah upat zong a si.

11046229_10155586507785263_3962447802624646846_n
Mah hi cu exam khaan ah kaa putmi a si lo, a dih in ei dingah Flo he kan i putmi.

5. Paw khim hnu lawngah innleng chuak

Keimah bantuk na si ahcun na paw ttam tikah na duhmi poah a man tuak loin na ei cang ko lai. Mah cu kaa theih tuk i khim tein ka ei ta hnu lawngah innleng ka chuak. Norway ah din ti cawk hi i fahsak ding si, vawlei cung ah a thiang bik ti a ngeimi kan si i mah cu i tthathnem pi ding a si. Ti i ken lengmang zong nih hin a herh lo ningin phaisa hlolh a kham tuk. An ti lengmang bang, kan pawttam rua kan timi caan tampi cu kan ti a hal bia tu khi a rak si.

6. Coffee dawr tthut i sum

Coffee a duh bakmi na si ahcun coffee sernak i cawk ko. Coffee dawr ah hrai khat 30Kr kan pek, inn ah kanmah tein tuah ding ah coffee dip bawm khat kan cawk ah 30Kr hrawng kan dih i hrai tam tuk kan din khawh. Inn ah ca na zoh khawh lo ahcun khuachung library a si lo ah sianginn ah va zoh ko.

11334175_10155654294960263_8969410204768138222_o

 7. Cauk tthing caw

Siangngakchia paoh nih cun cauk a man a fah dan kan hngalh dih. A thar theng te ti hlah, nikum ah an hman ciami naa hmuh ahcun caw colh ko, a man a cheu in an zuar i a hlawk tuk (cauk a kau setsai lomi ta naa hmuh chinchin ah cun a thar bak khi si ko). Nain a hlun na cawk hlan ah na saya te hal hmasa lengmang hna, a si loah a rel ciami hal hna: cauk hlun na cawkmi kha 2010 i an rak chuahmi a si i 2013 ah a thar a chuah tthan i aa lo lomi a tam tuk ah cun a cheu saya te nih an duh lo. PC in ca na rel khawh ko a si ahcun sianginn library ah e-book free in an ngei tawn. Check hmasa.

8. A leng na chuah tikah

A leng chuah lo ahcun hawi kan ngei lo kan ti, a hman ko. Nain a leng na chuah tikah lungfim tein na um ahcun tampi dih a hau lo. A leng chuah ti cu, hawi le chuahni kal, khuachung len khi ti duhnak a si. Hawi ngeihnak ah a leng chuah a ttha ko, nain hawi ngeih duh ah zeitik hmanh ah zu din lo ding. Hawi ngeih ruah ah na man (value) tthumh lo ding. Na duh lo ahcun No ti ko, a ri mi na hawi le tu kha ttha tein zohkhenh hna. An simh ahcun a ding lo mi hawi he i kom, an tampi ko. A dingmi na si ahcun siangngakchia na si i phaisa tampi na ngeih lomi kha philh lo ding, cun na cawk cuahmah mi hi Rimi/Rema ah cun a man a fawi te timi le na din cuahmah mi hi tlawmpal ah zumput ah a kal ding lawngte an si ti i chim pah lengmang. Zu cu nuamhnak ah din ti a si nain, zu na din lo tikah naa nuamh thiamtthiam ko cun din a hau lo cu ti?

Cawnpiak phunphai tein aa la mi ka lawh cun sorry, kaa tinhmi si bak lo mu. Phaisa tampi i khon hna sehlaw khual tampi tlawng hna seh ti ka duh bia :D.

 

 

Palang Dur Dawh tete Hlonh Ti Hlah – Glass jars

Nai hrawng hi palang dur i khon phun in kaa la, cun zeizong vialte palang dur ah rawn phun in kaa la. Palang dur in a rami eidin pawl kan cawk i a dih in kan hlolh top ah khin ka siang lo tuk, a ser dan a har ngai ding a lo fawn cu mu.

11415521_10155654294905263_435980242430912090_o

Dur sawhsawh lawng si lo in an hmur kam tete ah pangpar hna, va phunphai hna an suai hrimhrim ah khin cun van hlonh i khuai ko ding cu an pam tuk ka ti. An i dawh tuk fawn. Tthal caah an i tlak tuk fawn.

Detox Water
Detox Water

Atu cu ka cawkmi eidin pawl dur in an rat ahcun zei bantuk an si poah ah hlonh lo kaa thawk. Thiang tein ka ttawl hna i ka fim hna. Zeitluk in dah a ka suai ti ahcun kanu le rian ttuannak i an chuncaw einak in a chuakmi dur pawl hmanh khi ka khawmh hna i ka ttawl hna. Kapa nih heh tiah a ka ttawlpi, kapa nih a ttawl ahcun an tleu dih.

Clean Clean Clean
Clean Clean Clean

Thiang tein ka hnawh hna lai i inntang ah kaa khon hna lai ka ti. Tam tuk na ngeih tikah zeidah naa tuah nak lai, nan ka ti ahcun, va ka ngeih tikah inn ttamhnak ah ka hman te lai tiah leh kaa tim hehe.

Mah lawng si loin mi laksawng peknak zongah a ttha, rawl tthing chiahnak zong ah a ttha, eidin car pawl chiahnak zong ah a ttha, cite chiahnak zong ah a ttha. A ttha dih.

Coffee dinnak hmanh ah a ttha. No, a ka kangh lo!
Coffee dinnak hmanh ah a ttha. No, a ka kangh lo!

Plastic cu vawlei pi caah a ttha lo ti kan hngalh, thil cawk tuk, hman tuk zong a ttha lo ti kan hngalh, cun thil hman tthan (recycle) hi a ttha ti kan hngalh fawn ko i palang dur hman tthan tal hi cu tuah ve ding kan si ko ka ti. An i dawh tuk fawn cu mu.

11270356_10155654296635263_2920738270315953183_o

Zei bantuk thil second-hand paoh hman khi ka rak i nautat, i atu ka ruah tthan ah kan ningzak. Pathian laksawng vawlei pi le kan pawngkam dawt a si zia ka lung a rak fiang lo hen ta. Ka ngakchiat deuh lio ahcun, a lung a rak fim tuk lomi mi tampi caah, a herh zong herh lo zong ah phaisa a hmang kho deuhmi paoh khi zohsang an rak si.

Innleng ttamhnak zongah a ttha
Innleng ttamhnak zongah a ttha

Atu ahcun ka ruahnak aa thleng ngai. Norway ah second-hand thil pawl zuarnak (Flea market) khi an tuah tawn. A dawr zongin a um, nikhat te lawng an zuar caan zong a um. Mah bantuk ah a caw bikmi cu anmah mi, rian a ngei cangmi, phaisa a ngeimi upa, nutung, patung pawl khi an si ko.

Ok, chunttha uh! Dur a tangmi ka va ttawl rih ta hna lai :D.

I´m slipping of the edge, I´m hanging by a thread...
I´m slipping off the edge, I´m hanging by a thread…