Holh rap (trap) ah kan i awk maw?

Nai hrawng kan miphun ni tuah le a min an auhnak kong i kan buai ning zoh ahcun a leng mi nih maw kan thei lai kawh ti phan ding khin a um. Buai ding cu um phung a si ko. Nain buai tthing pengmi buai hi cu a mak lo tuk. Kan holh aa dan cio cu kan hngalhnak a sau tuk cang, zei holh khi dik zapi hman ding ah ti ah khiah ding ah le pakhat le pakhat aa uhnah dih ding lawng te kan si fawn. Mah le holh cio in siseh, holh phunphun cawh in siseh, kan miphun ni kan hmanmi cu zeidah a palh ti khi ka lung a fian khawh lomi a si.

Chin, Lai, Zomi kan hman dan aa lawh lo ruang ah kan i dang tiah keimah pumpak cun ka ruat hlei lo. Miphun khat kan si tiah ka ruah tthiam ko. Miphun ni kan tuah ah Kawl holh kan hman zong ah, Falam holh kan hman zong ah, Hakha holh kan hman zongah, Mirang le Norway holh kan hman zogn ah, kan cawh viar zongah a poi in ka thei lo. Holh timi cu minung pakhat le pakhat kan i communicate khawhnak hnga, kan chimmi kan i theih piak khawh nak hnga caah sermi a si tiah ka ruah. Buainak a chuah ter tu ah kan hman ahcun holh hman zia thiam lo ah kan tla lai. Tedim si ning law Tedim holh theng te ka ti i Tedim holh peng in kan chawnh i na lung a fian lo nak cha cun kan pahnih kan thiammi Mirang holh hna in kan i chawnh ah bia kan i ruah ah kan i theithiam i kan i daw deuh lai cu, lo mei?

Kanu Mate nu hni <3
Kanu Mate nu hni <3 One of our traditional wear 

Holh cu miphun pakhat nunphung caah a biapi tukmi a si caah miphun ni hna kan tuah tikah kanmah holh te kan hman khawh ahcun a ttha tuk hen ta. Nain kan hngalh cio bang, kannih miphun cu holh phun a tam pi a hmangmi kan si caah holh pakhat te kan i hrawm khawh lo tikah i soi le i thlak len nak in cun i theithiam ah a ttha deuh tuk lo maw ka ti.

A bikin, ramdang, kan miphun kan tlawmnak ah cun kan miphun ni kan hman tti tikah holh a dangdang lawngte a hmangmi kan i cawh dih. Abiana ah Oslo kiangkap a ummi kan miphun pawl ah hin Kawl holh a hmangmi, Mizo holh a holhmi, Hakha holh, Tedim, Matu holh le Falam holh a holhmi kan tling dih. Ka hngalh lomi holh hmanh a um len rih lai. Mino kan hawi le chung hmanh ah Mizo holh bak in a rak tthang i Kawl holh le Hakha holh a thei bak lomi zong kan um. Mizo lei holh a hngal kho bak lomi zong kan um hoi. Kawlram bak ah a tthangmi Kawl holh lawng a thiammi zong an um. Mah tikah holh phun kip kan cawh a hau. Kan miphun ni kan hman ttinak thawng in kan i naihnak, kan i komhnak le kan i dawtnak a fek deuh i mah cu a biapi mi a si ko tiah ka ruah.

12746069_10156528336205263_1190012763_n
More…

Miphun a hme te kan si nain holh tampi kan ngeih caah hi kan holh pawl aa dannak thawng in i hmuhthiam lonak, rem lonak, tthennak a chuah lonak hnga kan i theihthiam deuh i kan i dawt deuh a herh ko.

Holh le Ca (Essay)

Tuak hmanh u law, kannih miphun hi kanmah holh tein zeitik hmanhah ca kan cawng bal lo. Kawlram kan um ah kawl ca le mirang ca, ramdang kan um ah ramdang ca. Mah hi a tthatnak a tampi bantuk in a harnak zong tampi a um ka ti. A ttha ka ti nak cu holh a tlawmbik pa 2 kan thiam caah kaa uang, a har ka ti nak cu, fimthiamnak pakhat khat cawnnak ah midang holh kan hman a hauh caah hawi nakin kan i zuam deuh a hau peng.

Norway ka phanh kum 2 hmanh a tlin hlan ah sianginn ah cawn lo a ngah lo caah Spanish ka cawng, mah Spanish cawnnak caah Norway holh hman a hau. Norway holh hmanh ka thiam set rih lo i a har taktak. Mirang ca cawn chap a van si i lung zong a fim lo. Inn ah Lai holh hman rih mu, cun innpa he kawlholh in i chawnh rih khi. Buai bak ko. Ramdang a ummi Lai siangngakchia cu mah bantuk phunphai cu kan si dih cio ko. Kawlram a ummi siangngakchia zong, a tlawm bik Kawl holh le mirang holh cu cawn a va si i Laiholh he cu holh phun 3 peng aa hmang tthiam ko.

cropped-img_6871.jpg

Ttha ve ko, hei ti ko u sih. A tthatnak a tam tuk khe cuh. Voi khat vanlawng cung ah an chiahmi Times megazine pakhat ah holh phun khat leng a hmangmi ngakchia an thluak hman dan a tthat deuh ning kong an ttial i zeitik a chuakmi a si ka hngalh ti lo caah fiang in ka chim kho ti lo. Chim duhmi cu thluak caah a ttha, ti kha a va si ko i a tthatnak cu mah vial si rih seh.

Ca rel ding a tam i an ttial dan a har tuk tikah mi holh in ca a cawngmi kannih pawl caah cun ngeihlah tuk ding khin a um. Norway ah cun University zong hi Norway holh in kai a si cu mu. Bachelor tiang hrim cu Mirang ca in a ummi a tlawm tuk. Relter mi cauk zong hi a tam deuh major caah cun Norwegian in a si ko. Norway mifim pawl hi caleh le cattial an tthawng tuk i mi an tlawm tuk nain anmah holh in rel ding cauk a tam ngai. Anmah holh in cacawn a si tikah anmah caah cun sianghleirun kai cu ttih a nung lo tuk cu. Holh a thiam lomi mi tampi caah cun holh te hi a kan khamtu bik a si ko. A ruang cu sianghleirun i hman cangmi academic holh khi cu a har ngai bak ko. Har nawn te khin an ttial ve cuh.

Mah hmanthlak cu aa tlak ngai sual
Mah hmanthlak cu aa tlak ngai sual * Kristiansand ta a si. 

Kaa ngaih tukmi cu kan miphun mifim le mi zawnruat pawl nih cauk tthattha tampi an leh te, an ttial te tik i, kanmah holh tein vawlei cung minthang cauk pawl tampi rel ding a um ve tik caan khi a si. A zeiti maw tal cio in i zuam cio hna u sih, tha i pe hna u sih, thla cam hna u sihlaw Pathian nih kan i zuamnak a kan karh piak lai rang piin a si kho ko lai tiah ka ruah. A miak i ruahchan lo te bak in cauk chuahnak ah mi phaisa a chuah piak mi Laimi zeimawzat an um cang. Ka uar tuk hna, ka upat tuk fawn hna. Mah bantuk Laimi cu thluachuah tampi hmu hna seh!

Carel hi cu fimnak kawlnak caah bawmtu ttha tuk a si caah carel huam hi a sunghnak a um bak lo tiah ka ruah. Kan zuam theng lo zong ah a caan caan ah i hnek pah in, i suai ter pah ko hna u sih mu. A thawtnam theih hlan te lawng khi a har i si ko. theih hnu cun ei chin lengmang, rel chin lengmang kan duh ko lai ti bia.

#14 Hello Joe!

Carel huam sii um sehlaw kaa chun bak lai a ti mi ka ton pah lengmang hna. Ka ruahnak ah cun, theih kan duhmi, hngalh kan duhmi kong cio tete le kan huam phun cio tete in rel kan i thawk ahcun kan carel huamnak a hram aa bunh lai tiah ka ruah ko. Nungak tlangval kong lawng na rel i zeihmanh a tthathnem lo, asiloah, fashion kong ca rel cu ca rel zong a si lo e, taaing wutthuh (taluk kongfu khi) rel cu zei naa tuah nak lai, ti phun khi kei cu ka uar lo ngai. Adang a chuahpi mi thil ttha cu chim ti loin, carel a kan huam ter thaimi le carel a kan fawih ter deuhmi te lawng hmanh nih khin carel huam si chunh hau lo ah a kan tuah cang cu mu.

Cauk a phunphun pawl khi meh hei si hna sehlaw mu; kan duhmi meh cu voi tam deuh pi zong kan ei ko lai. Nain kan vuai caan a um ve lai i kan vuai caan ah adang meh kan ei ko lai cu mu. Cun kan duh tik ah kan duhmi meh te kan rak ei tthan kho ko cu ti? Ka chim duhnak nan lung a fian lo i meh kong ka chim ruangah nan rawl tu kan ttam ter hna ahcun ka ngaithiam uh.

Mangttha uh!