Mark tthat duh ah maw thiam taktak duh ah? Mastery vs. Performance Goals

Ka ngakchiat deuh lio i ka uar tak ci cu, ca zong i zuam tuk lem lo nain a thiam ngai mi lawh i mark tthat ngai tawn khi a si. Phiat-laan uar zia khi mu. I zuam loin mark ttha ngah khawh a si maw, tiah a timi nan um men lai. A si bak. Ca rel thiam, carel ran i i hmahthah i harh tuk lem lo ahcun vaivuanh vaivuanh i camipuai lai ah cazoh zok in mark ttha hmuh khawh a si ko tiah ka ruah. Nain, mah bantuk in thiammi cu sau a nguh lo. Camipuai a dih ve, ka philh ve timi pawl khi an si, keimah ton ning ah, phundang phun ka hngalh lomi hoi hna a um ko lai.

Kapi´s flowers @Egersund
Kapi´s flowers @Egersund

Thil tuah tiah cun tinhmi um ruang ah tuah cu a va si tikah, siangngakchia nih fimthiamnak lei subject/course pakhat kan cawn tikah zeidah kan i tinh ti i fian hi a miak ngai ka ti mi a si. Kawlram i ca ka cawn lio ahcun, ka hngalh tawkah, mark tthat le camipuai i pakhatnak/pahnihnak tbk. ngah khi i tinh in kan cawng deuh tuk tiah ka ruah. Performance-oriented goals timi khi a si deuh rua tiah. Mi hmai ah cuan duh, piah duh, fak nawn tein chim ahcun, anih cu BA a awng, PhD a tuah timi langhcuan hleiah i cacawn khi mu.

One of my fav corners of UiA (University of Agder)
One of my fav corners of UiA (University of Agder)

Fimthiamnak athar pakhat thiam duh thengtheng ruangah timi tinhank, Mastery-oriented goals, in cacawn ko hi a zaang i a nuam bik tiah keimah pumpak in ka ruah. Marh zeizat ka ngah a biapi lo, mah kong ka thiam poah ahcun a za, ti i mark ngah ding kong ah zei stress hmanh um lo i cacawn ahcun tampi ka thiam deuh in ka thei.

Ziah cacawnmi thiam dih ahcun mark cu a tthat lonak ding a um maw, ti a fawi te. A si tuk hen ta, nain a taktak ah cawnmi a tam tuk tikah, i thim a hauh caan a tam pi, tiah ka ruah. Camipuai caah cazoh le thiamnak caah cazoh hi aa lawh lo caan a tam pi. A ruat thiam mi nan tam pi lai.

Kapi le kapu innpi @ Egersund
Kapi le kapu innpi @ Egersund

Kannih, kawlram (Asia ram tampi zong) in a rami cu kan nu le kan pa nih kan mark tam seh ti an kan duh piaknak aa hngal khun. Ramdang nu le pa zong an si ko, nain kanmah tluk in an langhter lem rua lo. Nu le pa lawng hlah, rian tthami nih cun mark ttha a ngahmi hi u-sa pek deuh zong cu a si. Mah tikah mark ttha ngah duhnak pressure/stress nih thiamnak a donh caan a tam pi. Khat lei in cun, mark kong zeihmanh tuak loin, thiamnak dingah ca kan cawn tikah, kan thiam deuh i kan mark zong a thangcho tawn hoi.

Ka chim duh bikmi cu zei bantuk tinhmi in dah ca kan cawn ti hi ruah ter duh bia. A pahnih cu kan i tinh ko e, nain i thim a hauh caan a phanh tikah zeidah kan i thim lai ti bia khi mu.

Frogner Park @Oslo
Frogner Park @Oslo

Zei bantuk tinhnak in kan cawn zognah a fiangmi pakhat, kum saupi siangnakcha ka si hnu in ka hngalhmi, cu ca zuam hi a rak ttha bik ko ti hi a si. Thluak tthat timi hi sianghleirun tibantuk ah le thiam taktak duh i cacawnnak ahcun i rinh awk a ttha tuk rua lo. A rel deuhmi poah, aa zuam deuhmi poah thiam a si ko. I zuam ngai i kum donghah mark tthat theng lo zongah textbooks van zoh tthan i a chung a um mi kong pawl van theih ngai, a konglam he aa pehtlaimi pawl van ceihhmai khawh ngai rih khi A hmuhnak in a nuam deuh ka ti.