Pa le Ni, Borte Pa, Nu E Pa le Dawtnak Timi Pawl Kongah…

Nizan cu Father´s day he aa pehtlaimi post tete social network pawl ah kan hmuh cio len. Scandinavia ah hin November ah tuah a si caah kannih ram cu kan lawmh rih lo. Hawi le nih an pa le kong an ttial cio mi ka rel ah ka lung a hmuimi zong um, ka ngaih a chiami zong a um.

Kapa nih a ka tuahpiakmi kong vialte lakah kaa lunghmuih bikmi pakhat ttial ka lung a chuak ngai. Ka chuah zaan ah kapa nih zaan khuadei it loin, mei inn aa van i a rak ka hngah, tiah ka nu nih a ka chimh bal. Bawhkeuh kan ti cu, a fa tuk i an nenh lai i a thi sual lai ti ka phang, ati, an ti. A voi khatnak fa a ngeih a si caah a lungthin a cawl tuk bia zong a si lai.

This guy pulled an all-nighter with a couple of kerosene lamps the night I was born because he was so excited <3 This one is an awesome dad!
This guy pulled an all-nighter with a couple of kerosene lamps the night I was born because he was so excited <3 This one is an awesome dad! 

Mah kong hi ka lung ah fak tukin a lut. Kapa nih hin vanlawng rak ka cawkpiak hmanh sehlaw mah tluk in aa uang lai lo. Vanlawng cu phaisa in cawk khawh a si i, Kapa nih a ka tuah piakmi hi tuah duh lem lo ahcun cawk duh len zong ah a ngah lomi thil a si. Mah ruang cun a cungah zeitluk ka thin a hun zongah hi kong ka ruah ah ka lung a dam tthan tawn.

Thil hme tete a zoh ngaimi minung, detail-oriented, ka si ngai rua ka ti. A biana ah, ka ngakchiat lio phe kah ka thiam ka te ah a ka suai tuk i ka ngol duh ti lo cuh. Ahohmanh nih an ka kah pi huam ti lo, mei zong a ra lo, i kapu nih phazawngdaing bak a van i a ka kah pi ko hih. Kapu cu mah tluk khin a mak! Mah phun tete khi ka philh khawh lo i kaa uan tuk mi phun cu an si. Dawt ahcun lawm tein tuah piak a si i dawt lo cang ko ahcun zeizat pek zong ah a ngah ti lomi phun khi.

IMG_6059

Kum 15 ka chuah ni ah aho nih zei a ka cawk piak, phaisa zeizat a ka tthenh ti ka hngal ti lo, nain kapu nih, cun ka pa nih, an ka tuah piakmi phun tete khi ka philh lo ci an si.

Ka upa deuhdeuh i cawk khawhmi nakin cawk khawh lomi thil pawl an sunlawi deuh dan hi ka lung a fiang chin lengmang. Thil man timi cu a cawtu nih caan caankhat ah zeizat dah a pek sian timi a si, tiah kan cawn cu mu. Minung pakhat i a caan, dawtnak, upatnak, zumhnak timi cu a lak in ngah tawn a si nain, a dih cang ko ahcun zeizat pek zong in kan cawk lai ti khawh a si lo cu ti?

A photo to break your reading
A photo to break your reading

Kan pawngkam ah dawtnak in thil a kan tuah piak tawnmi tete hmuh lo in kan um sual tawn. An tuah tawn caah an tuah ding ah kan ruah cangmi pawl zong tampi a um, take for granted, timi khi. Kei zong khuadang ah keimah te lawng ka va um hnu lawng hin ka nu nih a rak ka tuah piak tawnmi lungfian hram kaa thawk ve. Atu ah ka fiang dih cang ti nak a si lo, ka zoh cuahmah ve rih ko.

Kan pawngkam nih dawtnak in a kan tuahpiak mi hmuh kan i zuam deuh hna ah a ttha lo maw tiah. Kan nu le nih a kan tuah piakmi zong a si lai, kan pa le, kan pu le, kan u le, kan nau le, kan hawi le, kan tlangval le nungak le, kan nupi le va le, nih a kan tuahpiak mi zong a si lai. A lawmh zia, sunhlawih zia thiam deuh hna u sih law a ttha tuk lai ka ti.

mi padre y madre at christmas some years ago
mi padre y madre at christmas some years ago

A herh ning leng pi in fak len khi ka ti duhnak a si hrim lo, mah bantuk khi cu a nuam lei lo ti cu kan hngalh dih ko. Na ka tuahpiak mi kan hmuh, kan i lawm, man ngei ah kan chiah tuk, ti kan theihter mi hna te khi caan tampi ah cun a za ko.

Mi nih tuahpiak mi i lem ter i ninghngal tuk in kan um sual ahcun an huam ti lo tikah kan cei ko hnga. Na ka tuah piak tawnmi na tuah ti lo taza kan cuai lai ti zong a ngah lo cu mu. Lungfim bu tein a lor mi cu hruhnak hram fek deuh in bunh aa timmi an si ka ti.