Pathian nih Joshua he a kan chimhmi

Sianginn nih ca tuah ding (assignment) an kan pek tikah zulh ding pawl an kan pek chih tawn: a tlawm bik cauk mah cu zat cu na rel lai; naa chirhchan mi ah a tlawm bik 50% hi sianginn nih relter mi cauk a si lai; mah cu na tuah lai, vei kha cu na tuah lai lo; cafang mah zat leng na ttial lai lo, tbk pawl an si tawn. Pathian hi a ka Sertu a si ko i Pathian cu zeihmanh tinhmi ngei lo in a tuah lo mi Pathian a si caah ka nunnak ca zong ah Pathian nih tinhmi a ngei ti a cohlang mi nih Pathian sinin a rami assignment pawl tuah tikah zulhphung zeidah a si hi ruah lo awk a ttha lomi a si.

Tuzing cu Pathian nih Israelmi pawl a pekmi hna ro va co ding i Israel mi hruai ding rian kha Joshua a pek tikah tuah ning a chimh mi ka rel (Joshua 1:1-9). Joshua cu kan si hna lo, nain Pathian tinh piakmi nunnak, Pathian chiahpiakmi rian le thluachuah a  duh mi poah Joshua dirhmun ah kan um dih ko tiah ka zumh.

Central Park@ NYC
Central Park@ NYC

“ Tthawng ngai le ralttha ngai in um ko,´´ timi hi Pathian nih Joshua 1:1-9 chung lawngah voi 3 bak te a chim. Pathian cu a chim ciami a philhmi a si bak lo tikah zeitluk in dah aa biatak ti fian khawh a si ko. Keimah kaa fian dan ah voi khat nak a chimhah hin thazaang pek nakah a chimh i a voi hnihnak ah ruahnak pek bantuk in a chimh i a voi 3 nak ah hin cun nawl pek bak in a chimh. Pathian nih ralchiat le lawdorh tuk i a uar bak rua lo ko hih.

Pathian fialmi rian na ttuan tikah keh lei le orh lei naa mer len lai lo, tiah a ti rih. Tuchan caah hin aa tlak khun ka ti, a ttha he a chia he (distraction) a ummi a tam tuk i lam pial le lam tlau a fawi tuk. Tinhmi zoh peng le focus thlau lo a biapi tuk. Tinhmi hngalh lo ah cun a dih ko. Hi hngalh nak dingah Pathian lo in a si kho lo, an kan ser tu a si i amah nih a hngalh bik cu mu.

Willis Tower @Chicago
Willis Tower @Chicago

Cun, Phungbia kha chunzaan in na ruat lai i na kaa he na tthen ter lai lo a ti. Bible a cawngmi ka si lo tik ahkhan mah Phungbia hi a ho nih a ttialmi rengreng kha dah a ti  duhnak a si hnga ti ka hngal lo i google ttheu cu kan panh tikah Biblehub.com timi bible commentaries pawl a khawmmi website ka va phan. A tawinak in cun Pathian Phungbia, Moses phungbia, Bible he a sullam aa khat ko ti a si. Kaa hin: http://biblehub.com/commentaries/joshua/1-8.htm rel hmanh.

Pathian fialmi rian (assigment) pawl kan tuah tikah Pathian nih tthawng ngai in, ralttha ngai in, lungdong loin, thinphang loin um uh a kan ti. Cu ti um khawhnak ahcun Pathian nih an kan umpi peng i an kan deuh bal lo ti hngalhnak fek ngeih hi a biapi tuk. Mah hngalhnak fek ngeih cu a har ding a si lem lo. A ruang cu, Pathian hrim nih kan um pi peng hna lai, kan deuh hna lai lo, a ti ko i Pathian bia zumh lo cu a miak lo bik a si ko cu mu. Zumh lo ding a um bak lo, zeizong vialte a rawh hmanh ah a rawk lo ding Pathian bia hlei in a fekmi a um lo. Pathian biatak hmuh khawhnak ah Bible hi um hlah sehlaw nun hi a har tuk lai ka ti. Ttha tein ruah cia, plan cia lomi, zulhphung zong um lo mi rian/project ttuan a nuamh lo ning le a vaivuanh ning khi hngalh dih a si ko cu mu.

New York City
New York City

Mah le mah kong hngalh a duh lomi, ka chuah hnawh chan zeidah a si hngalh a duh lomi kan um lo. Mah vialte a hngal dih tu cu a kan Sertu Pathian a si i Pathian he i hngalh bak lawng in mah le mah hngalh hram i thawk a si ko.

 

Chirhchan

Joshua 1:1-9

Biblehub @ http://biblehub.com/commentaries/joshua/1-8.htm

 

 

Jesus facebook ngei sehlaw…

Khrihfa ttha ka si nemmam lo, nain, Jesus he pehtlaih hawikomhnak (relationship) ka ngei tiah ka ruah ko caah vawlei cung ka herhmi vialte lakah a biapi bik ka ngei ko tiah ka ruah. Jesus nih a kan dawt ti cu al awk a ttha lomi (fact) a si, nain ka ni fatin ka nunnak taktak ah a langhter dan zoh ka hmannak hi a sau rih lo.

Pathian he pehtlaihnak a ngeihmi pawl nih, Pathian nih cutin a ka chimh, kha tin a ka chimh, an ti tawn cu mu. Zeitin ah Pathian sinin a rami a si an hngalh hnga ti khi ka tuak ngai tawn. Cun zumh ding le zumh lo ding ah kaa laklawh ngai tawn, ka hrintthan hlan ah cun ka zual, tuchan nitlak lei sianginn pawl nih critical dingin an kan train tuk caah a si ve lai. Mawh lo a si, Pathian he i hawikomhnak cu pumpak cio nih ton ve lo ahcun zumh khawh lo zong ah theihthiam piak khawh a si ko ka ti.

Baneheia@Kristiansand
Baneheia@Kristiansand

Pathian dawtnak ka hngalh hnu hin Pathian hi ka seihwinsa ngai cuh. Theih tawnning in si lo in, uar ngaimi hawi thar kan ngeih ka i a kong hngalh le hlat kan huam tuk phun khi a si. Pumpak tein hngalh ka duh. Jesuh hi facebook ngei sehlaw a stalk peng ko lai, Bible nakin facebook lungfian a fawi deuh caah mu. Jesus he aa naihmi pehtlaihnak ngeih ka duh.

Kan hnu tthal hrawng in khan Pathian sinah bia ka chimmi le a ka lehmi pawl hi a hlan nakin felfai deuh in zoh tti hram kaa thawk. Keimah lawng te hna nih ka chawnh i a mah hna nih teh a ka let maw, one-way relationship a si sual maw, ti phan ruang ah mu. Felfai deuh tein ka zoh ka ti cu, Pathian nih bia ka halmi, thildang ka halmi hi a ka rak leh lengmang. A rak fel tuk ah hin a hlan lio i ka rak halmi ka philh cangmai hmanh khi amah nih a philh lo, a ka pek hnu lawng khin ka rak halmi a si zia kaa fiang. Cutluk mak cu ka ti.

Kipte nu dum ram pangpar @Kvinesdal
Kipte nu dum ram pangpar @Kvinesdal

Pathian hi bia ka chimh, bawmh ka hal ka hal i ka halmi keimah nih ka philh peng. Ka halmi a ka pek ti ka van hngalh colhmi tete zongah, ee a ka pek, Bawipa kaa lawm, ka ti i mah pin in khua ka tuak lo, ka reflect lo ka ti lai maw? Zei ruangah ah ka thlacammi cu a ka leh, ka bia a ka ngaih piak caah a si, ka bia a ka ngaihpiakmi cu a ka komh caah, a ka dawt caah, ka kong a hmete tiang a interest (seihwinsa) caah a si i, ka cohlan tikah zei bantuk thinlung in dah ka cohlan awk a si, hi thawng in hin Pathian ka zumhnak, kaa bochannak a karhter deuh maw, kan i komhnak a fehter chin maw, timi pawl khi ka rak tuak lo hen ta.

Sommerøy Baptist Church - Photo by Bikte
Sommerøy Baptist Church – Photo by Bikte

Zaan ihlai fatin, Bawipa thaizing damtein ka thawhter, tiah (caan tampi cu a phungmen in) thla ka cam. A thaizing damnak he lawmhnak he a ka thawh tikah, a phung men ah ka ruah hoi. Ka phut ruangah maw a ka thawhter, rian fial a ka duh i maw nunnak a ka pek hnga. Zei bia, a duh ahcun langak hmanh a hmang khotu si na lakah, keimah Borte meikau hmanh a thiam lomi cu zei ah dah a ka herh hnga mu. Mah cu chim lo, Pathian dawtnak hngalhter cang ko bu zongah nifatin sual ngaihthiam a hau rih mi ka va si chap. A zei bia um lo, Bawipa vel ruang te ah khin a si ko.

Ni zaan ka quiet time ah khan bible uk thar a rel ding ka si i zeidah ka rel lai ti tuak cia lo buin a si. Kei hi Matthai dih in Mark cauk ka rel lai, Salm nih dih mah cu ti phun in plan ka suai cia lo. Bawipa, chimh na ka duhmi kawl thiamnak, hngalh thiamnak ka pe hram, ti cun ka van hal. Ka Bible cu ka zoh i Daniel kha a kong ttha tein ka rel bal lo i ka rel tuah lai, ti khi ka lungchuak, Daniel a ngan 1 cu ka van rel i, nan hngalh cio bang, a tawi nakin cun rawl thiang ei nak kong (eating clean) bak khi a van si hih.

Thaku a kal cuahmmah nak lung bo te ah khin kan hnu zarhte ni kha kan va zau i khua kan cuan
Thaku a kal cuahmmah nak lung bo te ah khin kan hnu zarhte ni kha kan va zau i khua kan cuan

Nai hrawng hi eidin thianghlim le felfai lei ah ka chanbau tuk lawlaw lio khi a si. Ngandamnak caah a ttha lomi eidin lawngte ka haw, ka ei, i kaa manh lo tuk ti phun in exercise zong ka tuah lo. Ka pum hna hi a rit ngai in ka thei cuh, Zaantlai ei hi kei cu ka huam tuk ci si, thaithawh lo in na ka um ah a poi tuk lo, nain zaanlei hin cun ka thluak ah eidin kong hi a tamtuk cang. Mah kha Pathian nih, a za pah cang, a ka ti ko rua khah. Ka phuhrung pah nain bia a ka leh colh dan ka uar tuk i mah ruang zong ahcun mah post hi ttial ka lung chuahnak a si.

Minute 1 hmanh rau loin ka bia a ka lehmi cu ka pawng teah a um pinah a ka seihwinsa tuk, ti a fiang. Bia a kan ruah ko, tlawmpal te felfai deuh tein ngaih a hau i a si ko. Tu zaanlei Mc-Donald ah voi khat te ka va ei ta lai i kiptuh in cun fel deuhin eidin a hau cang ko rawh (zei holh dik si?).