Ruahpi sur kukkuk law… (2) On a rainy day

Zingka i alarm thawng si lo i ruahpi sur thawng te nih van tthangh khi cu a nuam kho tuk ka ti. Mah i sianginn kai hauh lo, kal ding um lem lo i, duh lo ah thawh a hauh lem lo hrim ah khin cun, Pathian sin ah lawmhnak bia chim philh lo ding bak, nan ti ve maw dik?

Rainy morning <3 Woke up to this, didn´t have to go anywhere, so I stayed in bed thanking God
Rainy morning

Ruahpi (sur) hi Pathian nih a sermi, ka duh bikmi, tampi lakah pakhat aa tel ve. A leng chuah a hauh lo zong ah ka duh, chuah a hauh zong ah ka duh tthiam. Hna a hnok ka ti lem lo. Thaithawh ei dih (khim setsai lo ruang ah chuncaw ei chap dih) in Flo he coffee dawr ah ca zoh ah kan vai thawh. Thiang tein i kholh, hmui tein, lum tein thil a thiangmi tete i hruk i keden a lummi te van i danh i thli thiang lak te ah van chuah cu a nuam tuk ka ti. Lungthin a panhhlau ter ngai.

Photo by Florence Lian
You can stand under my umbrella ella ella ella … Photo by Florence Lian

Kannih lei siangngakchia umnak innkhaan pawl cu a hme tete, man fak tete (Europe style mu) an si i aleng kan chuah pah lo i chunnitlak innchung ah kan i erh ahcun kal zong khi thiam ti lo nak a si hen ta. Nihnih ni cu coffee dawr ah minung an tam tuk lo i a nuam ngai, siangngakchia cazoh nak an reserve tawnmi tthutnak lei ah cun kan tthu i Flo he coffee din pah, ruahpi surmi zoh pah, lam ah aa chawkmi ngiat pah, music ngaih pahin ca kan rel i a nuam tuk ti ka ruat len. Mah lio i vuk tiah ka lung ah a chuakmi cu kawlram (a bik in Hakha) ruahsur le tilianh lio kong a si.

Rain + Coffee + Book is good
Rain + Coffee + Book + Friend = Perfect Tuesday

Nai hrawng Laimi kan hawi le he bia kan i ruah i kan mang manh mi pawl kan i chimh ahhin kan mang cio background hi Laitlang lawngte a si. Tilianh le vawlei cimh kong nih a hlan deuh bantuk in cun ka lung cu a pil in a pil ter ti lo nain ka lung kil ah a um peng rih ko rua. Thawngpang a chiat saling kha cu lam hlat piah ka um ko nain ruah a sur ah ka lungthin a rit. Ka ttahchuak. Hi bantuk ruah thawng nih hin Hakha i a ummi ka pi le, ka nau le, ka nute le, ka ni le ka hawi le, a tthih in a tthih cang sual hna hnga maw ti ka ruat. Ruah a han lo lio i inn pawl a cimh cuahmah lio ah khan an mit a kuh tuk cang buin it ngam loin, an khua a sih tuk buin maw ruah han dingin thla an rak cam hnga ti ka ruah ah ka thin a fak tuk.

Credit to this user <3 You have no idea how encouraging this was when I needed the most
Credit to this account-owner <3 You have no idea how much I needed  this post of yours. Thank you if you ever find this blog-post.

Hi bantuk in laitlang/kawlram nih kan tonmi ruangah ruahpi (sur) a ttih thaimi an um sual ti khi, phan ding tampi lak ah, ka phang chih. Ruahpi nih mang chia a pek hna lai ding ka siang hna lo. A bikin, keimah bantuk ruahpi (sur) a uar mi nih ruahpi an ttih ding, an huat ding ka siang hna lo. Vawlei cung ahhin minung thil ti khawhnak in kan control khawh lomi thil tampi a um i, hi bantuk cung hin lungthin zeitin dah kan chiah lai ti hi ruah phu ngai a si, ti?

Ruahpi Sur Kukkuk Law… Rain, Rain, (Don´t ) Go Away, Come Again Another Day

Ruah a sur ah a hnahnokmi ka hmuh hna ah ka zaang an fak. Kei cu ruah ka uar ngai. Tu zingka kaa tthangh ah ruah a rak sur ka hmuh i ka lungfim a rang ngai. Pawngkam a piangpai, a fresh tuk ka ti.

11212608_10155509331580263_3679237454272354991_o

Ka ngakchiat lio kong kaa hmahthahmi a tuan bik pawl ah aa telmi cu kanu nih ruahsur lakah a ka puak i plastic (moe-ka/ruahkham) a rak ka khuh i kapa he lo ah an rak ka kalpi mi a si. Plastic nih a ka khuh dih i zeidah ka hmuh ti ka thei ti lo. Nain, kanu keng cungah khualum ngai in plastic cung ruah tlak thawng le kanu le kapa an kal pah i bia an i ruah thawng ka rak ngai i kaa nuam tuk ti cu kaa thei. Lo kal ding zong cu a si i kaa nuam tuk, kaa ngaih tuk rua. Kum 4 ka tlin ah ka ka changtu ka naupa a chuah i mah hlan deuhpi ah a si lai tiah ka ruah. Hriphi kan rak um lio a si.

Cun 1992, kum 4 ka si lio, Hakha ah a si. Innleng ah ka tthu i ruah a surmi ka rak zoh kaa thei. Kanu Tar tiah ka auhmi kapa a nu, kapi nih ka naupa a rak awih ah “ Ruahpi sur kukkuk law, va te hawi leng ngei lo, ´´ timi hla in a rak sak rua ka ti, cun adang hla pakhat a sakmi ah sakhi timi aa tel tiah ka ruah, mizo hla si dawh a si. Mah lio cun ka mitthlam in sakhi le va tete le vacang kheinak ttalawn ka rak suai len. Tlawmpal te ka um a rak har (bored) rua ka ti. Zei ruang ahdah 1992 a si lai tiah ka ruah ti ah cun kan vampang ah calendar an rak tar mi ah 1992 ti kha a tunglei in aa rak i ttial i mah cu ka rak rel lengmang. Aho nih dah number rel a ka chimh ti cu ka hngal ti lo.

11119114_10155509340885263_143050135889194620_o

Sianginn ka kai hnu zongah sianginn ttin pah ruahsur lak kal heiti le tilu tan heiti pawl ka rak uar tuk i sik ka tong pah tawn. Tang 10 ka kai lio Chin Super Boarding School ah ka rak um lioah asawng kai le cazoh nih a ka simh tuk i zaw ning tiah ruahsur lakah nithawng chinh loin inn ka rak ttin nain ka zaw lo. 2006, Malay kan um lioah kan ihnak khan a hme tein ruahsurmi ka rak zoh i kaa nuamh tukmi kaa thei. Malay cu ni a lin tuk i ruah a sur ah um a nuam tuk cu mu. Hakha a tthangmi ka si ruangah a si lai, nilinh nakin khuasih ka uar deuh.

A donghnak ruahsur lak ka kal kaa theihmi cu 2012 Bali ah a si. A tlawng balmi nih cun nan hngalh dih ko lai, Indonesia cu a lin tuk ve i ruahsur ahcun a nuam tuk ve cu mu. Ka hawi nu he zanriah ei ah kan kal i lam ah khan ruah a ngan pipi bak a van sur ko e! Bali cu ruah a sur bak cun a tomtom in a ra, warning zong an pe bak lo khi si. Lamkal mi vialte a pawng i ATM set a umnak inn tete ah dor ruahah kan tli dih hna. Ka hawi nu he summer angki phor a pan tete kan i hruk i kan tlik manh hlan minute cheu hrawng hmanhah kan cin pah dih ko. Ruah cu fawi ah a han duh lo, khua le a sik lo ngai i ka hawi nu cu tilu lak ah kan kal lawlaw lai i kan i surh ter lawlaw lai tiah ka sawm. A ttih pah nain kaa duh tuk dan a hmuh i eh a ka ti lawlaw. Kan pahnih cun ruah lakah restaurant tiang kan kal. A nuamh ning bak cu! Restaurant kan phan i coffee hrai khat veve kan din dih hrawng cun kan angki vialte cu a ro manh bak ko.

11159883_10155509372465263_6949926823560027174_o

Ruah vialte lakah spring le tthal (summer) ah a surmi ka uar cem. Cu lak hmanhah spring in summer aa thlen lai nawn nikhua te i a surmi khi ka uar chinchin. Mah bantuk caan i ruah a sur lio teah innchung um lio a si cu a miak tuk, luxury a si, tiah ka ruah. Shampoo hmui tein lu i ttawl, thiang tein i kholh, coffee te din, ihphah le puan a thiangmi te le a hmuimi teah tthut i cauk a ttha takmi te rel, thlalangawngin ruah zoh pah, ruah thawng ngeih pah, thaizing zeihmanh tuah ding ngeih lo, thluachuah ngan tuk a si ka ti. Leng chuah a hauh zong ah a poi tuk lem lo, hmui tein i ttamh, thil thiang tete lum tein i hruk, keden a lummi te i denh, nithawng nganpi i chinh i headphone a rawk lomi (ka headphone a rawh lio a si i mah hi chim bak ka hau ka ti) tein hla tthattha ngeih pah ahcun a nuam tuk tthiam ko ka ti.

Pathian nih a sermi a ttha lomi an um lo, a herh lomi zong an um lo. Uar kan thiam ahcun kanmah miaknak lawngte si ko. Bawipa, ruah na ser caah kaa lawm! Ka uar bakmi a si.