Mah hi cu nan huam bal lai lo Part 6: Research proposal zeitin kan ttial lai?

 

 

Proposal ti cu nawl hal tiah hei let u sih law, research proposal ttial ti cu mah hi kong hi hlathlai ka duh ko tiah na sianginn nawl halnak khi a si kan ti ko lai. Research proposal ttial hi a fawi lo tuk ka ti, zeidah na hlathlai lai i zeitin dah na hlathlai lai i zeitin dah na hmuhmi cu na kherhhlei lai ti bantuk hi hngalh cia dih a hauh leng ah na kawlmi hi zei bantuk theory pawl he dah aa pehtlaih i zeiruang ahdah a biapit timi pawl vialte zong theih dih cang a hau. Research tuah hlan bak i mah vialte tuak cia dih cu a fawi lo. Cahmai 30 hrawng ttial a si rua, master thesis caah mu. Mah kha cu an i dang cio lai.

Na proposal a tthat setsai lo ah le kherh a si fawn i ralrin tein tuah a haumi a si. Felfai tein ttha tein tuah cia ahcun research caah cun a bawm tuk cang fawn. Research proposal pakhat ah zeibantuk pawl dah ttial a hau timi hi sianginn pakhat le pakhat an I lo lo, faculty pakhat le pakhat zong an I lo lo. Nain, a tlangpi in Bryman (2012, p. 92) chimning ah hi pawl hi a tel ding cu an si.

  1. Na research zei kong dah (topic) a si i na research nih zeidah aa tinhmi pawl (objectives) a si?
  2. Na topic le objectives cu ziah an biapit?
  3. Na research questions (RQ) zeidah an si?
  4. Na topic, objectives le RQs pawl kong ah hin a um ciami ca pawl (literature) nih zeidah a chim? (Na kawlmi kong ah zeizat dah hmuh cia a si cang?)
  5. Na hlathlaimi caah na herhmi cu zeitin dah na kawl lai/ zeitin dah data na collect lai?
  6. Na data collection method hi na RQ caah a tlak maw tlak lo? Zeiruang ah?
  7. Hi na research caah hin zeibantuk pawl ah dah phaisa na herh lai i a ho nih dah an bawmh lai? (Phaisa a sawk chih mi caah mu)
  8. Hi na research caah na caan zeitin dah na hman lai (timetable)?
  9. Hi na research na tuah tikah zei bantuk harnak pawl dah ka ton lai tiah na ruah?
  10. Ethical issue (laiholh in ka hngal bak lo) kong he pehtlaiin zei bantuk harnak, laklawhnak pawl dah a chuak kho?
  11. Na data pawl hi zeitin dah na kherhhlai (analyse) ning a si lai?

Kan hmuh cio bang a fawi bak lomi a si ko hih. Nain mah vialte kan tuaktan cang ah hin cun hma kan kal ngai cang tinak a si lai cu.

Chirhchan

Bryman, Alan. (2012). Social research methods. Chapter 4. Oxford: Oxford University Press.

 

 

Mah hi cu nan huam bal lai lo Part 5: Research Question ttha zeitin kan ttial lai?

A nuammi kan phan thluahmah ko hih, research pakhat caah Research Question (s) (RQ, tiah a mindin in kan auh cang lai) zeitluk in dah a biapi ti cu kan hngalh dih ko cu mu. Hlathlai kan duhmi kong i biahalnak kan ngeihmi tete kha chim duhmi a si. Kan kawl duhmi, hlathlai kan i timhmi cu zei theng te dah a si timi fiang tein bia kan khiah cia lo cun tlau a fawi tukmi a si caah RQ ttha ser thiam hi a biapi tuk. A tlangpi in RQ a ngapi pakhat kan ngei lai cu, mah kan RQ pi phitnak ah RQ a hme tete ser a si tawn. Kan sayate nih an chim nak ah cu bantuk RQ a hme tete 3-5 karlak hi thesis caah a za bak a si an ti.

Bryman (2012, p.90) nih RQ(s) ttha mi cu hi ti hin an si lai a ti:

  1. A fiang lai
  2. Hlathlai khawhmi a si lai
  3. A um ciami theory le research pawl he pehtlaihnak a ngei lai
  4. RQ pawl (a hme tete) kha pehtlaihnak an ngei dih lai
  5. Na kawlpi topic kong ah na research nih original a si bakmi hngalhnak a hme te tal a chap ve ko lai, ti a sawh ngaimi a si lai.
  6. A kau tuk lawmmam mi a si lai lo

12571074_10156424912580263_1642962946_n

Social science he aa pehtlaimi research tuah ah hin cun RQ hi fek tuk in khiah cia a hau lem lo ti hi chim tawn a si. A hmanmi a si ko, nain siangngakchia cu kan bachelor thesis, master thesis ttialnak ah thla 6 hi a tam bik kan ngeihmi a si ko cu mu, buaktlak in. Research tuah timi cu va kawl, va hlathlai in a dih lo, hmuhmi data le information pawl hi process rih an hau, kherhhlai (analyse) an hau, mah dih in cun ttial a hau rih. Mah caah cun data collection tuah hlan ahhin RQ a fiangmi te ngeih hi a biapi tuk. Cu lo ahcun research hmunhma (field) phanh tikah tam tuk kawl sual i thleidan thiam ti lo in tlau a fawi tuk.

Ka bachelor thesis caah Malaysia ah ka va kal cuh. Ka kal hlan i kaa timhmi cu Malaysia ah a ummi Chin miphun ralzaam nih nifatin an tonmi harnak pawl kong ka ttial lai ti khi ka si. Ka phan i kan tonmi harnak cu a phunphun in a si, a tam tuk i zarh 1 a van rau i ka lau hnik cang. Mah ruang khan bi deuh in ka zuh a hau ka ti i harnak kan tonmi lakah ngakchia nih fimcawnnak kong he pehtlai in harnak kan tonmi siseh ka ti. Kanmah ralzam bak nih an dirhmi sianginn lawng ka focus lai ka ti ah, Pathian dawtnak in, sianginn tam ngai kan ngei cuh. Ka caan nih a ka zawhmi hi CSO sianginn pa 5 lawng a si.

borte temporary 1028
Research kong kan ceih i Malaysia kaa thei.

Tuan tein khan hi zat te hin rak khiak cia ning law lungfim tein ttha deuh tein ka tuah kho hnga cu mu. Thesis caah biafang 150000 ttial ding a si tik ah bi tuk in ka focus ahcun ttial ding ka ngei cawk lai lo tiah ka rak ruah cuh. A palh ning hi.

Tlawmpal ah thesis a ttial ding na si ahcun kau tuk in tuah i tim hlah law tiah bia cah kan duh, a fiang mi te a bi mi te i thim law na hlathlaimi he na kherhhlaimi (analysis) na tuahmi he a ttha kho deuh lai tiah. Nain, na RQ hi Yes or No lawng a phi a chuak ding hna cu a si cun a si kho ve lai lo hen ta mu. Na cawnmi he aa pehtlai hrimhrim lai ti cu chim ti duh hlah ning, social science a kaimi na si ahcun na RQ ah social scientific angle a ngeih hrimhrim a hau.

Chirhchan

Bryman, Alan. (2012). Social research methods. Chapter 4. Oxford: Oxford University Press.

Mah hi cu nan huam bal lai lo Part 4: Research Quality Tahfung

Research pakhat i a quality tahnak tampi lakah hman bikmi, zoh bikmi pathum in atu kan rel cuahmah mi cauk nih hin a ttial i mah hna cu a tanglei bantuk in an si.

Reliability

Replicability

Validity

An min in kan leh ah hin cun lungfian lo chinchin a fawi caah a biafang tu hi fiang deuhin ttial khawh kaa zuam lai.

RELIABILITY timi cu na research zumh awk a tlak le tlak lo kha a si ko. Research na tuah tikah a phi na chuahmi cu a um lai cu mu, result tiah au u sih. Na research kha kan van nolh tthan tikah (repeat) na hmuhmi result kha kan hmu tthan lai maw hmu tthan lai lo, timi biahalnak kha aa buaipi mi a si. Research na rak tuah lio ah thil pakhat tahnak na hmanmi (measure) hi aa thleng thulhthlah maw (consistency a ngei maw) timi a zoh. Hi kong he pehtlai in chambaunak hrial kan duh ahcun, ka lung fian danah, tahfung kan hmanmi tete kha consistent (thleng len lo) tein kan hman a hau, a biana ah, innchung khar pakhat an si fak maw fak lo timi tahfung ah innchungkhar phaisalut kan hman ahcun kan research vialte ah mah tahfung cu kan hman thai lai ti nak si lai cu.

 

12571369_10156420998485263_1439764403_n

REPLICABILITY timi cu a cung i kan chimmi reliability he aa lo ngai. Research na tuahmi, na tuah dan a dot dot ning tein khan midang pakhat nih tuah tthan hna sehlaw nan hmuhmi aa khat lai maw ti khi a si. Bryman nih a ti nak ah cun social research ah cun cu bantuk tuah tiang tiang cu a um tuk lo a ti. Na hmuhmi ka zum lo, midang nih an tuahmi he aa dang tuk, khoi ka tuah ve hnik lai, ti phun khi a si. Kan check tuah lai ti phun khi mu. Replicability kong ah chambaunak hrial nak ahcun ka ruahnak ah research ka tuah dan a dot dot kha hman tein, dikthlir tein kan ttial ah a ttha lai ka ti.

VALIDITY timi hi a biapi bik ah chiah tawn a si, laiholh in ka thei bak lo, a biana ah, na bus card a valid ti maw ti kan duh ahcun na buss card a nung rih maw kan hei ti ko khih. Fiang deuh in hrilhfiah kaa zuam lai. Na research in biafunnak (conclusion) na tuahmi hi a dingfel maw, integrity a ngei maw, timi kong khi a si. Integrity ti cu Jesus nih a lung a thiangmi cu lunglawmmi na va si dah, a timi kha a si i, na research hi ziaza a phunphun a ngeimi a si maw ti nak si lai cu ti, hehe. A chim a har pah i na lung a fian lo cun van rel chap hmanh: validity nih hin thil 4 a zoh.

12625784_10156420998260263_708415655_n

Measurment validity: Tahfung na hmanmi nih hin na cawn duhmi concept kong a chim taktak maw? Aa saing maw, ti khi si ko. Tc. IQ test ah an in tuah tikah bia an in halmi tampi a um lai, an biahalnak pawl nih na IQ zeizat dah a si ti a chim taktak maw, timi khi a si.

Internal validity: Thil canning/sining an i pehtlaihnak (causality) kong ah zeitluk in dah dinfelnak a um ti khi a si. Tc. Cungte a molh tuk ruang ah Maite a zia chia ti khi kan research nih hei ti sehlaw internal validity nih a halmi cu, Maite a ziachiat nak hi Cungte a molh ruang ah maw a si tak, a dang kong hna a um kho ko lo maw, timi khi a si. Piang deuh maw ka thei lo.

External validity: Mah hi cu na research i a result thawng hin thil sining a tlangpi huapin chim khawh a si maw, generalize tuah khawh a si maw ti hi a si. A biana ah Laimi sin ah research na tuah hnga i na result cu, Lai ngakchia cu fung tuk nakin thazaang pek deuh le cawisan deuh ahcun an tthangcho deuh, ti a si hnga. Lai ngakchia lawng an si lo, ngakchia an si dih ko, tiah a a tlangpi in kan chim kho maw chim kho lo timi khi a si.

Ecological validity: Na research in a phi na chuahmi na result hi a taktak ah, nifatin nunnak ah aa hmang kho tak maw tak lo timi kong a si. Lettweh a ciah maw chiah lo, a practical maw cal lo timi khi mu.

 

Chirhchan

Bryman, Alan. (2012). Social research methods. Chapter 3. Oxford: Oxford University Press.

 

 

Voi khat ah thiam lakin carel dan- Reading smart

Tukum hi ka carel ding a tam tuk i smart deuh in ka rel lo le ka fim hna lo ahcun ka ca pawl hmanh kawl tthan khawh dawh in ka um lo. Mah caah cun ca voikhat ka rel cangmi voikhat nolh tthan ka hauh lonak hnga ka tuahmi tete le kaa ziak ngaimi rak share ruah ah mah post hi ka rak ttial. Tampi nih cun nan hngalh cia a si ko lai.

Pakhatnak ah lungput hman in carel hi a biapi tuk ka ti, chim duhmi cu, kan saya le nih tu zarh cu mah hi nan rel lai ti ruang i rel khi a um tawn, mah bantuk relmi khi sau a khang lo, keimah caah cun. Mah cauk chapter nih, mah article nih hin zei kong dah a rel rengreng ti mi theih duhnak le interest in ka rel ahcun ka lung a lut deuh i sau deuh zong a cam.

11934485_10155964996210263_3354176627154385394_o

Pahnihnak ah ca kan rel hlan ah kan relmi kong ah zeital kan hngalh ciami a um maw ti i check hi a biapi. Abianah, mipem pawl nih zei bantuk harnak dah an ton, timi kong a rel ding ka si ahcun a ca ka rel hlan ah keimah nih ka hngalhmi a ummi tete kaa ttial hna. Kanmah kan thiam ciami le kan rel tharmi kan fonh tikah a felfai deuhmi, a kau deuhmi, a fek deuhmi, hngalhnak a kan pek tiah ka ruah.

Pathumnak, a biapi tuk tiah ka ruahmi, cu chapter pakhat a si loah, article pakhat na rel dih tikah, i ttial, note lak hi a miak tuk hringhran. Kan relmi i a biapi bikin a chimmi kha kan lungfian ning hi a tawi nak deuhin kanmah bia tein kan ttial tikah, zoh tthan ding ah a ttha tuk. Cattial tu hmanmi biafang bak in na ttial a si ahcun a cahmai number ttial philh bak hlanh, credit pek an duh tikah kawltthan a har tuk. Article pakhat hi cahmai 30 a um hei ti ko u sih, kanmah nih hmai 3 hrawng in note kan i lak tikah ahnu thla 2 a rauh i kan philh tikah cahmai 30 rel a hau ti lo, kan note kan zoh tikah a chuak tthan dih ko.

Palinak ah kan note kan i ttial tikah kan relmi ca i a chim duhmi lawng si loin, a tangah kanmah ruahnak ttial chih ahcun mah cu carel hman an ti mi cu a si. Relmi poah i zumh chan a si ti lo cu mu. Ka relmi i cattial tu a chimmi vialte ka lung a tling maw, a tlin lo cun a ruang, tbk. ttial chih nih hin thluak a kauhter, khurruahdan zong a tthawn ter. Mi chimmi poah, eh, kan ti peng cun kan thluak a um har tuk lai. Cun, cattial tu hi mifim, cathiam minthang, hmuhtonmi a ngei tuk cangmi an si tikah an chimmi ka lung a tling lo van ti khi hmaikhah lo a um ngai. Nain, minung hi kan tonmi aa dang cio, ahopaoh sin in cawn khawh a si. Hmaikhah lo ding si lo, kan i soi palh zong ah ningzah a hau lo, annih cu rian a ttuan cangmi researcher a si i kannih cu siangngakchia lawng kan si rih cu mu.  Kan thiam lo ruang cun pei kan cawn cu, si ko lo maw?

cropped-img_4790.jpg

Panganak kan ttialmi kan pc i kan save tikah kawl tthan fawi ding tein fim a ttha. Deskstop ah khat lak in thil chiah i mit tha zong a pam, rian zong a buai, caan zong a pam. Duhnak poah chiah i save nak file min zong hngalh ti lo ahcun loh bak a si ko. Mah caah cun save lai ah file min fiang tein pek ahau. Cun kan lakmi subject pawl folder dang tein chiah dih, subject folder pakhat chung ah module vialte ttha tein tthen dih i fim dih ahcun van lak tthan le zoh tthan a fawi deuh ngai.

Uni/college a kaimi nih sianginn ah free in pekmi cauk le article pawl na hman bal lo a si ahcun nan library (online) rak check hrimhrim te uh mu. Academic articles pawl hi sianginn library ah free in ka rel peng caah a man a fah ka rak hngal bal lo, nai ah ka check i article pakhat US dollar 19.90 hna 30 USD hna bak an si.

Mah hi cu nan huam bal lai lo Part 3: Biafang fianh

Tu semester i research method (metode) course ka ngei i mah cauk hi kan rel.

11412197_10155661097395263_5572314182844831564_o
Cauk a har pahmi rel dan: cake le lakphak te hen rel ahcun aa rel deuh ngai.

Tthal lio ah chapter 1 chung ta note pawl ka rak post i atu hi a peh a si, chapter 2 le 3 in a si lai. Research tuah dan (Research method/ Metode) a cawngmi a tampi kan buai peng i kan tlau pah lengmang nak cu a biafang (terms) pawl ttha tein kan i fian lo ruangah a si tiah ka ruah. Kan i fian lawng ah kan thleidan khawh lai cu, ti ko? Theih hrimhrim, thleidan thiam hrimhrim a hau mi biafang pawl a um:

Ontology

Epistemology

Methodology

Methods.

Thuk deuh in kal hmanh u sih.

Ontology (Ontological Belief)

Vawlei cung ah hin thil hman ti mi cu a um bak, a hmanmi cu kawl khawh a si, hmuh khawh a si. Mah hi a hmanmi a si caah mah hi na tuah lo ahcun na palh. Reality, truth le zatlang nun sining kong pawl ah, mithmai zoh lo tein, thil hman timi cu a um bak. Mah bantuk ruahnak a ngeimi na si ahcun realist na si, kan ti lai. Na ontological belief cu realism a si tinak a si. Realism he aa lo tukmi cu objectivism a si.

Realism le objectivism he aa ralkah bakmi ruahnak cu relativism a si. Subjectivism tiah auh pah tawnmi constructivism zong hi relativism he an i lo. Annih zumhnak cu thil hman timi hi pakhat lawng a um lo, nangmah caah a hmanmi le keimah caah a hmanmi aa lo lo, ti a si. Zatlang nun sining (social phenomena) pawl cu minung nih kan ser chommi, kan ser kan remh cuahmahmi a si, an ti fawn.

Minung hi aa dang dih in sermi kan si, kan nunphung zong aa dang, chan zong aa thleng lengmang i thil sining zong aa thleng lengmang caah thil hman ti mi cu pakhat lawng a um lo tiah keimah pumpak in cun ka ruah caah relativist ka si, kan ti ko lai.

Realism, relativism, objectivism, contructivism le mah bantuk pawl hi ontology lei he aa pehlaimi zumhnak pawl cu an si.

 

12376740_10156297040900263_5703207415479082518_n

Epistemology

Theihhngalhnak (knowledge) cu zeitin dah kawl awk a si timi a ruatmi a si: positivism, interpretivism, tbk.pawl an si.

A tawinak in cun zeiti pungsan in kawl in dah hngalhnak kan hmuh lai timi biahalnak a hal kan ti lai cu. Phundang in cun, research a tuah tu le a tuahmi research zeitin dah an i pehtlaih ti zong in chim khawh a si. A biana ah:

Research tuahtu nih aa tuahmi research ah i thlak len lo, zei influence hmanh um bak lo in research cu tuah ding a si (Stay back!), timi ruahnak a um. Na research hi inn pakhat va si sehlaw, innchung ah na lut lai lo, a leng lawng in na zoh lai. Etic approach ti zong in an auh. Natural science lei le economy lei he aa pehtlaimi research lei ah an hman ngai. Objectivism a si lo ah realism aa tlaihmi nih an pom dan a si lai cu.

Adang pakhat cu research tuah tik ah a chung i va luh bak i tuah khi a si. Ethnography an ti lengmang mi khi a si i, research na tuah duhnak field bak ah na va kal, anmah bantuk in khua na sa, zeidah an tuah ti lawng si lo ah zei ruang ah dah an tuah, ti phun tiang khin thuk deuh in va kherhhlai khi a si kan ti lai cu. Emic approach ti zong in auh an si. Bawipa Jesus le Siangbawi te kha vawlei ah le Laitlang ah khamh ruah le thawngttha chim ruah ah si lo in research tuah ah ra hna sehlaw an hman mi approach kha mah hi a si kan ti hnga. Minung kong le zatlang nun pawl kong cawnnak ah cun mah hi ka uar deuh ngai ve.

 

12132485_10156105551315263_1158455494207513107_o
Mit dinhank

Methodology

Method he aa khat lo timi hi hngalh a hau. Zeitin dah hngalhthiamnak hi khawmh awk a si timi kan ruahnak hi zei bantuk ruahnak/philosophy nih dah lam a hruai i a kilven timi khi a si. Bryman nih cu research design tiah a auh. Design pawl ah a um kho mi cu case study te hna, experimental design, comparative design te hna khi an si.

Zei bantuk research design dah kan i thim ti mi cu a cung lei pahnih, ontological le epistemological, he pehtlai in kan pom mi nih bia a khiah ding khi a si.

 

Methods

Theihhngalhnak cu cu ti kha tin in kawl ding a si, mah caah cun hi research design hi kaa thim lai, kan ti dih khan cun zeiti phungsan tein dah mah theihhngalhnak cu ka khawmh lai (methods) ti mi kan phan cang.

Theihhngalhnak (Knowledge) kan ser khawhnak ah cun information a hau, data a hau, mah khawmhnak ah kan hman ding mi methods cu interview zong a si ko hnga, survey zong a si ko hnga, observation (ngiatthlainak) zong a si ko hnga.

 

A tawinak in

Kan ontological belief nih hin epistemological belief zeidah a si tiah bia a khiah. Epistemolotical belief nih methodology /research design kan i thimnak ah lai a rel i kan methodology nih kan methods zeidah a si lai ti mi bia ka khiah.

 

Chirhchan

Bryman, Alan. (2012). Social research methods. Chapter 2 and 3. Oxford: Oxford University Press.

NurseKillam. (2015). Ontology, Epistemology, Methodology and Methods in Research Simplified. Retrieved 12.01.2016 from https://www.youtube.com/watch?v=hCOsY5rkRs8

 

Phaisa khon a thiammi siangngakchia (Saving money while studying)

Siangngakchia na si buin zeitin dah khualtlawnnak phaisa na ngeih ti hi an ka hal pah lengmang. Khual tlawn cu tenh a hau i phaisa tampi a ngei lomi (siangngakchia) nih cun a hman dan thiam a hau ka ti. A hlan deuh ah hin ka nu le kapa inn ah ka um, rawl man le inn man ka pe lo, stipend ka ngah lengah sianginn ah part-time in ca ka chim i lahkhah zong ka ngah nain phaisa a hleimi ka ngei bal lo. Keimah tein ka um hnu, zei poah keimah tein ka cawk a hauh hnu, rian zong ka ngeih lo hnu tu in hin lung fim kaa thawk, caan saupi a rau ve mu, i ka phaisa hman dan khi ttha deuh in ka zoh cang. Kan lifestyle nih hin bia tampi a chim, tlawmpal te kan nun dan kan thlen hmanh ah hin thil ngan deuh tampi aa tuah kho ti hi ka hmuhmi bak a si. Mah kong cu share ka timhmi a si.

11357176_10155576637835263_6982697702917093851_o

1. Cheu hra cheu khat pek

A biapi tuk ti leng cu ka chim kho lo, Pathian nih nan ngeihmi cheu hra ah cheu khat hi keimah ta a si, a ti ahcun zum ko, cheu 2 hi a si a ti zong ah zum ko. Zeitik hmanh ah an hleng bal lai lo. Kei hi cheu hra cheu khat kong ah Pathian nih style tak in, fak nawn tein a ka cawnpiak cang i ka lung a fim cikcek. Cu hnu cun phaisa ka hmuhmi chun te Pathian nih thluachuah a pekmi ka hmuh thluahmah.

2. Hman taktak ding thil te lawng caw

High school ka kai lio hi thil ka caw tuk, thil man an tthumh ai pat ti in tam tuk cawk i thlau viar ka hmang. Hman satsai lo ding tam tuk cawk hi a pam tak tak tak ka ti. Nungak caah fashion cu a biapi tuk ko, nain thil man fak le thil a paw mi (trendy mi)tampi ngeihnak/ihruknak in kan confidence a rat a si ahcun mah cu ngeihchia tuk a si cang. Confidence cu chunglei in a ra ding a si i, a leng i kan i hrukmi cu a kan bawmtu lawng a si ding a si. Thil tampi ngeih nakin, ngeihmi dawh tein , i tlak ding tein i hruk hi a biapi deuh cu, ti ko? 1000Kr man kha 200Kr in an tthumh zong ah voi khat lawng hna naa hruk ding a si ahcun cawk lo a miak deuh ka ti.

IMG_6059

3. Ttamhnak ttha tein kilkawi

Nungak nih cun ttamhnak a man a fah dan hi kan hngalh cio ko. Kan i cawkmi a dihlak in kan hman nak in kan khuai ruang ah maw, kan thlau ruang ah maw a tlaumi an tam deuh. Cun thil pakhat kan hmanmi a dih hlan ah, a man an tthumh ruangah maw a thar a chuah ruangah maw, cawk chih kan hmang. Mascara hna fung 2 van ngeih, hman satsai ttung lo i car ter dih ti bantuk khi a pam tuk. Puai kal tik i hawi le nih na ttamhnak an i hlan tik zong ah ttha tein zuldawi law fim tthan. Ka ttamhnak ttha tein ka kilkawi hnu hin kum khat ah voi 2 hrawng lawng ttamhnak ka caw cang. A ttha tiah an cawngia (advertise) mi poah test duh hlah, a hlan na test i zei hlei a si lomi deuh khi an si ko lai. Na hnabei a sei tuk belte ah cun dawr ah test ding hal hmasa hna. Phaisa a tlo ning hi chim awk a ttha lo.

Ttamhnak lawng si lo in adang thil kan ngeihmi, electronic thilri siseh, thil puan siseh, felfai deuh tein kan zohkhenhnak khawh ahcun a herh lo ah phaisa hloh a hau ti lai lo.

4. Eidin cawkmi thut ter/hlonh hlah

Mah te lawng a ummi si ahcun ei chom te lawng cawk hi a ttha. Tam nawn cawk i ei manh hlanh ah thut viar hna hi a um kho ngai cu mu. Ttha tein tuak cia tein cawk ko nain ruah lo pi in hawi le chuahni ti bantuk a ummi a leng ah na ei pah ruang ah na eidin rawh an timh ahcun, chuan cia in freezer chung ah khumh khawh a si ko. Banhla hna, thei hna thut an timh ah cun par law freezer ah chia hna law a hnu ah smoothie, juice tbk. ah ser khawh an si ko. Na buh hna ni 3 chung ah a dih rih lo ahcun hlonh nak in pakhat khat he thaw tein kio law ei ko (kei zong ka thi lo i thih cu nan thi theng lai lo :D).Phaisa zong a tlo, pawngkam ca zong ah a ttha, Pathian thluachuah upat zong a si.

11046229_10155586507785263_3962447802624646846_n
Mah hi cu exam khaan ah kaa putmi a si lo, a dih in ei dingah Flo he kan i putmi.

5. Paw khim hnu lawngah innleng chuak

Keimah bantuk na si ahcun na paw ttam tikah na duhmi poah a man tuak loin na ei cang ko lai. Mah cu kaa theih tuk i khim tein ka ei ta hnu lawngah innleng ka chuak. Norway ah din ti cawk hi i fahsak ding si, vawlei cung ah a thiang bik ti a ngeimi kan si i mah cu i tthathnem pi ding a si. Ti i ken lengmang zong nih hin a herh lo ningin phaisa hlolh a kham tuk. An ti lengmang bang, kan pawttam rua kan timi caan tampi cu kan ti a hal bia tu khi a rak si.

6. Coffee dawr tthut i sum

Coffee a duh bakmi na si ahcun coffee sernak i cawk ko. Coffee dawr ah hrai khat 30Kr kan pek, inn ah kanmah tein tuah ding ah coffee dip bawm khat kan cawk ah 30Kr hrawng kan dih i hrai tam tuk kan din khawh. Inn ah ca na zoh khawh lo ahcun khuachung library a si lo ah sianginn ah va zoh ko.

11334175_10155654294960263_8969410204768138222_o

 7. Cauk tthing caw

Siangngakchia paoh nih cun cauk a man a fah dan kan hngalh dih. A thar theng te ti hlah, nikum ah an hman ciami naa hmuh ahcun caw colh ko, a man a cheu in an zuar i a hlawk tuk (cauk a kau setsai lomi ta naa hmuh chinchin ah cun a thar bak khi si ko). Nain a hlun na cawk hlan ah na saya te hal hmasa lengmang hna, a si loah a rel ciami hal hna: cauk hlun na cawkmi kha 2010 i an rak chuahmi a si i 2013 ah a thar a chuah tthan i aa lo lomi a tam tuk ah cun a cheu saya te nih an duh lo. PC in ca na rel khawh ko a si ahcun sianginn library ah e-book free in an ngei tawn. Check hmasa.

8. A leng na chuah tikah

A leng chuah lo ahcun hawi kan ngei lo kan ti, a hman ko. Nain a leng na chuah tikah lungfim tein na um ahcun tampi dih a hau lo. A leng chuah ti cu, hawi le chuahni kal, khuachung len khi ti duhnak a si. Hawi ngeihnak ah a leng chuah a ttha ko, nain hawi ngeih duh ah zeitik hmanh ah zu din lo ding. Hawi ngeih ruah ah na man (value) tthumh lo ding. Na duh lo ahcun No ti ko, a ri mi na hawi le tu kha ttha tein zohkhenh hna. An simh ahcun a ding lo mi hawi he i kom, an tampi ko. A dingmi na si ahcun siangngakchia na si i phaisa tampi na ngeih lomi kha philh lo ding, cun na cawk cuahmah mi hi Rimi/Rema ah cun a man a fawi te timi le na din cuahmah mi hi tlawmpal ah zumput ah a kal ding lawngte an si ti i chim pah lengmang. Zu cu nuamhnak ah din ti a si nain, zu na din lo tikah naa nuamh thiamtthiam ko cun din a hau lo cu ti?

Cawnpiak phunphai tein aa la mi ka lawh cun sorry, kaa tinhmi si bak lo mu. Phaisa tampi i khon hna sehlaw khual tampi tlawng hna seh ti ka duh bia :D.

 

 

Mah hi cu nan rel huam bal lai lo Part 2: Research Tuah Dan a Dotdot ah Telh a Herhmi Pawl

Elements of the Process of Social Research

(recap from last post)

Kan hnu ah research tuah tik i ruah chih ding thil tete, context tiah kan auhmi, kong ka rak ttial. Thilum ternak ah a tawinak in ka nolh lai.

Bryman nih context a sersiam tu thil 9 a khawmh hna. Cu hna cu theory, literature review (hmuh ciami pawl), theory le research an i pehtlaihnak kong kan hmuhdan, epistemological consideration (zeiti in dah research kan tuah a herh timi kong ah kan pomning), ontological consideration (vawlei le pawngkam sining kan hmuh dan), kan research nih aa tinhmi, research tuahnak ah sponsor ahodah a si timi le research tuahtu pumpak huam phun le felnak pawl an si.

Kristiansand
Kristiansand Biakinn

Tuchun cun research tuahdan a dotdot (process) ah tuah a herhmi thil pawl ka rak ttial lai. Ahmasa ah process pawl a tawinak in ka van ttial lai mu.

  1. Literature review
  2. Concepts and Theories
  3. Research Question
  4. Sampling Cases
  5. Data Collection
  6. Data Analysis
  7. Writing Up

A tawi khawh chungin hrilfiah kaa zuam lai mu. Na hngalh ciami kha cu lonh thluahmah ko hna.

1. Literature review

Kan topic kong ah midang nih research an rak tuah ciami pawl hlathlat kha a si. Thil pakhat hngalh kan duh tikah midang a kawl ciami an um maw, aho te dah an si, zeidah an rak hmuh, zeitin in dah an rak hmuh, an hmuhmi kongah biaalnak phunphai a um maw, zei bantuk theory le concept pawl he dah an rak pehtlaihter timi pawl kawl kha a chim duhmi a si. Mi hmuh cia cu kawl len a hau lo cu mu. Na tuah duhmi topic kongah midang tuah cia a tam tuk i na rel dih khawh lo hmanh ah tawhtlai cauk tal cu rel ah a ttha, a ti. Zeitin dah ka hngalh lai, kan ti hnga, internet le kan supervisor cio kan hman ko hna hnga.

  1. Concepts and theories

Na topic he aa pehtlaimi concepts pawl le theory pawl hngalh kha chim duhmi a si. Concept timi cu bureaucracy, social control, cultural capital, tbk. pawl khi an si. Cun theory cu theory si ko.

  1. Research Question (RQ)

Na tuah ding vialte ah lam an hruai tu a si lai tikah a biapi tuk. Na biahalnak a kauh tuk ahcun tlau a fawi tuk. Bi nawn tein a fiang taktakmi ngeih khawh ah a ttha. Research na tuah pah zong in thlen pah remh pah lengmang khawh a si.

  1. Sampling cases

Na kawlmi topic kong ah information/data pawl an pe khotu minung pawl kawl kha a chim duhmi a si. A biana ah Thailand ah a ummi kawlram ralzaam pawl kong hngalh duh u sih law, an zapi tein bia kan ruah kho hna lai lo cu mu. Minung zeimawzat kan thim a hau hnga. Zei bantuk minung dah biaruah ka duh, zeiruang ah dah mah bantuk theng cu ka duh ti mi kha hngalh a hau hnga.

  1. Data Collection

Data pawl khawmh a si cang ko. Mah kong hi kau ngai in a hnuah zoh tthan te dawh kan si. A tlangpi in, information khawmh dan cu, interview in, cun participant observation timi, an kong hngalh na duhmi pawl naih tein va zoh/lehla nak, tbk. pawl an si.

  1. Data Analysis

Na khawmhmi data pawl kha fingrilh in rilh bantuk khi a si kan ti ko lai. A herh lomi hlonh a herhmi khawmh, an i pehtlaihnak kawl, tibantuk pawl khi a si ko.

  1. Writing Up (Paper, thesis ttial)

A cung lei pawl kha na tuah dih in cun ttial ding naa ready cang tinak a si hnga. Ttial tikah aa tel tawnmi cu a tanglei bantuk in an si lai.

  1. Introduction (zeidah na kawlmi a si, tc. RQ)
  2. Literature Review (mi nih an rak hmuh ciami)
  3. Research Methods (na kawlmi zeitin dah na kawl)
  4. Findings (zeidah na hmuhmi an si)
  5. Discussion (theory le concepts pawl he RQ he na pehtlaih ter lai)
  6. Conclusion (na research a biapitnak, a sullam ngeihnak)

Tuchun ka ttialmi zong hi Bryman cauk Chapter 1 ta a si rih ko. A ra laimi cu Chapter 2 in a si cang lai.

Research kong kan ceih i Malaysia kaa thei.
Research kong kan ceih i Malaysia kaa thei.

Bia sullam

Concept – ruahnak (Chin-Dictionary.com)

Theory – ruahnak in fianternak (Chin-Dictionary.com)

(an explanation of observed regularities)

Collection – khawmhmi

Analysis – Ttha tein zoh cikcek (Chin-Dictionary.com)

Mah hi cu nan rel huam bal lai lo Part 1: Research tuah tikah ruahchih a haumi thil pawl

(Context of Social Research Methods)

Laiholh in ka hman lem lo ding biafang pawl fianhnak

Context –          Pawngkam thil zohchih a haumi pawl

Research –        Dothlatnak, hlathlainak

Method –           Dan, Tuah dan

Theory –            Ruahnak in fianternak

Topic –                Konglam

Impact-              (A leh dan ka thiam lo)

Influence-          (Ka let thiam tthiam lo)

Hypothesis-       A phi a chuak bak lai tiah ruahdomhmi

 

Research pakhat tuah tik poah ah ruahchih lengmang a haumi pawngkam thil pawl an um tawn. Kha bantuk pawngkam thil pawl nih khan context timi cu a sersiam, i cu context chung ah cun kan research cu tuah a si. Cu ruahding pawngkam thil tampi lakah Alan Bryman nih a tanglei thil pa 9 hi ka rak khawmh.

Hi thil pawl nih hin, zei bantuk kong dah hlathlai ding ah naa thim i zeitin in dah hlathlat naa timh i, cun, na hmuhmi pawl zeitin dah na lung a fian timi pawl hna ah influence a tuah tawn, ti a si.

My new office
My new office

1. Na topic aa pehtlaimi theory pawl:

Tc. mobile phone sms kuat nak nih minung kan i hawikomhnak ah zeitin bantuk impact dah a ngeih ti hlathlai na timh tikah technology tthanchonak le hmannak le a impact pawl kong he aa pehtlaimi theory pawl zoh chih na duh ko hnga.

2. Na topic kongah nangmah hlan i midang nih an rak hlathlai i an hmuh ciami pawl hngalh zong hi a biapi. Literature review timi kha a si i abiapi mi cu mi nih kawlcia, hmuh cia mi kawl tthan sual lo nak hnga caah a si.

3. Theory le na research na pehtlaih ter hna dan:

Pehtlaih dan a tlangpi in phun 2 in tthen u sih law hiti hin kan fianh hnik lai:

a)Theory le hypothesis kha a hman maw hman lo tiah research tuahnak in in hneksak (theory a um hmasa)

b) Research tuahnak i hmuhmi in theory ser (theory a um cia lo)

4.

Hlathlainak hi zeitin dah tuah phung a si tiah na pom dan: Epistemological consideration timi kha a si i lungfian deuhnak ah zohdan phun 2 in ka ttial lai.

a) Micheu nih ´scientific approach/model´ hman in hlathlai hi aa remtlak an ti i an ruahdomhmi hypothesis pawl ah tahfung fiang tein an khiahmi in an tah i an tuak. (Bio lab i experiment tuahmi phun a lo mi khi)

b) A cheu nih cun minung, mibu le zatlang nun kong ah scientific approach hi hman ah aa rem lo an ti. Tahfung ser khawh a si lo an ti.

5.

Mah hi cu ontological consideration an ti i, zeiti rengreng in dah vawlei sining le minung, mibu sining hi kan lung a fian ti kha a tuakmi cu a si. Fianh deuh u sih law ruahnak phun 2 ttial hna u sih mu.

a) Vawlei/Minung/ Mibu sining (social world/social phenomena) cu amah tein a um ciami a si. A sining he aa tlak ning in minung hi kan um timi ruahnak

b) Social world/society tham cu minung nih kan ser pah cuahmah mi a si timi ruahnak

Atu ka ttialmi hi mah cauk i Chapter 1 ta a si
Atu ka ttialmi hi mah cauk i Chapter 1 ta a si

6. Na research chung i aa telmi mibu i an manngeihnak (value):

Ethical issue (ziaza le lungput lei he aa pehtlaimi) kong tampi tuak a hau, a biana ah na research caah bia na halmi pawl hna, na hlathlai mi pawl hna nih aho na si i zei na tuah ti an hngal maw, anmah kong ttialnak caah ho nih dah nawl an pek, ti pawl kong khi. Cun, na research ah ngakchia an i tel ahcun an nu le an pa nih an theihpi maw theih pi lo, tbk.

7.

Na research nih zeidah aa tinh? Cozah policy aa thlennak ah maw, mipi hngalhnak karhter duh ah dah? Hi pawl zong nih hin na research tuahmi le tuah dan cungah impact a ngei kho.

8.

Political context timi, a fawi deuhnak in chim ahcun, na research tuahnak ah aho nih dah bawmhnak an pek timi zong nih na research tuahmi, tuahdan le hmuhmi cungah impact a ngei kho ngai. A biana ah cozah nih na research caah phaisa in bawm sehlaw cozah chiatnak na hmuh len tikah na ttial lai maw ttial lai lo timi pawl khi.

9.

Research tuahtu pumpak manngeihnak, felnak le huammi nih kan tuahmi research zeidah a si, zeitin dah kan tuah timi a influence ngai ti a si. A biana ah, kapa hi Malaysia in a rami ralzaam a si caah Malaysia Laimi ralzaam kong tuah ka lung a tho ko hnga. A biapi mi cu, kau deuhpi in hmuh khawh i zuam kha research nih a tinhmi cu a si. A biana ah ralzaam timi nih zei bantuk pawl dah a chuah pi, ti mi kau deuh tein na kawl ahcun vawlei caah a tthathnemmi theihhngalhnak tam deuh a chuak kho hnga.

My new office
Staring at the black screen so I could pretend I didn´t know somebody took picture of me. 😛

Bia pehpar (na huam lo cun rel duh hlah)

Number 8 nak kong he aa pehtlaimi pakhat te a rel huammi caah:

University i a ttuanmi researcher pa pakhat kha cozah ta a si lo mi sizung pakhat nih research tuah dingah an hlan, research a tuah lio ahkhan mah sizung i ziaza ttha lo in an tuahmi thil pawl kha a hmuh len ti a si.

Report cu pek lengmang a si tikah sizung nih khan a hmuhmi kha a publish ding an duh ti lo. A tuah tanttim ah an phuah i a hmuh ciami vialte zong kha a zungkhan in an lak piak dih ti a si. Mah researcher pa a ttuannak university kha mah sizung nih khan phaisa a va bawmh tawnmi a si rua. Mah tikah mah univerisity zong nih cun an university i zungkhan i a thil an lak zong ahcun zeihmanh kan kham lo pinah, ka hmahthah dan a hman rih ahcun, rian in an phuah ti a si.

Mah kong kha micheu khat nih an rak hngalh, an hlathlai i mah kha paper an chuah, university nih an kilven ding an kilven lomi kong kha an soinak a si, mah paper cu ka rel ka ti mi cu a si.

A paper min fiang set in ka hngal ti lo i sorry bak mu, “ The good, the bad and the ugly : the role of universities in …, zeidik a si, ka philh i atu ka google len i ka hmu kho ti lo)

Research Tuah Dan A Ttialmi Cauk Ttha Pakhat

Research – dothlatnak , hlathlainak (?) –Lai hlolh in zeitin kan auh lai tiah kan lung a tlinmi a um cang maw?

Uni kum khatnak kan kai lioah ca a kan relter mi a rak tam tuk i caan ngeih set lo ruangah le, hman tein chim ahcun, thathut pah ruangah, kan cacawn hawi pawl he rel ding kan i tthen hna. Kan relmi cio kha textbook holh in si loin lungfian a fawi ngaimi holh in kan lungpian dan cio in kan ttial i kan i hrawm hna. A biana ah article pakhat cahmai 40 a ummi kha cahmai 6 ti phun ah aa fun ahcun a rel a nuam deuh ngai.

Mah bantuk a lo ngaimi tuah kaa tim. Ka van fianh lai.

Atu tthal chung ahhin cauk rit/har (non-fiction) rel ka timhmi ah Alan Bryman ttialmi, Social Research Methods, timi aa tel. Bachelor thesis caah tlawnpal ka rak rel bal i a ttial dan kaa ziak ngai ruang ah rel ka duh chap bia a si. Social science he aa pehtlaimi dothlatnak (research) tuah dan ttialmi cauk a si.

Amazon ah 67 USD hrawng a si, ka caw rih lo, ka u Biakku ta kaa hlan.
Amazon ah 67 USD hrawng a si, ka caw rih lo, ka u Biakku cauk kaa hlan.

Social science ah thesis a tuah ding siangngakchia caah a ttha khun.

Ka rel lai i ka rel nak tete ka lung fian ningin Laica in ka ttial lai ka ti. Ca in ka ttial ahcun kaa hmahthah dan a tthat deuh pinah ka lung a buai tthan tikah ka zoh tthan khawh ka ti.

Tial ko vevek ahcun a herh teding pawl ka hrawmh hna ah a ttha ko lo maw ka ti caah blog ah post kaa tim. Keimah pumpak bak ca lawng si ti lo i, a relmi an um kho men, ti kan ruah ahcun kan daithlang lo deuh ngai cio cu mu.

Hi bantuk ca har pawl ttialnak ah ka Laica thiammi nih siseh ka chung i a um ciami cawnnak nih siseh a tlinh naisai lai lo tiah ka chim cia. Atu hi cu siangngakchia pakhat i note a si lai caah, na cattial dan le na biahman ning naa ralring lo tuk, nan ka ti te men ko lai. Nain, biafang hman dan tuak tuk i har nawn tein phuah len ahcun mirang ca le Norway ca in rel bantuk in a har tthiam ko lai hen cu ti?

Cauk a har pahmi rel dan: cake le lakphak te hen rel ahcun aa rel deuh ngai.
Cauk a har pahmi rel dan: cake le lakphak te he rel ahcun aa rel deuh ngai.

A donghnak ah chim ka duhmi cu mah cauk hi index he zei he cun cahmai 766 a um, chapter 29 a um i a zapi ka rel bal lai lo dah. Ka huamnak ka rel mi tete tu ka rak ttial ve lai mu. A huammi nih rak rel tawn te uh law tiah.

Exam Nuam tein Phit Dan

Tu zing hi ka thawh ruah lo piin a tuan tuk sual i exam aa thawk hlan ah caan tam ngai ka ngei, keimah ve lo bang. Tuhnu suimilam pakhat ah a phi ding ka si i cazoh ka huam ti lo caah mah post hi ka rak ttial .

Siangngakchia ka sinak a sau tuk i exam zong tampi ka phit tikah keimah caah a rak ttha bik tiah ka ruahmi exam caah timhtuah dan pawl rak ttial ka duh. Kan ruahdan aa khat maw kan zoh hna lai mu.

Cazoh kong chim ding ahcun kan tlai pah cang i mah kong kha cu timhcia cangmi ah hei chia ko hna u sih.

Mit thadam nakah @Kristiansand
Mit thadam nakah @Kristiansand

 

  1. Pum thianhlimnak

Mitam pi hi exam lioah buar nawn tein um kan hmang ngai, kaa kholh manh lo, kaa ttamh manh lo ti phun khin. Tikholh hi caan tampi a dih lem lo i pum thianhlimh hi cu a tlawm bik tuah ding a si ka ti. Keimah pumpak caah cun, ka sam hna ka ttawlka a si i thiang nawn, hmui nawn in ka um ahcun exam phit kaa nuam deuh. Tuak law, na sam naa ttawl lo nak a sau i na lu ah benh nawn tein, thu nawn tein a um lio ah maw naa nuamh deuh, na sam naa ttawl, na hmui i zaang nawn tein na um ah, mu?

  1. Ttamh

Ttamh zong hi a caan a heu lem lo caah aa ttamh tawnmi na si ko ahcun tlolh lo ah a ttha ka ti. Kei, tamh zong hi kaa ziak ngai, ka thiang, kaa rem tiah ka ruah caan ah ka lungthin aa nuam i ka thluak zong a ttha deuh. Na mit le na lungthin aa tthangh tuk rih lo zongah hmursensi hna naa thuh ahcun na hmur aa tthang ngai lai i an bawmh ngai ko lai ;). Mi nih, “ ziah exam pi ahcun mah tluk cun aa ttamh hnga, ´´ ti phunphai in an in zoh ahcun, “ nangmah nakin ka phi kho deuh lai,´´ ti phun in zoh hna, a si lo le zoh lawlaw hna hlah.

11036032_10155576634790263_5798896193229562285_o

  1. Thil hruk

Zaan ah thilhruk ding i chuah cia hi a biapi tuk tiah ka ruah. Zingka ah kawl chom, hmawca khat lei hna hmuh lo ti phun khin cun rel ciami ca zong philh a fawi te. Cun, hmuhmi poah i hruk chom nak incun, um sia zong a rem i kaa tlak ngai tiah kan hngalhmi thil i hruk ahcun a nuam khun ngai ka ti. Na bawngbi aa rek tukmi, asiloah a tawi ngaimi, dirnak lawng ah a tthami hna naa hruk sual ahcun suimilam 5 chung exam khaan chungah tthut a nuam lo ngai lai.

  1. Eidin

Exam khaan luh hnu cun cafeteria ah kal a ngah ti lo caah herhmi vialte i ken cia ah a ttha. Ti, coffee, chuncaw, eisupsap, thingthei, na duh zat in i ken ko. A hleimi cu chuahpi khawh tthan a si, i ken lomi cu ser khawh a si lo. Cun khai tikah a awn tukmi i ken hlah, plastic tamtuk in aa funmi hrial khawh ahcun aa ttha. Plastic cawl thawng te khi exam khaan ahcun hna hnok ngai cuh. Strawberry, banhla, mandler (almond seed), yoghurt le bread pawl hi ken dingah ka uar bik. Tissue paper ken philh hlah mu, san a tlai tuk.

 

Mah hi cu exam khaan ah kaa putmi a si lo, a dih in ei dingah Flo he kan i putmi.
Mah hi cu exam khaan ah kaa putmi a si lo, a dih in ei dingah Flo he kan i putmi.
  1. Hmurphit (lonak) si le hand lotion

Kut phit le hmur phit ka hmang ngai i kei, mah pahnih hi kaa ken tawn. Ka kut ttawl a tam tuk fawn i hand lotion lo in cun ka kut a phit tuk nakah ca ka ttial kho lai lo, tiah ka van porh ta.

  1. Thlithiang

Norway sianginn kan exam a tam deuh cu suimilam 5 chung an si hna tikah thli thiang va dawp ta hi a ttha tuk ka ti. Khua na tuak khawh ti lo tikah inn ttin lawng te i tim hlah, innleng ah thli dawp ta law na rel ciami an rak chuak kho men si, lo mei? Cun zumput kal na duh ah i sum hlah, atu lelek kal na hauh ruang zongah inn ah ttin lawlaw i tim hlah. Exam khaan i an hngak tu hna khi ahnu ah na hmuh ti lo ding lawng te an si. Na ningzak hlah, choi peng ko, siarem a biapi. Thla 6 chung na cawnmi a si caah thil hmete ruangah exam khaan in chuah colh cu a paam tuk.

11110899_10155576623135263_8169991553625501992_o

Mah vial! Lykke till! Good Luck!