Hakha ah thla khat

Kip he Hakha kan phanhnak hi thla khat leng a si cang. Kan rat hnawhchan rian taktak kan thawk rih lo nain thil a cangmi a tam, kan tonmi a tam, ni a sau tuk i sau tuk a um cangmi kaa lawh ter. Hakha ni a sau ka tinak cu aho poah tuan tein thawh dih a si. Pepuri ti bantuk khi cu thawh tuanmi lawng nih an hmuh manh. Motor cycle kan ngei lo, kan ke in khoika poah kan kal nain, khua fa te a si i umkalnak le rianherh tuah ah caan tampi a la lem lo. Hmuhtonmi lakah a nuam ka timi le a har ka ti mi ka rak ttial lai i voi dang post tawnmi nakin a sau deuh lai.

Nuamhnak

Nikhua

February ka tlun lio he aa dannak cu October ah cun lei khu a tam tuk lo. Khua a thiang, nikhua a ttha, pawngkam a thiang, thingkung ti pawl zong an hring i a nuam tuk. Minung zong an i dawh khun. Zil, fongvoirawh, bisakut, mai ti pawl a zaat caan a si i ei le ei lo cu dang khat, dum phunphai a dawh ter tuk.

Hawikom

Hawi hlun, hawi thar he kaa ton caah a nuam. Mino kan theihhngalh thar mi rian an ttuan ngai hna i mah cu lung a nuam tuk. Rian ttuan ding ka tha a ka thawh ter tuk ve. Cun pakhat a ummi cu Hakha hi ka um lonak a sau ngai nain, kan phanh ka te hrawng ti dah lo cu, ka inn le ka khua timi feeling he khin kaa ziak colh. Ka ngam tuk.

Chin Idol

Chin Idol a si i kawlram mintang hlasakthiam lawng si loin laitlang awttha pawl tampi zoh le ngaih khawh an si i a nuam tuk. Live music ka uar tuk i Chin Idol lio cu tuan tein kaa thawh peng. Tukum Chin Idol ah ka uar bikmi cu production team an si. Mino tete an si. Ka hmuh tawk ah rian an ttuanmi an i biatak tuk. An fel bak.

Tho Puai

Tho puai kha Chin Idol he komhin chun ah kan tuah. Puai tuah dan hi Pathian thangtthat le hallelujah ti rumro a si uar a um ka ti. Pathian kan duh dan le kan upat dan kan nunphung puai pakhat ah a langh tukmi cu uar kan um ngai. Nifate kan nunnak ah a langh le langh lo tu cu ka hngal tuk ve rih lo.

Tho puai le CACC nih tuahmi Laica kong ceihhmainak ah ka kal i kan nunphung le kan holh a rum ngai ko nain ka hngalhmi a tlawm ning kaa fiang. Zion ah voi khat kan I pum I Lai hla hlapi in Pathian hla bak an sak thluahmah I ka khuasiksem zong a chuak dih. Ka upa deuhdeuh, miphun dang tam deuh he kaa cawh deuhdeuh ah hin ka Laimi ka sinak le kan sining hi hngalh ka duh deuhdeuh. Kan chuahkehnak kong hngalh hi kanmah le kanmah kong (identity) cawnnak ah a biapi bakmi a si cu mu? Lai nunphung le Lai holh hi tam deuh cawn bak ka hau ko I keimah bantuk nan tampi ve ko lai tiah ka ruah top ko.

Nuamh lonak

Zurit thiam lo pawl

Zuri a phunphun ka hmuhmi vialte lakah Laimi zuri hi a mak lo pawl cu an si ve. Ke in a kal pengmi kan si caah kan hmuh khun hna rua. Hmurka in biachia chim le kuh timh ti phun phai an hmang. Thin an hung tuk nain a tthawng lo tukmi an lo I an ril lai I an thi lai ti phun hna khi phan a um. Sianginn kai a hrokhrol I viewpoint pawng ah zu a ding (rua tiah ruahmi)mi ngakchia pawl ka hmuh hna ko ah ka thin a ka khenh. Zeidah, zeitin ka tuah lai ti ka hngal lo.

Caan hman lo

A tawinak in chim ahcun Lai /Kawl suimilam rak ti mi kha a um rih ko. Cun mi he thil tuah I timhmi ah thil pipa um tuk lem lo bu in let top zong a um len rih. Mah hi cu phaisa dih lo, fim cawnnak hau lem lo in remh khawhmi zia a si ko I remh a hau bak ko.

Lamkam zun

Hakha lamphawk tampi ka kal I zuun rim a nam deuhmi lawng te an si. A caan ahcun an veilo cuahmah lio te pawl kan hmuh hna. An lau lem lo. Zoh dawh lo cu dangkhat, ngandamnak ca hrim ah a ttha lai lo.

Innchung kuak zuk

Rawl dawr bak ah an zu ko. A zumi he zu lomi he rit dih, nam dih a si. A miak bak lo, a poi bak ka timi a si. Micheu cu mi inn lennak, mi innchung bak ah an zu ko, ngakchia an um ti zong ruat lo, tar an um ti zong an ruat lem lo. Tuah tawnmi a si caah khuaruah lo a fawi te ko. Nain a okay maw ti ahcun okay bak lo. Kan remh a hau ko.

Pumpak harnak

Keimah pumpak in harnak ka ton bikmi cu Kalay kan phanh bak ah ka laptop a rawhmi a si. Hakha ah mac a remhmi ka hngal hna lo i ka hawipa Yangon a kal lio ah ka kuat thla 1 leng a si cang nain aa remh kho rih lo. Ka rian vialte ka laptop ah um kaw, zeihmanh ka tuah kho lo. Sianginn khar kar, mah tluk caan um lio ah tuah hna ning law, ti ka ruah ah ka sivang.

CCU sianginn khar kha kan rak hngal lo, kan hlathlaimi a chanbau ruangah a si. Rian ttuan colh ding bak in kan rak ra I rian a um lo pin ah rian um ciami le ka tttuan khawh lo tikah ka vaivuan dih ka ti lai cu. Khua ka ruah lo deuh ah kaa nuam I ka ruah deuh ah ka sivang.

Pathian sinah ka zai chel, kaa lawmh chel. A rak tthatnak cu Pathian he kan I naih deuh. Ka laptop cu ka thluak cu si kaw, a rawh tik ahcun Pathian hlei bochan awk cu ka ngei lo cu mu.

Tuan deuh ahcun Pathian he caan ka hmang ka timi hi ka voikhat zunput kalmi nakin a caan a tawi deuh. A dih colh. Atu cu Youtube ka zoh kho lo, ca le ka rel cawk lo, tlangval le ka ngei lo, ka vak cawk fawn lo I Pathian he caan kan ngeihmi (quiet time) khi ka sau ter deuh I Pathian he caan hman tti hi a rak nuam ngai te. Kan hleng bak hna lo. Pathian bak hi cu a mak hrim ko, uar um tuk!

A sau bak cang I ka ngol rih lai. Mah tiang na rak rel ahcun kaa lawm. Internet a nuar bak I hmanthlak hi a lutmi poah ka tar ko.

Life in London #5 – Hmanthlak

Atu hi inn tlun ding ah Gatwick ah ka um i ka vanlawng cu a tlai ko hi ta, hngah ka huam lo tuk cu a si lo nain rawl ka ei ta lai ma ei ta lai lo ti kong ah a ka buai ter tuk. Hngah caan zong kha aa thlen peng tikah khan ka ca ma tuah lai, video ma ka zoh lai ti zong kha kaa laklawh, internet a ttha tuk lo. Kan hnu ka hawi nu pakhat he kan vah lio hmanthlak post lawlaw ning ka ti, a fe a ummi khua zong ka ruat kho lo.

Kan hnu ka post hnu khan cun kan umnak inn a dai tuk cang, ka hawi nu pakhat le keimah lawng kan taang. A kih ahcun ca tuah, ni khua a tthat ah cun hawi le he a leng chuah deuh si ko.

Chinatown hi ka uar tuk i mah karlak ah voi 2 ka va kal. Cun ka uar bik ve mi pakhat cu Kensington garden a si. Flo he kan rak kal lio ah cun spring a si i pangpar pawl an um i an i dawh tuk. Atu cu pangpar a um ti lo nain a hring ngai rih i an i dawh ngai. Dum chung i a ummi saram pawl khi minung an ttih lo tuk i nihchuak tuk an si.

Kensington Palace

Tawi te ka um, a cangmi a tam tuk lo nain, ca tuah ding a tam tuk i sau tuk a ummi ka lawh ter. Norway ahcun zarhpini dawr awn lo a si i zarhte ni ah khin kan herhmi kan cawk dih lengmang tawn. London ka phanh ka cu zarhte ni a phanh poah ah ka thluak nih zeidah cawk cia a hau ti pawl khi amah tein a tuak lengmang. Atu cu kaa ziak ngai i, an tap in a tlami ti hmanh kaa ziak cang. Ka phanh ka ahcun ka ding kho bak lo nain, Malaysia i tap ti bantuk khi a rim cu a si.

A zei si zongah semester pakhat cu a dih tthan ko cang. A tthami thil zong an dongh caan a phan, a chia mi thil zong an dongh caan a phan peng ko. A nuammi thil kan ton tikah a caan lio te lawmh zia le a nuam lomi thil kan ton tikah fim cawn kan i zuam a hau ko rua hih. Ok, ka thuk tuk, kaa celh lo. Rawl ei ding ka kawl ve lai.

Scala

Hmanthlak tam deuh post ka duh nain a nuar tuk i za rih seh.

 

 

2016 ah uar bikmi pawl – Best of 2016

Nuam cem ka timi (Favourite memory)

US tlawn lio hawi le he I ton

London ah hawi thar he I ton

Meeting my childhood friends in the States

Meeting new friends in London

 

Favourite city

Chicago <3

 

Single hnu kaa hammi (Crush)

Justin Trudeau (patung a si i phiat colh hau)

 

Uar Cemmi apps (Favourite apps)

 

Audible

Snapchat filter

 

Hman cemmi (uniform :D) Most used

RIP, Joni (Top Shop) 2014-2016
Discount ka ngahmi camera (Samsung NX3300)
No brand sunnies
This coat (Mah angki leng)

+ka lukhuh

Uar cemmi bia (Favourite quote)

Ttih hlah!

“ Fear not, there is nothing to fear´´ (Jesus)

“ Fear is a lie´´ (Hillsong Church- Central London)

 

Huam tharmi kong (new interest field)

Mipem kong (Migration/ diaspora study)

 

Nunnak kong ah fim a ka chim ngaimi (Life guide/inspiration)

Jesus

“ …´´ – a min ka chim ahcun nan hngalh dih lai

Gnash

Terri Savelle Foy

Kanu le kapa hi thil hmete an tuah zong ah an felfai tein an tuah timi hngalhnak

My new found knowledge/realization that my parents try their best in everything they do.

 

Uar cemmi cauk (Favourite books)

(Non-fiction)

The 7 habits of highly effective people (Steven R. Covey)

The 21 Irrefutable Laws of Leadership (John Maxwell)

The Lost Dictionary (Wim Vervest)

Fiction

Irrawaddy Tango (Wendy Law-Yone)

Cawn tharmi (Important things I learnt)

Fahnak nawl kan pekmi hna lawng nih an kan fah ter khawh.

An boah mi poah lung in cheh an hau lo.

Vui ke – sexy lo 😉 – Sonhtarhnak = excuse

(Palh hlan ah chim cia I timh lem lo i palh hnu ah sonhternak kawl khi ti bia)

Offenses do not affect you unless you take it. Don´t fight battles that don´t matter.

Excuses – not sexy.

 

Va ngeih a ka huam ter takmi nuva pawl

(Couples that make me want to get married)

  1. Kani Lynda Sung Tin le Thawngpi
  2. Cerku le Johan
  3. uTun le uSan
  4. Sungku le Ram
  5. Andy le Sonia (Youtube)
  6. Azi le Ivan Cung Chin (Nelson, NZ)
  7. Mary le Lunglung
  8. Hanna Yeoh

 

 

 

Life in London #4 – Bus cung khuaruah

London khuasik (Winter) aa thawkka nikhua hi ka uar ngai nak cu Hakha a ka theihter tuk caah a si. A nikhua rim khi mi lung a hliphlau ter tuk ka ti. Ka ngakchiat lio Hakha i khuasik zingka tution in ttin lei, ni tlan aa thawk hnik ka, dap tete an ti thluahmah, mi inn chak in meh kio rim hnimh pah, mah hi kaa thei peng. Ngaihchiat ngaih khi si lo in ruahtthan i a nuammi bantuk ngaih khi a si. November thla dih lai, December thla thawkka i ka lung a lengmi vial te a tlau dih. Inn ah rak ttin cang dawh a si, tukum a tangmi zarh tlawmpal te chung ah ca hmai 50 leng ap ding kaa ba rih nain ka lung aa nuam ngai.

Vah lai

 

Ka hawi le belte pakhat hnu pakhat an tlung thluahmah, hmai kum ah a kai rih ding pawl zong khual a tlawng, asilole, inn ah an ttin hna. Thlahnak zaanriah, thlahnak coffee, thlahnak tonnak a phunphun a tam ngai. I tthen le i thlah hi a hlan tluk in ngaihchia a si ti lo, lungfak zong a si ti lem lo. Phaisa le passport loin tan khawh lomi ramri nih cun mi tampi cu an kan donh rih ko, nain a hlan nak in cun itlawnkai cu a fawi deuh hrimhrim ko.

The Shan State, Burmese restaurant

Tu semester ah ka degree program he aa pehtlai bak lomi ka lakmi cu English Literature class a si. Cauk pakhat kan rel poah ah a ttialtu (a thi rih lomi an si ahcun) an kan sawm piak. Sawmmi khi phaisa tam an pe hna hnga maw ti ka ruat ngai, ka hawi nu pakhat nih cun an pek bak ko hna lai tiah a ruah i ka zumh ngai. Atu mah ka ttial pah ahhin ziah kan lecturer nu ka hal ko hnga lo ti ka ruat. Cu lo ah cun, SOAS an cachimh dan hi keimah hmuh tawk ahcun, hawi hlei tampi ttha a si lem lo, brand deuh khi ka lawh ter.

Russell Square – sianginn tlai ter tawn tu lamtan

Norway kan sianginn hi vawlei cungah cun a min hngalh theng lomi si <sorry>, SOAS cu mi tam deuh nih hngalhmi a si. Nain, keimah cawnmi program he pehtlai in keimah pumpak hmuh ning ah cun ca chimh dan quality aa dang bak lo. Undergraduate cu aa dang deuh ko, Norway lei hi ka theih tawk ah tutorial a tlawm deuh. Nain postgraduate ah cun aa lo ngai, Norway sianginn kha cachimh man a um lo i SOAS hi a man a fah tuk lawng khi a si ko. Cauk belte cu tampi an ngei i Nichuahlei (Asia), Middle-East le Africa cawnnak le holh a uarmi ca hrim ahcun a ttha tuk.

China Town

Phaisa liam hau loin sianghleirun kai khawhnak ram ah a ummi si hlah ning law keimah tein sianginn ka kai ter kho lai ti ka zum lo. Atu tiang nu le pa nih bawmh rihmi ka si. Nai USA ka kal ah ka hawi le rianttuan buin sianginn a kaimi ka hmuh hna ah ka upat hna ning hi. Ka lung zong a fim dih deng. Kei rianttuan pah in cun anmah bantuk in ca ka chei lai ka zum lo. Pathian nih ka zia a theih i Norway ah a ka kuatmi a rak si ko rua khah. Mah zong nih in Pathian ka uarnak a karh ter chinchin.

 

 

Life in London #3

I hngalh lo karah November thla a dih hoi ko hi ta. Norway cu a kik pah cang rua, nain London cu 7 degrees Celcius hrawnghrang a si tawn i thli a hran lo ahcun um a nuam tuk rih. Zaanlei 4pm hrawng ah ni a tla i ni a tawi khun mi belte a lo. A huap pi in chim ahcun siangngakchia caah cun atu lio hrawng hi cu camipuai lai a si caah a nuamh lo lio ngai a si. Inn, nu le pa, chungkhar, hawikom, tlangval/nungak ngaih tak caan a si kan ti ko lai.

Big Ben

Cun Lai rawl ka ngai, kawl rawl zong Norway rawl zong ka ngai ko. Inn chuanmi rawl ka ngaih bia a si ko rua khah. Rawl chuan ka thiam ko nain bel chin, sum, tbk. ka ngei lo. Laimi le kawlmi ka hngalhmi an um ko, rawl ei zong an kan sawm ko nain kan umnak aa hlat pah i an inn tiang va kal i ei ding in khin cun ka ngai ti a si lem lo.

Lai rawl kong chim ah, kan hnu zarh ah khan Thawngpi he kawl biakinn ah kan va i pum. Mi tlawm te an si, an zia ttha, mi chawnh an thiam. Laimi zong an um, kawl mintami a rak ttuanmi Hnin Wutt Yee Thaung timi zong kha kaa cun aa pum ve. A hlat ngai i zarh fatin te kal ci khi cu a si deuh lo, a hlatmi cu a poi lo nain bus le tlanglawng le ke i thlen pah lengmang a hau.

Myanmar Christian Fellowship

English literature class pakhat ka lakmi a um i mah ahcun ca ttialtu Wendy Law-Yone (kawl a si) an sawm i mah cu November thla a nuamh tertu a si. Kan class a rat lio ah ka chawn manh lo nain a hmai zarh ah khan sianginn ah biazai rel (Poetry reading) a um i mah ah cun a ra ve i mah ahcun ka chawnh khawhmi a si.

Kawl biazai a ttialmi Maung Day timi kha an sawm. Biazai rel dih in khan professor pa le mileng cheukhat he student bar ah kan kalpi hna. Wendy cu ka tlaihchan tuk phun a si, ka bestfriend cu Laimi pei a si cu a ti, aalu kyaw an kan cawkpiak. Maung Day nih Anna Biak Tha Mawi hen an i thei maw a ka ti i kan chungkhat si ka ti. A si le si lo ka hngal lo nain a hrihhram kawl ahcun kan si ko lai ti phun in. A biazai pawl cu mirang ca in a rel ko nain ka lung a fiang set lo, biazai cu mirel mi ngaih in chim lo, keimah tein ka rel hmanh ah ka lung a fiang colh lo. Kawlram i ethnic miphun pawl kawl biazai ah zeitin an cuan timi kong ceihnak an tuahmi belte cu a ngaih a nuam ngai ka ti.

 

Hman ka thlakmi a um len ko nain nawl hal a buaithlak tuk i ka tar duh lai lo mu

 

Cu lo ahcun ca tuah a si lo le ca tuah ding kong ruah i stress in caan hman a si ko. November thla dongh zaan belte ahkhan kan hawinu pakhat kha American a si i thanksgiving dinner an kan tuahpi. Rawl chuan a thiam tuk i hika ka phanh hnu ka eimi lakah a thaw bik bak a si.

Pumpkin pie
Sara´s pecan pie
Dinwiddy Kitchen

Ka nunnak ah Pathian nih a tuahmi thil a ttha tuk, kaa lawm tuk, phunzai ding ka ngei bak lo. Nain seihkuyin cio chim uh ti sisehlaw cu a lumnak le niceu tampi a umnak ah tlawn ka duh. California kal nih a ka hiar lio a si, palm tree le banhla kung pawl a ummi khi ka uar. Bali zong okay ko lai. Khual tlawn pah in cun sianginn nih thim piak lomi mah tein i thimmi cauk rel lawng rel siseh law ttial le phit hau hlah sehlaw a relmi vialte camipuai awn ter pin ah khualtlawnnak a dihmi vialte liam piak dih siseh.

 

 

Life in London #2

Kan hnu zarh cu sianginn nih mah tein carelnak caan an kan pekmi zarh khi a si, mi cheu nih cun essay a tum pipi ttialnak caah an hman nain a cheu caah cun i dinh caan, a si lo ah vah caan, khualtlawn caan ah kan hman. Kei kha Norway in ka hawi le an ka tlawng i zarh khat chung kan vak. Nikhua a kik pah i ke in vah a nuam ngai. An kir ni belte cu inn ka ngai bantuk in ka um.

Zarh khat chung kan tuahmi lakah ka lung ah a taang bikmi pakhat cu Queen Elizabeth Olympic park i a ummi ArceloMittal Orbit tolhnak i kan tolhmi a si. Meter 178 a sang mi cung in ngerh 12 a ummi pipe chungin second 40 chung tolh a si.

ArcelorMittal Orbit @Queen Elizabeth Olympic Park
ArcelorMittal Orbit @Queen Elizabeth Olympic Park

Keimah tein ticket i cawk in ka tolh ding phun cu a si lem lo hen ta. Zei ruang ah dah ka ttih ti ahcun a pipe kha zohnak ah a hme tukmi a lo, aa ngerh tuk i nan tolh lai an kan ti ka ahcun capo ah kan rel. Helmet he ban danh he pher cungah ih in tolh ding in minung pakhat tete in an timh thluahmah mi ka hmuh cun ka chung thahri a ther thluahmah. Genting highland tbk. pawl ah kan i cit mi bantuk he aa dannak cu pakhat te lawng in tolh a ngah pinah, pipe chung a si caah a muih caan a tam tuk.

A hme te alomi a raangmi pipe chung tein khin tolh a si
A hme te alomi a raangmi pipe chung tein khin tolh a si

Mahka ka kalmi cu Norway mi study tour a tuahmi he kan si. Thaku le Kip an kaimi course a si i an study leader pa (Sveinung) a zia tthat ruangah a ka tel ter ve bia khi a si. Minung 13 hrawng kan si i mah lakah Kip le keimah tolh kan ttih bik.

Sveinung bia ruang ah ka tolh tiah chim khawh a si. A chimmi cu, kan nunnak ah (le Pathian rian kan ttuan tikah) muih caan, zeihmanh kanmah minung sinak in kan control khawh lo caan, harnak caan kan phanh caan a um cio lai. Kan minung sinak in kan thilti khawhnak a dih cikcek caan, kan chungkhar, hawi le bochan awk an um lo caan  kan phanh tik i Pathian lawnglawng bak kan ruahchannak a si caan a phan te lai. Mah bantuk caan ah Pathian i bochan thiam kha an kan teh (experience) termi a si ko rua khah.

Hika park tthiamtthiam ah a um @Stratford
Hika park tthiamtthiam ah a um @Stratford

Tolhnak hi a ngerh tuk nak ah hin a caan caan cun a tung hoi hna in `vuk´ tiah ka tlak caan a um. Kaa hmahthahmi a hman ahcun nazi pakhat ah meng 15 zat in a tolh, a raang tuk cu a si lo. Pipe a thlam a langhnak ahcun a ceumi hmuh khawh a si. Cu lo ahcun a mui. Minung kan khuaruah dan a ran ning khi mu, khua tam tuk ka ruat manh.

Keimah pumpak in cun ka ttih tik ah ai ka ziak lo (ka hmang lo),  ai tikah tihnak a zual rua ka ti. A si khawh chungin Pathian a um ko timi theihnak in relax kaa zuam ah a sia a rem bik in ka thei.

Queen Elizabeth Olympic Park
Queen Elizabeth Olympic Park

Na tolh tthan ti lai maw ti ah cun ka tolh tthan theng lai lo, nain ka tolhmi kaa lunghmuih tuk . Tih tukmi tuah kha ral tthat taktak a si ti cu ka hngalh peng nain a si khawh ahcun siaremnak ah um, ttihnung lomi tuah hi i thim a fawi ngai. Nain ttihmi pah thluahmah hi tthannak a va si ko rua khah. Ttihnak hi hlennak a si (Fear is a lie) timi bia hi nai hrawng ka thei ngai, phungchim zong ah, sianginn zong ah, adangdang zong ah. Mah bu ah ka ngamh rih lomi, ka pah ngam rih lomi a um len ttheo ko. Nain a hlan nak in ttihnung mi pah hi ka sia a rem ter deuh ko lai.

Life in London #1

Ka chuahka in ka hmanmi October vialte lakah tukum hi kaa manh lo bik bak a si. London ka phanhnak thla 1 a tlin manhmi zong ka hngal manh lo, nizaan tihni ah ka hawi le cheu khat he rawl kan va ei tti i minung pakhat nih a chim hnu lawng in a si khe kan ti.

Kan hnu September 25 zaan ah khan London ka phan. Phanh ka in zarh 2 chung cu donnak ah kal, tonnak ah kal, biaruahnak ah kal, ti phun lawngte si. Ca cawn thawk bak in cun relding le ttial ding nih an kan nenh colh, Norway i ka sianginn ah ka zulhmi course a um hoi i kan buai ko cu ta. Ka mang tiang ah khin ca ka print. Nizaan in khan cun aa rel deuh cang, ka control thiam deuh cang.

SAMSUNG CAMERA PICTURES

 

Kan sianginn hi University of London tang ah a ummi pakhat a si i kan campus cu a hme te a asi, hngalhmi he i ton peng phun khi. Social science a cawngmi lawngte chiahnak a si i huammi aa khat mi deuh lawngte kan si biaruah a fawi. I hmuh bal lo mi he zong hlei cung ah tthut in chuncaw ei tti i bia sau tak i ruah khawh phun khi si. A lumsa ngai. Zei ruang ah dik security nih an cawngh tuk. Norway ah mah bantuk ka hmu bal lo i ka khuaruah a har ngai. Ka inn in minute 20 hrawng kal a si.

SAMSUNG CAMERA PICTURES

Ka room cu lamka lai a hoihmi bak khi a si i hna a chet ngai. Norway he aa dang tuk nain atu cu kaa ziak cang. Ihnak khaan, zumput le tikholhnak aa ttuaimi kha thla khat ah pound 600 kan pek. Coka pakhat minung 6 kan i hrawm. London ah inn man a fah biknak zone (Central London) ah a si i student umnak si hlah sehlaw mah tluk hin aa deng lai lo. Eidin man cu aa deng ngai ka ti, Norway he tahchun in cun. Bel pakhat ka ngei i chuan/kio a haumi vialte mah in cun hmin ter dih a hau, a pan ngai i zei ka kiomi poah an kaang peng. Ka duk ttha i aa rel. Kawl biakinn a um nain a hlat pah i ka kal rih lo. Hillsong ah kaa pum tawn, ka inn he aa naih i mu.

Hillsong Church @Central London
Hillsong Church @Central London

Ka inn in minute 5 hrawng kalah British Library a um i mah ka ah cun mirang ral chanah Laitlang ah a rak ummi Major A.G.E Newland nih Laimi hman a rak thlakmi original a um tiah Wim Vervest nih Laimi kong a ttialmi cauk (The Lost Dictionary) chung ahkhan a telh  i mah va zoh cu kaa ngaih.

SAMSUNG CAMERA PICTURES SAMSUNG CAMERA PICTURES

Kan hnu ka kal ah khan an chiahnak room luhnak ah card i tuah a hau i ka passport kaa ken lo i ka tuah kho lo. Ningzak a si mi cu Laimi tuanbia a hngal pah cang ding tthi ka si nain ka hngal lo ngai. Hngalh a hau tiin zoh le rel ka duh bia theng si lo in nai hrawng hi hrihhram tlaihchan tuk phun in kaa la kan ti ko lai. Newland cu Laica a rak kan serpiak hmasa tu pakhat a si ve i Hakha nu he aa um mi kha a si. Ca ttialtu pa Vervest cu Newland te chungkhat a si i, Laimi an chungkhat pawl a ttialmi hna ah ka hawi le an um len i mah te hmanh in cun a ca ttialnak caah research tam tuk a tuahmi ka lawh ter cang.

14915503_10157626733690263_762610007787456079_n

American missionaries pawl a critic dan kong tu ah cun chim ding ka ngei len nain atu post ahcun ttial kaa tim lo. Rel phu tuk a si, ttha tein a study mi a fiang, ka uar ngai.

Tutan cu mah vial!

A voi 2nak eidin hmanthlak/ Food of America 2

Nili ni phanh hi a nuam tuk ka ti. A ra laimi ninga ni le weekend donnak ah a tangmi eidin hmanthlak pawl kan zoh hna lai mu? US lio ta tthiam a si rih ko, ka lim kho bak rih lo :D. Thil dang kong ttial ka duh cang nain a ka doh, fim ka duhmi memory pawl a tlawt lai ti ka phang i si. OK! Hmanthlak deuh in si rih seh!

Number 10 a si lai cu ti?

Kapa Stanley pa danpauh
Kapa Stanley pa tuahmi danpauh @ Frederick, Maryland

A thaw bak. Kanu Law (Stanley nu) nih dessert ah shweyinaye a tuah i a thaw tuk hoi i a tuah dan ka hal len. Ka tuah chun te lai i a chuah ahcun kan bu ngakchia pawl ka tuah piak te hna lai ka ti.

11.

Shweyinaye
Shweyinaye

12. A thaw tuk ka ti nain Huppi nu chimnak ah cun an biatak an chuah rih lo, ti si ;).

Ka u Iangku le Huppi nu chuanmi
Ka u Iangku le Huppi nu chuanmi

SAMSUNG CAMERA PICTURES

13.

Kuate le Lianlal danghmi sushi
Kuate le Lianlal danghmi sushi

A tam ning le an i dawh ning bak cu, an rak put bak khin ka ril pawl an laam thluahmah.

14. Mah hi New York ah Espen te he kan eimi a si i a thaw tuk i kan lau ngaimi a si. Ziah kan lau ti ahcun a thaw lai ti kan ruat tuk lo i a si. Asian a si lomi hawi le he khualtlawn tti tik i buai pah tawnmi cu zeidah kan ei hna lai timi khi a si i mah te hin cun kan lung aa tong ngai hna. Texas grill timi a si i Chelsea ah a um.

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES

15. A Zing cahmi shan khohsuai a si (ko rua) i a mui tluk cun a thaw lem lo. Aa dawh tuk i post ve bia!

SAMSUNG CAMERA PICTURES

Eidin kong he pehtlai in cun za pah rih ko sehlaw, aw… a zat hlan deuh te ah, pakhat a pam tuk ka timi cu kawlrawl hi a langhlat in ka mit a thi tuk tawn, ei zong kaa ngaih tuk. Nain nai khual ka tlawn ah kawl rawl a tam ngai nak Indiana ka phanh ahcun khuadang i ka ei ciami pawl kha a rak tam tuk cang i ka paw nih a chei ti lo. A chei ti lo ti tikah, na ei ti bak lo maw ti ahcun ei ko hen ta, nain ka system nih a thawt dan a lung a fiang theng ti lo. Mah cu a pam ka timi a si :D.

US i hman ngaimi chaphiat pawl belte kaa ziak lo ngai, kutttawlnak, khengttawlnak, ti pawl khi mu. Ka kut a ka ei dih; nai ah Caroline nu he chaphiat kong kan ceih i acid aa tel i a si hnga maw a ti, Norway ah chuahmi ahcun acid telh an khap a ti. Ka thei bak ve lo. Nain, mah post hi cu za rih seh law!

Eidin Hmanthlak Pawl/ Food of America – Part 1

Nai hrawng cu thil a cangmi a tam tuk i ka blog ka hmuh lo nak zong a sau, ka pc ka on lo nak zong a sau. Atu nai te ah ka van lut i ka on lo kar ah voi 230 log in an timh ruangah wordpress nih a rak block hna timi report ka hmuh i ka lau hoi ning cu. Website saupi a zohkhenh cangmi caah cun khuaruah har a si men lai lo nain keimah bantuk website a host ka mi caah cun lau a um ngai. Nai ah ka bank/credit card fir (fraud) aa mih hoi i ralrin felfai ngai phun in ka um lio a si cuh. Mah kong cu hnu deuh ah. (Atu cu okay cang!)

Tuan deuh post kha dawi u sih ti ahcun New York diary peh a hau hnga. Nain mah in khan chikhat i din ta hna u sih law, eidin post hna u sih tiah, mu? Blog lum ter tthan nak ding ah eidin hmanthlak zoh hi a nuam ti bia. Khual tlawn i pakhat khat ei lai poah ah hmanthlak cu si cio nain hlonh an tong peng i hika tal ah hin fim hna u sih. USA ah thlakmi lawngte an si.

1.

Chinchin´s Sticky Rice with a little bit of this and that @Indianapolis
Lai Dawr @Indianapolis

2.

BBQ @ Neihneih te inn (Indianapolis)
BBQ @ Neihneih te inn (Indianapolis)

3.

can´t remember
Pengpeng le Aanu te he kan kalnak buffet dawr (buffet for 10 dollars!!!) @Indianapolis

4.

Chinatown @Chicago - A eimi nak in dawr hngaktu an tam deuh :D
Chinatown @Chicago – A eimi nak in dawr hngaktu an tam deuh 😀

5. A mui bang a si bak lo mi Chicago i Korean rawl dawr (a thaw theng lo ti nak)

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES
Mah te hi cu a thaw

6.

Kanau aTluang BBQ sauce @Indianapolis
Kanau aTluang BBQ sauce @Indianapolis

7. Dingdi Laidawr @Lewisville, Texas

SAMSUNG CAMERA PICTURES
Sacek le zei le zei dik cawh
SAMSUNG CAMERA PICTURES
A thaw bak!

SAMSUNG CAMERA PICTURES

SAMSUNG CAMERA PICTURES
Ka lung a fiang bak lo nain a thaw ngai

8.

Tialmi le Bawi le Moses he kan kalnak Japanese dawr @Lewisville (?) An portion a ngan bak!
Tialmi le Bawi le Moses he kan kalnak Japanese dawr @Lewisville (?) An portion a ngan bak!
Mah zong thaw!
Mah zong thaw!

9. Sang Chep danghmi lunch @Blue Fish Jayjay ttuannak (ka ei dih i an lau pah cio!)

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES
Aa dawh tuk i ka ttap hnik!
SAMSUNG CAMERA PICTURES
Ei sian zong an si bak lo nain …
SAMSUNG CAMERA PICTURES
Ka khimmm tuk cang nain a ra thluahmah ve ko i rawl nganh duh lo ah ka ei thluahmah ve ko
SAMSUNG CAMERA PICTURES
Cerku le Sang Chep he kan ei ti a si ko nain keimah deuh nih ttuanvo ka lak ko hna.

SAMSUNG CAMERA PICTURES

SAMSUNG CAMERA PICTURES

SAMSUNG CAMERA PICTURES
Mah hlan deuh te ah hin Lai dawr ah pe puri pahnih kan va ei ta chap. Zaan 12 tiang bak an taang ve hen ta.

A taang rihmi cu post dang in taar a hau lai, ka pc a ttap tuk cang. Part 2 ra te lai mu…!

Thaizing pumh nuam!

 

 

Songs that bring back memories – No. 2

Mirror (Justin Timberlake)

Nai ah khan Kungkung nih mah bantuk hi ttial rih a ka ti i ka lung a chuak tak i ka rak ttial. Cazoh liomi ngol i mah bantuk kong ruah hi a nuam tuk ka ti cuh. Zei bantuk celebrity hmanh hi tam tuk in uar ka hmang bak lo, ka lung a fim hnu in ti bia mu. Taang 9 ka kai lio cun Westlife kan rak uar tuk hna i voi khat cu an thi, ti bak khi a thang i ka hawi le he kan rak ttap pah. Hakha ngai te khi ka ti, an thi, ti phun le, an tli ti phun bia a um kho peng. Ngaih a um ngai. Chim ka duhmi cu ka lungfim hnu kum 19 hna ka tlin hnu in ka bizu ah a hmanthlak ka tar ngam bak mi cu Justin Timberlake a si, bizu kutka a chung lei ah, atu ahcun ka ningzak tuk cang. Aho hmanh chim hna hlah u law tiah.

I, mirror cu 20/20 Experience timi album chung in a si i a chuah hi 2013, March 15 hrawng a si. Mah hi Uni kum 2nak, semester 4 ka kai lio a si i Sydney, Australia ah exchange ka tuah lio a si. Mah semester hi kaa nuamh bik pakhat a si ve. Australia cu March thla hrawng in an thawk i January le February khi cu korea zatlan he mithli he kaa ciah. Ca tuah ding phunphai um lo a nuamh ve ning hi ka ti, ka ngai bak. February 20 ah Sydney ah keimah te lawng ka va zuang. Tlawmpal cu mirror cu a chuak ko hen cu.

248448_10151191794138728_1213099616_n
Sydney Opera House

Na hawi le ah khin hla pakhat nih a suai cang ahcun aa nolh pengmi, huat a tlai ngai mi khi an um ahcun, mah bantuk cu ka si. Ka ngaih tuk nak ah hin ka hawi le nih keimah he ttuai in hmahthahmi hla ah aa cang thai. Hla dang zong cu ka ngai ko e, nain ka hla meilah a si. Amah orginal lawng hmanh si lo in an cover mi kip khi ka ngaih dih. A lyrics khi ka thiam sual lai ti ka phang (hla ka thiam ngai hnu cun ka ngai huam tuk ti lo) i a ret in kaa ret.

Sydney ka um lio kaa nuamh ning khi khuaruahhar bak a si, nikhua zong a ttha peng, anmah lei khuasik a si i keimah caah cun a za bak a si. Annih lei cu rawl dawr a tam tuk fawn khi mu. Holiday bak a lo peng. Ei ka tthawn rih ning hi loh bak khi si i ka hawi le zong keimah bantuk lawng te an si. A sawng bantuk ah khin ah um tti, ei tti a si i kan i kom tuk hna. Ihnak khaan lawng khi mah tein ngeihmi a si i a dang poah cun kan i hrawm. Zaan ttim zong ah burger ka haw tuk ti phun a si ahcun a rak haw vemi an um peng. Nihchuak tuk a si. Drama zong a tam tak, hawi an tam tuk i bia phuntling kan thei i Korea zatlan peh bak khi a si ko. Norway lei cu mikong ceih kan huam lo i drama um lo.

 

Dawt Ttha te inn bbq lio
Dawt Ttha te inn bbq lio (Melbourne)

Ka rak kal hlan ah khan cun Australia ka phanh ah cun ka work-out (exercise) lai i ka thau vial te ka thlau dih lai ti bak khi ka si. Kan sawng ah khin gym a hme te, free in i celh khawhmi a um cuh. Kan phanh ka, ka lung a thawh tak lio ah minute 4 bak te ka til i calorie 17 ka khangh i kaa ngol thai. 3 kilos a hlei he ka rak kir, mah hmanh cu ka vah tuk caah a si i a sawng ah i benh ning law cu mah nak tam deuh he ka kir hnga.

Thawhtthan (Easter) cu Melbourne ah ka va tlawng i ka hawi le 3 kaa phorh hna cuh. Kan chungkhat pawl nih an kan dawt tuk i ka hawi le cu Laipa kan va lai ti lawng te an si dih i mah kong cu voi tam ngai ka chim cang i ka ngaithiam ko uh. Sydney ka va um in hin Lai community a sunlawinak tam tuk in ka lung a va fiang i a si.

New Zealand ah kanu te le ka va tlawng hna i kaa nuamh ning le ka nih a tam ning hi. Nelson ah khan a si i an khua hi Hakha a lo tuk i ka uar tuk, Hakha a thiang phun kan ti ko lai. An khua hrawnghrang kha Lord of the ring an i thlaknak cu a si i ka nau le pawl an i uang tak, an ring an sernak kha anmah khua ah a um cuh. Zingka i dap tete a um dan le tlang tete a um dan khi Hakha a lo ka timi cu a si i, Ed Sheeran hla, I see fire, kha ka ngaih fatin Nelson ka ruat i ka khuasik saisem a chuak.

1052913_10152979510050263_1512353809_o
at Centre of New Zealand (New Zealand hi aa cheu cu mu, hika Nelson hi NZ i a lai bak te a si

Wellington ah suimilam tlawmpal te ka um nain an khua a ummi ka hawi le nih an khua tlang an ka kai pi manh i kaa nuam tuk. Museum pakhat zong kan zoh manh i mah ka ahcun Norway mi chungkhar phakhat he kan vai i tong chap. Wellington in Perth ah kanu te le sin ka va tang pah. Kawl dawr a ummi khi a nuam tuk ka ti. Perth in ka tlun lai hrawng cu mawttaw radio ah Naughty boy le Sam Smith hla, La la la, kha a ra peng i atu tiang mah hla ka theih ahcun Hannah lawng te ka mitthlam a cuang. Ka rak tlun bak in Sungku te puai a si i, we can´t stop bak kha a laar tuk hoi i mah hla ka ngaih ahcun Thatha kaa thei tuk hoi i hi post caah hin cun za pah rih seh.

2013 March in July lio hrawng ah kan hmuhtonmi ka hawi le chungkhat le vialte kan ngai tuk hna e <3 .

Ka tlun lai ah ka tta a thin hung @Perth <3
Ka tlun lai ah ka tta a thin hung @Perth <3