Mipem nu le pa sinah chim ka duhmi pakhat

Ca ka ttial lonak a sau ning, a ngaih zong ka ngai. March thla hi blog ca ttial u-sa ka pe kho hrim lo. Caan hi hman thiam ahcun cazohnak caan zong a um ko, blog ca ttialnak caan zong a um ko, pumcawlcanghnak (exercise) tuahnak caan zong a um ko i biakinn ah mino cawnpiaknak kal caan zong um ding khi a si ko. Nain zeiti in caan tthen kan thiam zong ah kan lungthin hi duhnak lei poah ah, duh caan poah ah mer khawh hi a har ngai. Ca ka zoh cang lai ti bakah kan lung hi khoika a kal nak poah in cauk cung ah phan colh seh law cu zeizong vialte caan khat ah kemh hi a fawi deuh ko hnga.

SAMSUNG CAMERA PICTURES
Kanu @Camera test

Thil dangdang tete, a leng lei in van zoh tik i van tenh awk le caan van pek awk ah a har ding a lo bak lo mi zong hi nifa tin ca zoh a herhmi sianghngakchia caah cun tenh a har. Mah thil dang tete tuah khi a har le caan a la ti a si lo nain lungthin a lakmi hi ka chim duh bikmi cu a si. A biana ah kan thluak ah hin kan rian pakhat cio khi khaan pakhat cio ah a um tiah hei ruat hna u sih. Tuzarh ah subject aa dangmi pahnih ah ca ap ding um veve seh, kapa nih rian soknak ca ka ttial ter seh, keimah nih rian sok ding pakhat ngei ning: ka thluak ah a tlawm bik khaan 4 kha caan caan khat ah a cawlcang (active) cang. Rian soknak pakhat ka ttial ah ni cheu rau ning, essay ap ding pakhat ka ttial ah ni 2 rau ning, ni 5, lo mei? Midang caah cun ka thei lo, nain kei cu ka lungthin hi ka duh caan poah ah ka duhmi poah ka tuak ter kho lo i mah cu a poi nak a si. Nihnih ni a si i mah subjecti i mah essay kha ttial, ka ti kho bak lo. Nizaan ta kha a duh ahcun a tuak ko. Mah caah cun hi rian vialte tuahnak ah ni 5 ka zaa ti top a ngah lo. Ka thluk chung i khaan khat cio i rian pawl kha a har lomi zong an si ko lai, nain khaan khat luh cang hnu i adang khaan van peh colh kha a har ka timi cu a si.

SAMSUNG CAMERA PICTURES

 

Mah ruang ahcun siangngkchia nan fa le rian nan fial tik hna ah a fawi ding te a lo ko nain an in tuah piak khawh hna lo ahcun ngeihchiat thinhun ding a si bak lo. A herh lomi thil dang (youtube, game, ttamh) cu an kemh ko cu ta, nan ti men lai. An kum rup, an tthi rup in uarmi a si rih ve caah theihthiam piak cu a hau. Nai ah kan biakinn thawhtthan sianginn khar ah mino cawnpiaknak an kan tuah piak i nu le pa le fale karlak pehtlaihnak kong kapu Ceu (Rev. Ceu Mang) nih an kan ceihpi. A cunglei ka chimmi ruang pawl ah kei cu ka kal kho lo nain zarhte ni ah an i ceihmi tampi ka hawi le nih an ka chimh ve caah mah kong hi ttial ka lung a chuahnak a si.

SAMSUNG CAMERA PICTURES
Dora

Mipem kan si caah kan nu le kan pa pawl hi holh lei he aa pehtlaimi ah mino deuh nih bawmh kan herh hna ti hi hawi sin a chuak lang deuhmi mino nih cun an lung a fiang ko. Holh thiam lo buin mi ram ah nan kan pem pi i fa le caah ralttha tuk i zei rian poah nan lak i nan kan cawm, nan kan zohkhenhmi hi a lung a fiang rih lai lo tiah nan ruahmi mino tete zong a lung a fiangmi an tam tuk. Zeitin dah ka hngalh ti ahcun mino he rian a ttuanmi ka si caah civui, mino tonnak timi ah hi bantuk tete hi kan ceih lengmang tikah, a ngakchia deuh rih i an ruat rih lai lo ti ka ruahmi zong nih an nu le an pa nih an tuahpiakmi zeitluk in dah an i uan ti mi an chimmi ka ngaih tawn caah a si. Mino kan si i mah bantuk khi kan chim tuk lo i a si. Kan nu le kan pa hi kan in uang tuk hna. Nan thei lo i a si. Zeizat phaisa nan ngeih i zeizat nan rum kha kan ti mi a si lo i nan rak umnak dirhmun in zeitluk in dah tthancho dingin nan tuah khawh ti le nan ral a tthat dan le nan i zuam dan khi kan i uang ka timi cu a si.

Kan fa le nih zei a kan rel lo ti ruat hrim hlah u. A hman lo.

 

 

 

Songs that bring back memories – No. 2

Mirror (Justin Timberlake)

Nai ah khan Kungkung nih mah bantuk hi ttial rih a ka ti i ka lung a chuak tak i ka rak ttial. Cazoh liomi ngol i mah bantuk kong ruah hi a nuam tuk ka ti cuh. Zei bantuk celebrity hmanh hi tam tuk in uar ka hmang bak lo, ka lung a fim hnu in ti bia mu. Taang 9 ka kai lio cun Westlife kan rak uar tuk hna i voi khat cu an thi, ti bak khi a thang i ka hawi le he kan rak ttap pah. Hakha ngai te khi ka ti, an thi, ti phun le, an tli ti phun bia a um kho peng. Ngaih a um ngai. Chim ka duhmi cu ka lungfim hnu kum 19 hna ka tlin hnu in ka bizu ah a hmanthlak ka tar ngam bak mi cu Justin Timberlake a si, bizu kutka a chung lei ah, atu ahcun ka ningzak tuk cang. Aho hmanh chim hna hlah u law tiah.

I, mirror cu 20/20 Experience timi album chung in a si i a chuah hi 2013, March 15 hrawng a si. Mah hi Uni kum 2nak, semester 4 ka kai lio a si i Sydney, Australia ah exchange ka tuah lio a si. Mah semester hi kaa nuamh bik pakhat a si ve. Australia cu March thla hrawng in an thawk i January le February khi cu korea zatlan he mithli he kaa ciah. Ca tuah ding phunphai um lo a nuamh ve ning hi ka ti, ka ngai bak. February 20 ah Sydney ah keimah te lawng ka va zuang. Tlawmpal cu mirror cu a chuak ko hen cu.

248448_10151191794138728_1213099616_n
Sydney Opera House

Na hawi le ah khin hla pakhat nih a suai cang ahcun aa nolh pengmi, huat a tlai ngai mi khi an um ahcun, mah bantuk cu ka si. Ka ngaih tuk nak ah hin ka hawi le nih keimah he ttuai in hmahthahmi hla ah aa cang thai. Hla dang zong cu ka ngai ko e, nain ka hla meilah a si. Amah orginal lawng hmanh si lo in an cover mi kip khi ka ngaih dih. A lyrics khi ka thiam sual lai ti ka phang (hla ka thiam ngai hnu cun ka ngai huam tuk ti lo) i a ret in kaa ret.

Sydney ka um lio kaa nuamh ning khi khuaruahhar bak a si, nikhua zong a ttha peng, anmah lei khuasik a si i keimah caah cun a za bak a si. Annih lei cu rawl dawr a tam tuk fawn khi mu. Holiday bak a lo peng. Ei ka tthawn rih ning hi loh bak khi si i ka hawi le zong keimah bantuk lawng te an si. A sawng bantuk ah khin ah um tti, ei tti a si i kan i kom tuk hna. Ihnak khaan lawng khi mah tein ngeihmi a si i a dang poah cun kan i hrawm. Zaan ttim zong ah burger ka haw tuk ti phun a si ahcun a rak haw vemi an um peng. Nihchuak tuk a si. Drama zong a tam tak, hawi an tam tuk i bia phuntling kan thei i Korea zatlan peh bak khi a si ko. Norway lei cu mikong ceih kan huam lo i drama um lo.

 

Dawt Ttha te inn bbq lio
Dawt Ttha te inn bbq lio (Melbourne)

Ka rak kal hlan ah khan cun Australia ka phanh ah cun ka work-out (exercise) lai i ka thau vial te ka thlau dih lai ti bak khi ka si. Kan sawng ah khin gym a hme te, free in i celh khawhmi a um cuh. Kan phanh ka, ka lung a thawh tak lio ah minute 4 bak te ka til i calorie 17 ka khangh i kaa ngol thai. 3 kilos a hlei he ka rak kir, mah hmanh cu ka vah tuk caah a si i a sawng ah i benh ning law cu mah nak tam deuh he ka kir hnga.

Thawhtthan (Easter) cu Melbourne ah ka va tlawng i ka hawi le 3 kaa phorh hna cuh. Kan chungkhat pawl nih an kan dawt tuk i ka hawi le cu Laipa kan va lai ti lawng te an si dih i mah kong cu voi tam ngai ka chim cang i ka ngaithiam ko uh. Sydney ka va um in hin Lai community a sunlawinak tam tuk in ka lung a va fiang i a si.

New Zealand ah kanu te le ka va tlawng hna i kaa nuamh ning le ka nih a tam ning hi. Nelson ah khan a si i an khua hi Hakha a lo tuk i ka uar tuk, Hakha a thiang phun kan ti ko lai. An khua hrawnghrang kha Lord of the ring an i thlaknak cu a si i ka nau le pawl an i uang tak, an ring an sernak kha anmah khua ah a um cuh. Zingka i dap tete a um dan le tlang tete a um dan khi Hakha a lo ka timi cu a si i, Ed Sheeran hla, I see fire, kha ka ngaih fatin Nelson ka ruat i ka khuasik saisem a chuak.

1052913_10152979510050263_1512353809_o
at Centre of New Zealand (New Zealand hi aa cheu cu mu, hika Nelson hi NZ i a lai bak te a si

Wellington ah suimilam tlawmpal te ka um nain an khua a ummi ka hawi le nih an khua tlang an ka kai pi manh i kaa nuam tuk. Museum pakhat zong kan zoh manh i mah ka ahcun Norway mi chungkhar phakhat he kan vai i tong chap. Wellington in Perth ah kanu te le sin ka va tang pah. Kawl dawr a ummi khi a nuam tuk ka ti. Perth in ka tlun lai hrawng cu mawttaw radio ah Naughty boy le Sam Smith hla, La la la, kha a ra peng i atu tiang mah hla ka theih ahcun Hannah lawng te ka mitthlam a cuang. Ka rak tlun bak in Sungku te puai a si i, we can´t stop bak kha a laar tuk hoi i mah hla ka ngaih ahcun Thatha kaa thei tuk hoi i hi post caah hin cun za pah rih seh.

2013 March in July lio hrawng ah kan hmuhtonmi ka hawi le chungkhat le vialte kan ngai tuk hna e <3 .

Ka tlun lai ah ka tta a thin hung @Perth <3
Ka tlun lai ah ka tta a thin hung @Perth <3