February 29th Post: Pathian khuakhan

Tuchun, February 29, bantuk hi kum 2000 (Y2k) hnu in a voi 4nak kan ngeih a si. 2004, 2008 le 2012 ah le atu kum 2016 hna ah an si. Caan kal hi a rang chin tluahmahmi a lo. 2004 lio cu Hakha Chin Super ah taang 10 ka kai lio a si i 2008 ahcun Lillestrøm ah high school ka kai len lio a si. 2012 lio kha University kai kaa thawk ka hrawng a si i Kristiansand um kaa rak i nuamh tuk lio a si. Atu hi Aurskog deuh ah ka um i sianginn kai tu cu ka dih hlei rih lo. A ra laimi leap year (2020) ah hin khoika ka um lai i zeidah ka tuah lai ti fiang in ka chim kho lo. Rian interview cu siseh law ka sung bak lai.

Kehlei in: Sang Aa, Santhu, Bor, Thawnpi - a hlan chan cun sam a lai in nan i hei dih lai an kan ti :P (le-khuai)
2004: Kehlei in: Sang Aa, Santhu, Bor, Thawnpi – a hlan chan cun sam a lai in nan i hei dih lai an kan ti 😛 (le-khuai)

2004, taang 10 ka kai lio ah hin tuhnu kum 5 asiloah kum 10 ah Norway ah ka pem te lai tiah a ruah hrim ka ruat bal lo. Zaan khat TV ah vawleicung thawngpang an chim lio ah North Pole kong le tthal ah suimilam tlawmte lawng khua a mui mi ram a um ti phun khi an rak chim i, a zumh zong khi ka zum hna lo, theithiam ma? Zeitluk in dah kan rak zumh tawn hna ti ah cun, a hmanmi an chim ko zong ah taang 10 ngakchia hmanh nih zumh ngam ti lo khi mu. Ka hawi le hi Laitlang le Kawlram lawngte ah an um caah pem hi ka caah ka rak har ngai. Nain rak pem hlah ning lawng ka hawi le tam pi nih an ka pem tak dih tthiam lai.

2008 summer a si ko rua. Egersund ah. Smartphone a laar hlan cu hmanthlak a tlawm tuk :D Mah lio khi cu ka nungak a thiam rih lo.
2008 summer a si ko rua. Egersund ah. Smartphone a laar hlan cu hmanthlak a tlawm tuk 😀 Mah lio khi cu ka nungak a thiam rih lo.

Atu ah hin cun tthal ah khua a muih lo nak le khuasik ah ni a chuah lo nak rammi ka si cang. Hi ram hi Laitlang bantuk in ka tlaihchan cang. Laitlang/Kawlram hi hringtu kanu sisehlaw Norway hi kanu te a si hnga.

Pem le i tthial hi kaa thluak nih a rak phanhmi zong a si lo, duh awk le i tinh awk le i ruahchanh awk hmanh ah ka rak hngal lo nain van tthat ah Pathian tinhmi lawng a rak hmunh caah ram ttha, sianginn kai man ah cozah nih phaisa phalhmi ram ah ka rak phan. Sianginn kai a duhmi ka si caah Norway ka phanh hi keimah caah a zaang khun. Kawlram/Laitlang ka chuah tak caah kaa lawm tuk ka ti nak a si bak lo. Khoika um poah ah khuaruahhar in Pathin thluachuah tingco khawh a si ko. Sining khat ciocio komi ah, mi tampi deuh nih cun, mah le ram te ah um le khuasak kan duh dih cio ko lai. Holh dang, nunphun dang, ram dang ah tonmi harnak pawl hi mipem lawng nih kan hngalh. Keimah pumpak caah Norway ah Pathian nih a ka tthialpi mi hi a ttha tuk ah ka ruah dan le kaa ziak tuk dan khi ka chim duhmi a si.

High school lio - nungak thiam tak lio, 2008 a si ko rua ka ti
High school lio – nungak thiam tak lio, 2008 a si ko rua ka ti

Pathian cu ka rak hngalh ko, a ka hngalh ve ko nain, kan rak i kom lo kan ti lai ma. Mah bu in cun mah vialte hi a rak ka tuak, khan piak dih i tlam zong a tlin ter cuahmah hna. Mah nih a ka fianter mi cu atu chun zong ah hin, mah ca ka ttial cuahmah lio zong ah hin Pathian nih ka caah thil ttha a khan cuahmah ko ti hi a si. A hlan ah cun a ruah awk ka hngal tuk lo nain atu hnu hin cun Pathian nih ka caah a khanmi zei te dik, zei tik te ah dik a ka hmuhsak lai ti mi i ngaih hrim khi a nuam tuk. Hma khat te ah cun hmaibengh bantuk ah ka ruahmi harnak le khuaruahhar nak tete hmanh khi thla 2 hnu hrawng ah, azee mah ruang ah hin maw!, ti mi lawngte khi an si. Pathian nih tinhmi ngeih lo in a tuahmi a um bak lo i Pathian tinhmi cu a ttha viar fawn.

2012, Flo, Kip le Joseph he Kristiansand ah kan um tti lio- kaa nuamh tuk lio kum
2012, Flo, Kip le Joseph he Kristiansand ah kan um tti lio- kaa nuamh tuk lio kum

Ka ttih bakmi pakhat cu Pathian nih ka caah a planmi a hrawktu keimah lila ka si lai ti hi a si ko. Keimah duhmi nak hmanh in Pathian duhmi ka zumh deuh nak cu a luan ciami kum 2 ah thi deng in ka duhmi hmanh khi duh theng ti lo ka hmang i, Pathian a tthat tuk ruang ah duhthimnak an kan pek ko bu ah, keimah nih khin cun nangmah nawl ti khi i tlaih khawh ahcun a va ttha bik ko hnga.

Internet le phone line um lo sivangh

Atu hnu, smartphone hna a chuah hnu internet connection a tthat tuk hnu hin suimilam zeizat, ni zeizat dah internet bak lo in na um bal? Kan hnu zarh, cacawn nilini bak ahkhan nicheu chung hrawng kan inn internet line le phone line vial te a tlau dih. Ka sianginn ca hi sianginn online forum a simi fronter timi ah nifa tin group discussion a um i zingka 11AM hrawng luh ka timh ah ka lut kho lo. Ka hawi le facebook ah ka hal hna tikah mi tam deuh cu an lut kho ve lo. Ngakchiat lio saya/ma te zawt phun khi a si i a nuam ngai in kan thei, facebook a rawh ve hlan tiang.

Chun 2PM hrawng ah Patlung he Kiwi ah thil kan caw i phaisa kan pekah an bank terminal kha a zeitin dik a um an ti i, Asia lei bantuk khin, credit card in pek ah minthut a hau. Mah cu Kiwi lawng a rawk rua ti na lak ah, tlawmpal ah kan khua Thai dawr ah kan kal i an bank terminal cu min thut a hau hoi. Mah zong ah kan lung a fiang rih lo. Internet rawk a um tuk ti lo cu mu.

Inn kan phan i 3PM hrawng a si, ka nu a ttin tawn ah a ttin ti lo, kapa nih, na nu chawn a ka ti i ka phone ka check cu service a um lo ti bak a si. Patlung phone le kapa phone zong cu tthiam. Nikhua te a chia pah fawn i zeitin te dik ka um. Inn phone in seh tiah rian a ttuan ve lo.

12769493_10156536137505263_683012923_n
Wifi a ttha tuk ti phun in a piah chapmi khi lung a fak khun

Atu tlawmpal ah a ttha colh ding a lo ko nain suimilam pakhat hnu pakhat a liam i a ttha hlei lo. Warning pek cia lo a si tikah tuah kaa timhmi vialte nih internet connection a herh dih. A tlaumi bantuk in ka um. Kan chung in kan phone le kan internet lawng cu kan check lengmang cio ko. Sianginn ca article a cheu khat nai ah Kristiansand ah ka va printmi a um i tlawmpal ka rel lai ka ti ah dictionary loin ka rel kho lo. Ka pc ah apple dictionary a um nain ka hman lo nak a sau tuk i a chimmi khi ka lung a fiang kho lomi a lo. A nuam lo tak. Cauk a tharmi zong a ka ngei nain tlawmpal ka rel i ka lung a lut kho lo, internet lawngte ka hngak. Kan chungkhar in ti chung in chuahmi nga tete kan lo. Minung dang he zong kan i chawn kho lo. Tuchun sianginn discussion ah zei ruang ah dah kaa tel khawh lo timi thawngthanh zong khi a ngah lo. A har bak ko.

Moblie phone a ttha ttha hna hman len ko zongah internet le phone line a um lo cun zei a va si lo ning hna khi ka tuak thlu. Phone khi pum siseh law internet/phone line cu thlarau a va si hnga.

 

12788173_10156536137335263_842903006_n
This post is about the pain of being offline

Zaan khuadei a ra thai lo.

 

Rian tamtuk hi internet le telephone in pehtlaihnak cung ah tam tuk in aa hngat cang. Rian lawng hmanh si loin kan khuaruah caan le adangdang caan vialte zong hi internet ah hman le mi he i pehtlaihnak ah hman dih a si viar cang. Rawl ei pah zongah zatlan zoh, chun ni tlak facetime, viber, snapchat, facebook le youtube zoh, ca zong phone chung, ipad chuangah rel, screen le internet le kan lung hi aa hlat bal ti lo. Kei hoi hna cu rawl ka chuan pah zong ah zatlan hoi hna ka zoh, hla hna ka ngai pah, kaa kholh bu zong in hla ka ngaih caan a tam.

Internet full-time in a ngahmi smartphone he kan it, ihlai, thawhka, voi khat tthangh zong ah phone i lak zau a si cang. Zumput kal pah, lam kal pah zong ah phone i tlaih a si i a caan caan ahcun exercise tuah pah zong in phone zoh a hmang mi um a si. Kan pawng a ummi he kan i hlat thluahmah i kan i hlatmi he kan i naih deuhdeuh. Zeitin dik si.

Kan idea ttha bik a chuahnak cu tikholh nak in a si. Mah hmanh cu ti nih kan phone a khen ah cun a rawh lai caah a si i ti a khaangmi phone ser hna sehlaw ti kholh pah zong in phone a hmang ti phun khin kan um rua tiah.

Holh rap (trap) ah kan i awk maw?

Nai hrawng kan miphun ni tuah le a min an auhnak kong i kan buai ning zoh ahcun a leng mi nih maw kan thei lai kawh ti phan ding khin a um. Buai ding cu um phung a si ko. Nain buai tthing pengmi buai hi cu a mak lo tuk. Kan holh aa dan cio cu kan hngalhnak a sau tuk cang, zei holh khi dik zapi hman ding ah ti ah khiah ding ah le pakhat le pakhat aa uhnah dih ding lawng te kan si fawn. Mah le holh cio in siseh, holh phunphun cawh in siseh, kan miphun ni kan hmanmi cu zeidah a palh ti khi ka lung a fian khawh lomi a si.

Chin, Lai, Zomi kan hman dan aa lawh lo ruang ah kan i dang tiah keimah pumpak cun ka ruat hlei lo. Miphun khat kan si tiah ka ruah tthiam ko. Miphun ni kan tuah ah Kawl holh kan hman zong ah, Falam holh kan hman zong ah, Hakha holh kan hman zongah, Mirang le Norway holh kan hman zogn ah, kan cawh viar zongah a poi in ka thei lo. Holh timi cu minung pakhat le pakhat kan i communicate khawhnak hnga, kan chimmi kan i theih piak khawh nak hnga caah sermi a si tiah ka ruah. Buainak a chuah ter tu ah kan hman ahcun holh hman zia thiam lo ah kan tla lai. Tedim si ning law Tedim holh theng te ka ti i Tedim holh peng in kan chawnh i na lung a fian lo nak cha cun kan pahnih kan thiammi Mirang holh hna in kan i chawnh ah bia kan i ruah ah kan i theithiam i kan i daw deuh lai cu, lo mei?

Kanu Mate nu hni <3
Kanu Mate nu hni <3 One of our traditional wear 

Holh cu miphun pakhat nunphung caah a biapi tukmi a si caah miphun ni hna kan tuah tikah kanmah holh te kan hman khawh ahcun a ttha tuk hen ta. Nain kan hngalh cio bang, kannih miphun cu holh phun a tam pi a hmangmi kan si caah holh pakhat te kan i hrawm khawh lo tikah i soi le i thlak len nak in cun i theithiam ah a ttha deuh tuk lo maw ka ti.

A bikin, ramdang, kan miphun kan tlawmnak ah cun kan miphun ni kan hman tti tikah holh a dangdang lawngte a hmangmi kan i cawh dih. Abiana ah Oslo kiangkap a ummi kan miphun pawl ah hin Kawl holh a hmangmi, Mizo holh a holhmi, Hakha holh, Tedim, Matu holh le Falam holh a holhmi kan tling dih. Ka hngalh lomi holh hmanh a um len rih lai. Mino kan hawi le chung hmanh ah Mizo holh bak in a rak tthang i Kawl holh le Hakha holh a thei bak lomi zong kan um. Mizo lei holh a hngal kho bak lomi zong kan um hoi. Kawlram bak ah a tthangmi Kawl holh lawng a thiammi zong an um. Mah tikah holh phun kip kan cawh a hau. Kan miphun ni kan hman ttinak thawng in kan i naihnak, kan i komhnak le kan i dawtnak a fek deuh i mah cu a biapi mi a si ko tiah ka ruah.

12746069_10156528336205263_1190012763_n
More…

Miphun a hme te kan si nain holh tampi kan ngeih caah hi kan holh pawl aa dannak thawng in i hmuhthiam lonak, rem lonak, tthennak a chuah lonak hnga kan i theihthiam deuh i kan i dawt deuh a herh ko.

Ngabawm kio -Spicy fried canned mackerel

(Scroll down for English)

Ngatalauh (canned fish/mackerel) hi a phunphun in ei cio a si i, Norway ta hi changrawh (bread) he zong kan ei, buh he zong kan ei, dotla takmi meh a si. A rim te cu a mak pah hen ta. Tutan hi cu mackerel bawm ro nawn tein, thak nawn tein kiomi , a tuah a fawi fawn i a thaw taktak mi rak ttial ka duh. Karen nu ka hawi nu nih tuah dan a ka chimhmi a si. Kan herhmi cu mah vial hi a si ko.

12767363_10156513457345263_1683667410_n

12442873_10156513457905263_1963821364_n

Piat kha hme tete in kan par lai i, hmanphek cian (a thah dan a tlawm deuh) tam nawn he sum ah kan phomh lai. Cip tuk a hau lo. Piat phomh sin ah kan mackerel kha kan rial chih lai, cite tlawmte kan paih lai.

12596362_10156513458030263_655003492_n

 

Chiti tam tuk lo in ukang ah linh in kio a si cang ko. Cawh pah lengmang a hau. Minute 25 hrawng ahcun ro nawnte aa cang ko lai.

12736019_10156513458215263_913491859_n

For English readers:

Canned mackerel is a very versatile food. In Norway we eat this with crisp bread, non crisp bread, rice and just everything. This time we are going to fry the canned fish. All we need for this one are:

2                                 onions

2                                 canned mackerel

2 tablespoons          Oil

1 teaspoon                Salt

Dried chilli flakes (mild ones)

12736334_10156513457605263_1130726789_n

Peel the onions and cut them into small cubes and crush them with dried chilli flakes in mortar and pestle (or use blender). Then add the canned mackerel into the mixture. Heat the oil and fry the paste for about 25 minutes. Stir often.

12736436_10156513458540263_2016401292_n

 

Hruaimi ttha

Hruaitu ttha le hruaitu chia kong hi kan chimceih tuk nain hruaimi kong hi kan ceih tuk lem lo. Bu a phunphun a um i hruai dan zong cu a phunphun a um, ka lung i a ummi cu kanmah miphun nih kan ngeihmi phaisa pek loin ttuanmi bu (volunteer organization) i hruainak kong a si. Hruaitmi har, quality a um bak lo mi hruaimi kong tlawmpal ttial ka duh.

Duhnak langhter lo/Contact har taktak

Thil fawi te a si ttung i hruaitu rian ttuannak a har ter tukmi cu biahalmi leh lo le duhnak langhter lo hi asi. Hruaitu lei in nan duhnak chim u law ti tik ah chim top hi a har bak lomi a si nain a chim bak lomi hruaimi kan um. Tuchan cu hmaitonh in i ton a har tikah zapi biaruahnak e-forum, facebook/viber group tbk. in i hal a si. Biahalnak hmuh ko nain leh bak lo i phone chawnh chih chap, ca kuat chih a hngakmi kan um. Phone chawnh zong ah tlaih lo, sms kuat zong ah i hmuh ter lo a hmangmi kan um len rih. Rianttuantu an rian kan har ter pinah kan phaisa le caan zong kan chuh hna a si. Kanmah nih kan dirhmi bu a tthanchonak a dawntu hi kanmah tu hna kan rak si.

12746574_10156506500645263_1896581518_n
Stavanger

Nawl le lem i ziak tuk

Project pakhat kan ttuan lai tiah zapi hnatlak in khiah a si cang ko nain ttuan taktak tik i hruaitu nih hrilhhawh tikah mah rian a si ve philh in hruaitu pawl pumpak rian a bawmmi hna i lawhter zong hi a poi mi pakhat a si rih. A nawl tein nawl, a lem tein lem a duh hi a poi tuk rih lo hei ti ko u sih law, a cheu cu voi khat nawl le lem ah an duh lo. Zei kan ti lai, an i har ter tuk. Man phlah lo in ttuanmi mibu pawl ahcun hruaitu pawl zong nih ninghngal ngai in mi rianfial ti cu a um tuk lo, a nawl tein i nawlpat cio a si ko nain, an kan lem tuk i an kan nawl deuhdeuh a cung ah kan i chia deuhdeuh, kan ttum duh lo deuhdeuh. A hnu ahcun kan man a kai tuk i hohmanh nih an kan caw ngam/duh ti lo, kan man kan i tthumh tikah cun kanmah nak quality ttha deuhmi an rak tor cang. Hman awk kan tlak ti lo.

Hruaitu sinin tamtuk i ruahchan

Laimi mibu tampi i hruaitu a ttuanmi pawl hi a sokmi an um lem lo. Kanmah nih kan thimmi hna si i a caan caan ahcun hrem dingah kan thimmi hna an lo. Zei ruang ah dik si, thimmi a tam deuh zong nih hin mipi biaal ngamh/sian lo in ttuan a si. Hruaitu kan thim hna le cangka in an rianttuanmi zoh duh loin an palhnak rumro a hmumi hruaimi zong kan um. Man phalh lo ttuan ding ah kan thim hna tikah anmah zong pawcawmnak ah rianttuan a herhmi le adangdang herhnak an ngeihmi hi theihthiam piak kan i tim hna lo. A fel lo tuk ti sawhsawh kan hmang. A caan caaan ahcun a fel lo tuk van ti lai aa ngaihmi hna kan lo. Hruaitu an thin a hun sual i bia an chim ve tikah le a ninghngal, hman awk a tlak lo kan ti fawn hna. Thinhun sualnak nawl zong kan pe hna lo, minung an si ve i kanmah bantuk mitling lo an si ti kan duh bak lo. Anmah sinin tam tuk kan i ruahchan, nain kanmah nih upat le theihthiam kan duh fawn lo.

12696153_10156506500550263_800204305_n

Mah i a mak lo tak ka ti mi cu, hruaitu pawl nih an rak tuah cang i thawng zong ttha tein thanh cang komi mah fel lo ruang i hmuh lo le hngalh ruang ah, cucu khakha nan tuah lo, mah cu nan tuah ding si ti phun ruahnak cheuh phun in aa lami kan um khi a si. Mi soi kan duh ah, asiloah, ruahnak pek kan duh ahcun an kong tal cu hngalh ding a si.

Kan miphun ah hin hruaitu a domhtlaimi, thla a campiakmi, a theithiammi, tha a pemi, bawmh a duhmi an um len ve ko. Nain kan tlawm tuk rih. Miphun a hme te kan si i kanmah le kanmah kan i thluk lengmang ahcun a poi tuk ka ti. Hruaitu kan thimmi hna ah professional taktak a simi an tlawm te, lahkhah zong kan pek hna lo caah, professional service kan i ruahchan ding a si lo, an chanbaunak a um sual zong ah theihthiam ding a si ka ti. Thil ttha duh ruang ah a ttuan ttimi kan si hna caah i bawmh cio khi a nuam.

Quality a ttha deuhmi hruaimi tampi kan herh ko rua tiah.

 

 

 

Kan community hi kan zohchuk sual maw?

Kan hnu Australia in Nu Bawi le a pa Norway an kan tlawn lio ah Oslo pawngkam ummi chungkhat le hawikom cheukhat pawl he kan inn ah kan riak tti hna. Kan inn cu nih thawng le hlasak thawng le rawl rim lawngte in a khat. Coka coffee ka lak pah ah innpi in kanu thang nawn in a nihmi le kapa hehchat aa capo mi ka theih tikah ka lung a dam tuk ning.

12714254_10156484053215263_67188295_n

Norway kan phanhka ah hin kanu le kapa an i nuamh lo tuk ning hi zaangfak te an si. Mino cu hawikom kan ngei colh, holh kan thiam colh i kan thla tlak a fawi deuh ngai. Nain kanu le kapa cu an hawi le tthing he an i tthen dih pinah hika ah hin holh ruang ah an hawikom ngeih a rau deuh hen ta. Norway cu Laimi kan i tthek dih tikah upa caah cun lilen celh a si lo. Rian ttuan nih le hauh, rian ah le holh thiam set lo, hawi he biaruah har, rianttuan hawi nih bia an chim sual le an mitau an i palh sual ah heh tiah i kawih i tha chiat, nek a hmang pah tawnmi tete zong van ton pah taktak. Ralzam sinak i phuhrun pah, hawi nakin a niam deuh ah i thlak buin zakzum nawn tein um a rak si tikah Norway um an rak i nuam hrim hrim lo. Thaku (ka nau hniang) university a dih in cun kan kir ko lai, an ti peng. Holh cawnnak sianginn siloah rian in inn ttin cangka in phone i lak in vawlei cung ram kip i a ummi kan chungkhat le hawi le pawl chawnh in an i la. Khua le a sik, khuamuih le a tam, hawi le le um lo, mi nih le tlawm, internet hman thiam le a paw rih lo, fa le he le i theihthiam lo, an caah a rak har hrim ko lai. Ramdang mi mipem cheukhat zong hi mah pawl ruang ah hin a molh thaimi, a nunnak aa hlomi an um len cu mu.

12714418_10156484053080263_1720241656_n

Ram ttha ram rum ah kan um zong ah lungthin i nuamh lo ahcun bia a dih ko. Kanu hi Hakha kan um lioah a rian ah aa nuam tukmi a si, kapa hi Malay ah a um i rian har tuk in a ttuan nain rianttuan a huammi a si caah Malay ah aa nuam tuk ve. Norway ah zing fatin an thawh hnawh chanmi hi, ka lung a fian ning ah, fa le fimcawn ruah ah a si bik ko. Kanu le kapa bantuk an tam pi lai ti cu a fiang ko. Fa ka ngei rih lo i maw a si ka hngal lo, ziah cu ti reru cun kanu le kapa nih hin u-sa an kan pek hnga ka ti. Khuasak nak relrem nak le zalong tein khuaruah le ruahnak langhter khawhnak, le ram ttha ah a ummi Pathian thluachuah pawl zei rel loin ka chimmi a si bak lo. Caan tampi ahcun thilri rumnak lei nih hin lawmhnak a chuah ter bak lo.

Atu ah hin cun kanu le kapa hawi ttha tampi an ngei cang, Norway mi he Laimi he, innpa he innpa lo he. Hawi an ngeih tikah Norway hi INN a lo deuh cang. Weekend a lawngmi hmanh an ngei ti lo kan ti ko lai. Kanu le kapa ruangah kan chung dihlak in khual a duh phun lawng te kan i cang dih, ihphah le puan an i khonmi hi nan hmuh ahcun nan nih chuak lai. Kapa hi inn kong a chim fatin te khual nih an hman lai, khual an i ting lai lo, ti phun lawng te khi a si. Hawi an duh khun. Atu chan hi cu i manh lo tuk cio chan a si i caan pek in chungkhat le hawikom nih an kan tlawn tikah (Noway cu len a tlawm te, kan i hlat tuk hna) kan i khulum i kan i nuam tuk tawn.

12736104_10156484053290263_2141614149_n

Cungkhat hawikom pawl i an man a sunlawi dan hi ka lung a fiang deuh ngai in ka thei. Laimi community in kan ummi hi a hlan ah ka hna a rak hnok tuk nain atu hnu hin cun a man a ngei tuk in ka ruah. Kan van a ttha tuk. Mah te rumro i umcionak (Individualism a tthawnnak) Norway bantuk ram ah hin Laimi kanmah le kanmah kan i zohkhenhmi hi a sunglawi tuk ka ti. Mah ram cia ko ah thih lai hmanh ah lengtu a ngei lo zong an um, mah le ram cia ko ah khuadang ah university va kai ah aa thawhmi tlunnak um lo ruang ah le hotel hlan khawh lo ruangah sizung ah a va it mi hna an um. Ram cozah nih tampi an kan zohkhenh ko, i tax kan pek ve cu ti. Laimi cu siannak lungthin bak in kan i hrawmh, kan i zohkhenh ciomi a si caah, a standard a sang deuh ka ti.

12721579_10156484053370263_1841317632_n

Ka upa deuhdeuh, ka Asian deuhdeuh, ka hram ah ka kir thluahmah. University a kai ka hi Laimi um lonak ah Norway hawi le lawng te he ka um i, bachelor ka kai chung hi ram dang pawl ah kaa chawh pah ngai tikah ka hram he kaa hlat deuh ngai, global citizen ka si ka hei ti top. Nain global citizen zong nih hrihhram cu a ngei cu mu. 😉 Ka vah ka vah hnu i ka lung a fiangmi cu mah le hrihhram teah i peh bu tein global citizen si i a sullam a um khun ka ti, cu lo ah cun Pathian nih miphun khat le rong khat ah an kan ser dih hnga.

Lungfim phun in kaa la, va ngeih ka hau. Mah vial!

Super easy and super delicious cabbage salad – Kawpi toh

Hello, you awesome peeps! Long time to talk about food :D. I hope you´re having a great Friday so far. The past two weeks have been a pretty busy period for me, you know, that time when you suddenly have a lot of deadlines from every aspect of your life. Anyways, I´m not here to talk about life, but food, so here it is.

Cabbage salad is a very common Burmese dish and there are many ways to prepare it with loads of different ingredients. But this one that I am going to share is one of the most minimalist ones, and very healthy and also very delicious. For this one, you´re going to need the following:

Cabbage

Coriander

Shallot

Toasted dried chilli flakes

Salt

Oil

For quantity, please refer to the photos. I never follow the exact amount of ingredients from any recipe, so I suggest you play with that part, too.

How we do is pretty simple, rinse and shred the cabbage and coriander, and also shallot. Mix everything in a bowl and you´re practically done. You can squeeze half a lime or lemon over it if you will.

 

12650439_10156441612570263_550410780_n 12647904_10156441612310263_2055545784_n 12596108_10156441612205263_571144957_n

You can serve it as it is, or with rice, spaghetti or any meat. This one is a side-dish that goes well with pretty much everything. Have you seen my pork stew-how to video on youtube? No, you haven´t? Here´s the link.

The salad is very delicious with this pork stew.

Lai blog a tam thuahmah nak kong ah ka hmuhning

Nai hrawng hi laimi nih laica tein tuahmi blog a chuak thluahmah. A ttha tuk tiah aa lawmmi an um len bantuk in blog tuah a laar ruang ah an i cawng dih tiin a nuam lomi zong an um len. Nang zeitin an ruah ti ka hngal lo, ruah awk zong ah na rel kho lo men J Ka ruahnak atu post ah hin langhter ka duh ve.

Kan ngakchiat tein hin diary ttial hi a hopoah forhfial bal kan si ko rua ka ti, an in fial bal lo lo maw? Mah i a ruang pakhat an chim tawnmi cu, minung pakhat nunnak in fimnak tampi i chap khawh a si caah an thih tikah an dairy relnak thawngin tantakmi nih fim tampi kan i chap kho, ti hi a si. Kan nunnak hi kanmah tein kan sermi si loin, Pathian serhmi a si caah, kan chan hi a tawi te kan ti ko nain minung nunnak pawl hi thil mak tuk an si ka ti, a interesting tuk. Atu chan ahhin cun globalization ruang ah le technology a tthancho tuk cang caah thil i hrawmh/share hi a fawi chinchin cang. Mah caah cun minung pawl le an nunnak kong cawn ruah ah an thih tik i an diary rel hngah nak cun an nun lio tein an ttialmi rel, komh hna, an palhnak in fim i cawn cu a ttha deuh tuk lo maw ka ti.

Jesus le Samaria nu @Pinacoteca museum in Vatican city, Rome
Jesus le Samaria nu @Pinacoteca museum in Vatican city, Rome

Blog le dairy cu zeidah aa saaing ti ding khi a um, blog chung i kan ttialmi phun (content) zeidah a si ti nih bia tampi a chim nain a tam deuh cu ka ruahnak ah blog ca pawl hi dairy he an i naih tuk ka ti. Blog hi cu a formal tuk lomi a si caah a ttial tu nih hin lungthiang tein, hman tein, ititer lo tein ttialmi deuh hi chiah a si. Nifa tin tonmi harnak, har lo nak, pawl in a chuakmi hmuhtonmi he tampi aa pehtlaimi ttial a si caah minung nunnak kong le ziaza cawnnak ah a ttha tuk ka ti. Mah caah cun blog post a si caah zei huaha a si lo ti lo ding tampi a um. Mui i dawh le dawh lo ti cu a zohtu mit he aa saing, ti bantuk in hmuh thiam ahcun i lak ding a tam pi ko lai. Kanmah palh hau lo tein mi palhnak in fim kan cawn ahcun a miak tuk cu ti? Vawlei cung i palh ding tamtuk an palh ta hnu lawng i fim kan cawn cun zei huahua aa tuah manh lai lo.

Nunphung (culture) le nun dan (lifestyle) hi blog ah a lang bik ah an i tel ve ka ti. Mah ruang hrimhrim hin blog rel ka huam, videoblog zoh ka huam. Fa no tete a ngei kami nutung pawl nih an tonmi harnak le nuamhnak pawl an share tik zong ah zoh le rel a nuam, siangngakchia nih an nundan an kan share tik zongah, a hrintthan mi nih an nunnak ah zeitin dah Pathian rian a ttuan ti an kan share tik zongah rel le zoh a nuam tthiamtthiam. Ramdang ah a pemmi miphun pakhat, Laimi hei ti ko u sih, ramdang ah kan um tikah nunphung a cawh dih dan zong a langh caah rel le zoh a tthat bantuk in Laitlang bak ah a ummi nih an nundan an kan hmuhter tikah kan hram ah tampi an kan kir ter tthan. Mi nunphung le nundan kan cawnnak i zei bantuk minung kan si zongah kan karah i theihthiamnak le dawtnak a karh ter ka ti.

12665742_10156456939360263_2136178270_n
Nifa tin eimi rawl hmanh ah nunphung aa cawh cang (aw, behrum si 😉 )

Ramdang ah a pem nain Lai nunphung le nundan a hngal rihmi i kan phanhnak ram nunphung le nundan zong a fiangmi 1st generation asi lo ah “ 1.5 th generation´ ´ (Canada Malen nih a hmannak in ka theihmi term a si) pawl ko nih hin Lai ca in blog hi kan tuah ding a si ka ti. 1. 5 generation ti cu, kan ram teah kan chuak ko nain kan ram ah a cheu, mi ramdang ah a cheu a tthangmi khi mu. Kan chuahkehnak ram le kan phanhnak ram nunphung le nundan aa dan tikah ramdang i a chuakmi caah kan chuahkehnak he i pehtlaihnak lam hi a tlawm chin lengmang. Kanmah nih nunphung pahnih caah hlei kan donh lo ahcun a tlau ding tam dawh in kan um. A chuak tawnmi Lai cauk pawl ah ramdang ummi mino rel huammi lungfian mi konglam a ttialmi cauk an tlawm tuk. Laica le holh cawnnak ah a har chinchin lai. Blog hi a man zong a fawi i san zong a tlaimi a si.

Mah caah cun kei cu Lai ca in blog a chuah lengluang mi hi kaa lawm. Miphun le holh caah tiin ruahnak ttha tuk he a rak ttialmi blogger pawl zong, keimah bantuk a mah le amah i kawl ruahah a blog mi zong, hi tha kan pek tuk hna. A sunghnak a um lo. Nan ttialmi zong rel ka huam. Blog a tuahtu thazaang a pemi pawl zong kan uar bak hna. Blog aa tim pahmi zong blog ko uh, minawl aa cawn an ka ti lai, ti ruah ruang i thil ttha tuah duh ko mi tuah lo tluk a miak lomi a um lo.

Biaralkah piin, ka blog address aa thlen mi na hmu maw? Ca ttial hi peh kaa timh ko caah ka thilri a tam hlan ah keimah nih tam deuh control khawh ding mi website ah kaa tthial. WordPress in inn dang a chuak kan ti lai cu. Ka hmantawnmi url min hi thlen lo ka duh nain mi nih an rak i cawk diam cang i tlawmpal te aa dangmi ka lak tthan.