100th Post – Pathian nih an pekmi talents vialte ah zeizat dah na hmuh cang?

2015 May 5 ah hi ka blog hi ka thawkmi a si i, tutan ka post hi a 100nak a si. 2012 le 2013 ah blog voi 2 ka tuah nain a rauh hlan ah ka ngol tthan hna. Ca ttial cu ka huam nain zeiruang sat ah dah blog ka tuah ti ka rak hngalh lo caah a si. Zei ni dah ca ttial a ka thawk ter tthan timi hi post ah hin ttial ka duh.

Hi blog ka thawk tthannak hi Lana Del Ray a chimmi bia ruang ah a si, Will Smith nih a chimmi bia ruang ah a si, Rick Warren nih a chimmi bia ruang ah a si, Salm i David nih a ttialmi bible cacang ruang ah a si, Jesus nih a chimmi ruangah a si. Will Smith cu acting lei he hla lei he a thiam bak ti in cohlanmi a si, Ellen show ah bia an halmi pakhat ah thil thar pakhat cawn tthan a duhnak kong a chim, Pathian nih hin tam tuk an kan pek ti ka ruah i mah cu kawl rih ka duh, ti phun khi a si. Mah bia cu ka lung ah a cam i khua a ka ruah ter taktak.

Minung hi Pathian kutchuak kan si, Pathian nih a sermi ah a ttha lomi a um lo cu ti? Pathian zei tluk in dah ser a thiam le a kutzung aa dawh cu kan hngalh dih ko i, mah tluk a thiammi Pathian nih ralring tein, khuaruahhar taktak in sermi (Salm 139:14-15) kan si. Amah lo in sermi kan si, pek chapmi cu chim lo an kan ser lio hmanh ah hin thiltikhawhnak tamtuk a telh cang. Mi kaa in ka thluak a chia tuk an timi ka theih ahcun ka sia a rem lo taktak. Pathian nih thluak chiami a ser lo, kan thluak nih a lak ci te a um cio caah zeidah ka thiam phun a si ti kan hmuh rih lo bia tu a si lai tiah ka ruah.

12606757_10156433875105263_1335852177_n

Hlasakthiam Lana Del Ray nih a chimmi cu, ka nunnak a dongh tik i Pathian hmai ka dir tikah ka talent hi zeihmanh tang ti hlah sehlaw, na ka pekmi vial te ka hman dih ti khawh ka duh, ti a si. Jesus nih an kan cawnpiak mi reng a si, Matthew 25:14-30 ah mirum pa nih a sal le talents a pek tak hna nak kong kha kan theih pah dih ko. Bawipa Jesus nih talent hman lo hi uar lo ngai dawh a si. Karh ter an kan fial.

Hi pawl nih hin ka talent zeidah a si ti hngalh a ka duh ter ngai. Mah le mah i hngalh hi thil fawi lo a si. Keimah hi zeipaoh tuah a huam i thiam setmi a ngei lo phun khi ka si ve rua: rawl chuan ka ti, guitar ka ti, make-up ka ti, interior ka ti, photography ka ti, video eidit ka ti, ca ttial ka ti, thiam lak in ka tuahmi an um set lo, ka huammi a tam tak hoi. Mah caah cun Pathian ka hal, nain Pathian aw ngeih hi ka thiam lo tak hoi. Rick Warren ttialmi, the Purpose Driven Life, timi ka rel in khan Pathian nih hin ka lu chung i biahalnak ka ngeihmi hi Pastor Rick hmang in tampi a ka chimh cuahmah ti ka lung a van fiang.

Pastor Rick phung chimmi tampi chung ah voikhat cu, Pathian nih a kan serhhnawh chan le hi vawlei ah hin zei mission dah a ka chiah piak, timi kong phun khi ka ngai. Mah ah a chimmi cu Pathian nih zei bantuk thiamnak lei ahdah thluachuah a ka pek khun ti hngalh na duh ahcun zeidah na huam phun a si, zein na tuah ahdah naa lawmh, ti na kawl hmasa lai a ti. A bia ning bak in kaa hmahthah ti lo i ka ngaithiam uh. Tahchunnak ah a chimmi cu, minung nih hin lahkhah le rian sang rian niam hi kan thleidan caah kan huam phun te nakin lahkhah a sang deuhmi maw, minung upat deuhmi rian maw kan ti thim tawn, zei bantuk rian poah khi lahkhah aa khat dihmi siseh law zei rian dah naa thim lai timi in ruah i thawk, a ti.

11313134_10155576638005263_3597711763129146741_o
I love and enjoy writing and I blog because I have a theory that writing might be one of my God-given talents/tasks that He wants me to develop. 🙂

Pathian pekmi talent le mission kawl ruah ahcun ka rak tuah balmi rian pawl kong cu ka tuak tthan, online ah test phunphun le quiz phunphun kaa test hen ta hehe. Ka ngakchiat lio in atu tiang ka tuahmi a tam bik cu cattial hi a si, taang 7 in hin sianginn i ca ttial zuamnak vialte ka vai i tel, cazual, megazine, timi pawl he lawng te rian ka ttuan, eidit phunphai, caholh leh ti phunphai, report ttial ti phunphai hi a tam bik ka tuahmi a si i, kaa hne e, ti a um bal lo. Ka tuah taktak ahcun kaa nuamh ngaimi rian a si. Mah tikah, cattial cawnter le cattial lei ah tthanchoter hi Pathian nih a ka timh piakmi pakhat ah aa tel ve men lai tiah khua ka ruat.

Cattial lei ah talent ka ngei ka ti BAK LO mu, a si maw si lo ti ka test lio lawng a si rih. Ka huam phun a si pin ah ca pakhat ka ttial i ka lim tikah daihnak ka hmu i ka lung di a riam i mah hi Pathian nih a ka pekmi homework a si ko lai ti ka ruah bia a si. Ka caah Pathian tinhpiakmi ka kawlnak pakhat a si i mah cu hi blog ka ttialnak a ruang, a biapi bik a si. Minung pa zeizat nih an rel ti hi kaa buaipi lai lo ka ti nain nan rak rel i thazaang nan ka pek tikah kaa lung aa nuam tuk. Kaa lawm tuk. Keimah ca lawng ah si loin, minung tam deuh caah a si ahcun mah cu thluachuah nganpi a si ka ti.

A chim tawnmi ka pom ngai ve mi cu, zuamnak le teimaknak he aa fonh lomi talent nih cun teinak a chuahpi lo, timi hi a si. Pathian pekmi le tinhpiakmi tuan teah a hngalmi cu lawmh nan um tuk. Phaisa tampi a chuahpi lo zong ah zul chih ko, paw cawmnak le midang tlawmpal cheuh ding le khualthawnnak a tan ahcun a za ko ;).

6 thoughts on “100th Post – Pathian nih an pekmi talents vialte ah zeizat dah na hmuh cang?

  1. Na catial a voi khatnak ka rel si. Kan hngakchiat lio thankong kan pel pah lio ah biachim na rak zuam tuk mi kha a tu cu catial lei ah na hman le na thiam bak! You have found yourself.

  2. Pathian nih a ka ser hnawh chan, ka nun hnawh chan, zei ka tuah ah dah ka nun di a riam lai, ti hi ka lung thli tein bia halnak ka ngei peng nain bia tak tein ka kawl in ka hmu rih lo. Ka huammi tampi a um nain lung diriam lak in ka thiam tak tak mi a um lo. Mah hi a si rua, mah khi a si rua ti in, ka caan tha zei maw zat cu ka liam ter. Pa khat khat a dih tiang tuahnak dingah ka ngeihchia chawva le ka sining nih phak lo pakhat zong ai tel ve. Thlacam nak he ka kawl lio a si. Na ca ka relmi nih thazaang tampi a ka pek. Bawipa nih thluahchuah in pe ko seh.

    1. Thluai, na chimmi a hman tuk. Caan le chawva le sining hi tuak lo awk ttha lo bak a si. Pathian nih in chim zau hram ko seh!

Leave a Reply

Your email address will not be published. Required fields are marked *