Hillsong Worship Concert

A umnak khua ah Hillsong biakinn a ummi cu mi vanttha tuk nan si. Khrihfa a si ko mi nih cun Hillsong hi zeitluk in dah Pathian nih hla in khuaruahhar in a hman hna hi kan hngalh dih ko, zarh khat ahhin vawlei cung biakinn pawl ah an hla hi minung million 30 hrawng nih an sak peng ti a si. Kannih Norway ah cun Hillsong biakinn a um lo, kan pawng teah London le Stockholm ah a um rua ka ti. Mah caah cun Norway ah an rat hi cu kan caah a sunglawi tuk. Tutan a rami hi Australia i a ummi Hillsong worship an si. Sydney ka um lio ah an biakinn ah kaa pum bal i an i miak tuk ka ti len, theithiam ma? Kannih lei caah cun kum khat voi khat kan tonmi khi annih lei caah cun a tlawm bik zarh khat voi khat asi cu mu.

12571064_10156420556755263_707181530_n
Concert kal lai timhtuah 😀 (Ti+ hand lotion+hmur phit si+ID+Bankcard+Tissue+ Nazi-phone battery a dih sual ah) Concert ah zeidah naa ken tawn?

 

Patlung, Par Tha, Jenny le Mawite he kan i thawh, an thawk hlan in khin kan i nuam tuk cia cang, kan thazaang khi a kai bak khin a kai kan ti lai cu. Stage cung an kai i Pathian sunparnak an pek dan le Pathian hmai i an i toidor dan le an nem dan te khi uar an um tuk, a tang i a tthumi khi Pathin he kan i ton nak hnga an kan bawmh tuk ka ti lai cu mu. Tlawmpal hla kan sak ahcun anmah kan uarnak le an aw tthatnak ah kan lung a um ti lo, Pathian dawtnak le a lungsaunak le a lianngannak lawngte khi kan ruat cang. Mi cheu khat cu an dirnak in ttuang ah ttum, an khuk an i bil i thla an cam tluahmah. Pathian nih a hman thiam tuk hna ka ti.

 

12625647_10156420556575263_1451131709_n
Mei a mih lio, hi puai a khaang tu hi mi hmai an khap lo tuk le zaangfak tuk an si.

Zaan 7PM in kan thawk i 8 PM le tlawmpal ah mei bak a mit ko hih. Minung hi a tlawm bik 1000 kan si lai. Norway ah hin mei a mit tuk bal lo, cu lio te theng cun inn pawng hrawng vialte cu a mit dih ai. Anmah lak i David timi tette a khan cuahmah lio a si, mei cu a mit, minung kan tam tuk nain dai tein kan um hna, kan phone i dahmei (flashlight) cio kan van hna i microphone lo in bia a chimmi cu kan ngai hna. A bia chim dih in guitar acoustic in an tum i hla kan sa tthan hna. Kei nih cun a special tuk i ka theih, a nuam ngai ka ti. An lak i Reuben Morgan timi pa nih a chimmi cu, kan ratmi hi hlasak piak le music tumpiak nak in Jesus he nan i ton ding le Pathian kan thangtthat tti dingmi hi a biapi deuhmi a si caah mei a mih le sound system pawl rian an ttuan lomi nih an kan thlauh kho lo, ti a si i mah bia ruang ah cun hi post hi ttial ka lung a ka chuahter mi a si.

Pathian nih awaan phunphun le tummi a phunphun in nan ka thangtthat lai an kan ti ko nain, kan sakmi le kan tum lenmi pin in kan lungput an kan zohmi a ka theih ter tthan. Tukum an concert ticket hi 270 NOK (USD 30 hrawng) in an zuar, kei cu kaa vanttha tuk i laksawng ka ngah :D. Patlung, kaa lawm bak! Kumdang an rat ah cun kal hrimhrim hna u sih tiah sawm dih kan duh hna. Cun, na umnak khua ah Hillsong biakinn a um ahcun va leng te hna law tiah.

 

 

Leave a Reply

Your email address will not be published. Required fields are marked *