Nu pawl nun cawisan kan timi lengmang mi kongah … About women empowerment and gender equality

Nu le pa thleidannak a um ti lo nak hnga vawlei ning piin i zuam cuahmah a si hi mu. Thleidan ti tikah kan hngalh dih cio bang, nu a niam deuh in hmuh i pa nakin hmunhma pek deuh lo khi kan ti duh cio mi cu a si. Hi ti nu hmuhniam deuhnak hi tthanchonak a dontu tiah vawlei hruiatu hna nih an ruah caah nu le pa thleidannak a tlau nak hnga timi tinhmi hi UN tuahmi minthang Millennium Development Goals i a pathumnak ah kum 2000 lioah chiah a rak si.

ON the road
Aurskog in Summer

Laimi hi hi bantuk thleidannak kongah zei kan lawh taktak ti hi fiang in ka thei taktak lo, ka hmuhmi a tlawm tuk rih. Nu hruaitu an tlawm nain, an um lo a si lo. Nain ka hmuh tawnmi cu hruaitu pahnih, nu le pa um hna seh law, an pahnih in a dakral ngaingaimi, a ral a ttha ngaimi si hna sehlaw, nu khi cu a hngal tuk ti aa huah pah lengmang. A holh kho ngaimi nu le pa um hna sehlaw, nu khi cu, nu fafa nih a holh tam tuk, ti a si tawn. Pakhat a um rihmi cu, nu le va khi khualtlawnnak in ba tuk in inn an rak tlung tti i nu cu coka ah a lut colh i rawl ei ding a chuang colh. Pa cu aa hei din ko. A ruang cu coka rian cu nu rian a si ti tiah ruah a si caah mu. Pa khi a tthawng deuh in hmuh an si ttung i, ziah thabat ciocio ko ahcun, a tthawng deuhmi pa nih ta rawlei ding hna cu an khan i a tha a der deuhmi nu khi aa dinh, ti khi ka ruat pah tawn. A lettaling in kan um rua ti awk khin.

candle

Innchungkhar zohkhenh, innrian ttuan hi zeitluk indah a neknawi a tam i rian fawi te a si lo zia a zohkhenh balmi nih cun hngalh dih a si. A lengah rian ttuan ahcun nikhat ah suimilam 8 chung ttuan in a dang suimilam poah cun rian in off a si, innchungkhar rian ah cun off ti a um lo. A tam deuh cu pa hi a lengah ttuan a si i lahkah an ei caah annih hi abiapi ah chiah an si i innchungkhar rian hi phaisa a chuahpi lo caah, inn ah a um sawh ko, ti in auh a si i a biapi lo ah chiah a si. A poinak cu, cu ti a ruatmi hi pa lawng an si lo in nu tampi zong an si.

Mamma´s
Mamma´s

UN nih nu le pa thleidannak a zor deuh le deuh lo tahnak ah an hmanmi pathum a um; nu sianginn a kaimi zat, lahkhah phaisa a chuahpi mi rian ah a ttuanmi nu zat, cozah parliament ah nu a tthumi zat, timi pawl hi an si. Hi tahfung pawl hi an tha tuk ko nain, ka lung a tling lomi cu phaisa a chuahpi mi rian ah ttuan lawng hi nu nunnak cawisan a si ti sullam a va ngeih ter hi a si. Vawlei cungah hin phaisa a chuahpi (rih) lo nain khuaruahhar in a biapi mi rian hi a tam tuk. Cu vialte lakah hin innchungkhar zohkhenh hi aa tel. A ruang cu minung a tampi caah a biapi bikmi hi an innchungkhar a si cio lai tiah ka ruah caah a si. Kanu le kapa nih an kan ti lengmang mi cu, kan nun hnawh chan hi kan fale nan si, ti hi a si i nu le pa tampi caah zong a hman ko lai. Cu ti a si ko kun ah, ziah vawlei cung i a biapi bikmi pawl zohkhenh hi a biapi lo tuk ah kan chiah hnga ka ti.

Baneheia
Baneheia

Nu pawl cawisan (women empowerment) hi lakkhah tampi a pe mi rian pek zong cu a va si ko lai, nain a biapi tuk mi, an tuah tawnmi innchungkhar le fa le zohkhenh hi a khing rihter, man ngei tuk ah chiah piak hi kan bau tuk rih. Nu paoh poah nih hruaitu si ve, pa tuahmi ka tuah khawh ve ti va zuam len an i tim theng lai lo. Nu tampi hi buaktlak in cun innchungkhar zohkhenh thiam deuh a si caah a leng ah rianttuan in phaisa tampi chuahpi nak in innchungkhar zohkhenh aa duh duehmi zong an um ko lai. Cu bantuk thimnak an tuah ruangah siseh, thim ding an ngeih lo ruangah innchungkhar zoh an kiah tikah siseh a niam deuh in, santlai lo deuh in hmuh hi kan i tthinh ahcun vawlei cungah upatnak a tam deuh ngai lai ka ti. Cu bantuk in pa nih innchungkhar zohkhenh an i thim tik zongah zohniam lo le santlai lo deuh in hmuh hi um ti hlah sehlaw mah le rian cio te ttuan siseh law a nuam ngai lai ti?

Kan i dan ko caah thleidan ding kan si, nain zoh niam hlei ding kan si lo tiah ka ruah. Pa a sang deuh ko tiah a ruatmi tampi nih an i tleih bikmi cu Bible i cawnpiaknak cheukhat a si tawn tikah a biapi tuk in ka chiah ve ko. Nain, Jesuh vailam i a thih ah khan kha bantuk zohniam thleidannak vial te, a ho kar a si zong ah, a hrawh dih i a niam deuh tiah ruahmi vialte luatnak pek dih an si tiah ka zumh. Nu nih va le cu upat i va le nih nupi le cu dawt ning ti a si, nupi le nih va le dawt an tlolh lo bu tein va le zong nih nupi le upat hi tlolh ve lo ahcun aa dawh tukmi a va si hnga.

blahb
Vigeland Park in Oslo

Nu kan si zong, pa kan si zong ah Pathian nih talent an kan pek cio tikah nu tampi hi mihruai thiamnak talent a pekmi an tam pi ve lai. Nu an si ruang ah cu bantuk laksawng kan hman ter duh lo cu kan sung tuk lai lo maw ka ti. Zei statistic hmanh chirhchan hau lo in, nu a niam deuhin hmuhnak ram pawl hi vawlei cungah a tthangcho deuh lo mi ram deuh ah a si ko ti cu nan lung a tling cio lai tiah ka ruah ko. Ram tthangcho pipi, nu le pa thleidannak a tlawm deuh ti i ruahmi zong ah a chung taktak van luh ahcun soi ding tete cu a um peng rih ko ti cu ka pom ko. Nain, buaktlak in cun nu hmunhma a pe deuhmi ram hi an tthangcho deuh ko lo maw ka ti.

Leave a Reply

Your email address will not be published. Required fields are marked *