Ralzaam, Pathian thluachuah le manh lo tipawl kongah…

Sianginn thawkka in nihin tiang lungdai tein kaa manh rih lo, nan si pah cio ko lai. Kaa manh lo ngai ti tik ahkhin nifatin san a tlaimi lawngte ka tuah ti nak khi a si hrim lo. A nuammi te, santlai theng lomi te, tuah pah ko zong ah a herhmi tuahding tam ruang i thluak kil tein ruah ziar phun manh lo bia khi mu.

Mah tikah khin thla ka cam zongah, bible ka rel zong ah a ka hlanh lo. Phungchim zong ka ngai i, sianginn thawkka in nihin tiang ka ngeihmi phungchim ah Zacchaeus (Zakia, timi hi Lai min a lo ngai ti) kong lawngte an chim i Pathian nih hi pa nunnak in cawnpiak a ka duhmi a um ko lai, ti hrawng tiang khi cu ka tuak nain thuk deuh zong in ka tuak lo. Rawl khi siseh law, a hmawm in ka hmawn hna i ka khai hna lo, zei hmanh khi.

Kristtiansand
Baneheia @Kristtiansand and Thaku

Nizan kha Hosea 13 ka rel caan a si, tian zaan i ka relmi le a hramthok pawl hi zei a si ti hmanh in tthatthi in ka hngal ti hna lo nain, nizan ka relmi in a tanglei bia nih hin khuaruat loin a ka um ter kho lo.

Ram car, thetse ram ah khan kan zohkhenh hna. Sihmanhsehlaw ram ttha chungah khan nan vung luh tikah nan paw a khim, nan thi a hnim i nan i porhlaw i nan ka philh. 

Hosea 13:5-6
Pathian nih hi ti hin a ka ruat sual hnga maw, ti ka tuak ngai. 

Naihrawng Syria ralzaam pawl an ton cuahmahmi harnak kong kan rel cio tawnmi le hi bible ca nih hin kanmah Chin miphun ralzaam kan rak si lio, Pathian dah ti lo in bochan awk kan ngeih lo kan i hngalh bik lio caan pawl a ka ruahter tthan ngai. Atu lio i ral a zaammi nakin cun kan ram kan chuah taknak a kong hi a va fak tuk lem hnga lo. Nain, kan ram kan chuah tak i ram 2nak kan ti tawnmi, Malaysia maw Thailand maw India maw, a tanglei lam timi in kan kal cio lio kan tonmi hi a fawi lo tuk ti cu al awk a ttha lo. Chungkhar kalnak aa khat komi zong, a nu dangkhat, a fa dang khat in kan thiam lomi holh a holhmi pa nih hruai in ramtang in kan rak zaam cu, ti? Minung 5 aa tlummi mawttaw fa te ah minung pa zeizat an kan khumh ti zong a hngalmi nih nan hngalh rih ko lai. Thihloh a rak fawi ning, palik tlaih ton a rak fawi ning. Mah lio ah bawmh kan rak hal cio i a kan luatpi tu cu Pathian a rak si.

I was taking a photo of that flower and he (the bee) came voluntarily <3
I was taking a photo of that flower and he (the bee) came voluntarily <3

Tuzing ah thaithawh ei kan i tim i cereal le cawhnuk (frokostblanding) ka cawh ah ka lung dut tiah a hno. Atu lio ralzaam pawl siseh, kan khuaram i kan tonmi ruangah a harmi kong cu chim hau lo, Laitlang ka rak um lio ah hin mi tampi nih zing fatin te cawhnuk din khawh a rak si lo (a cawhnuk duh lo si loin, a um lo ruang ah le cawk khawh lo ruangah). Hriphi ka tlun lioah ka rak hmuhmi cu caw a ngei komi zong nih a hnuk kha anmah din ding ah an i sianh lo, zuar in thildang a herhmi cawk a herh caah mu.

Thil hme tete ah kan ruah mi (duh lio i a um lo lawngah lung i fianmi) thluachuah pawl hi zei huaha tuak lo, Pathian dawtnak tuak setsai lo buin ka hmang sual ngai ko lo maw ti ka ruat ngai. Thil dang tampi lak ah ni fatin tisa in kan i kholh khawhmi pakhat te lawng hmanh nih hin Pathian dawtnak a kan hngalhter lengmang ding a si tiah ka ruah.

Kristiansand
Baneheia@Kristiansand

Atu lio vawlei khoika paoh ah harnak a phunphun a tong rihmi minung hna le atu kanmah bantuk in hnangam tein, pawkhim tein a um khomi hi zeiti i kan i dan ruang ah dah hi ti hin a si ti hi kan tuak pah cio kol ai dah. Keimah pumpak in cun a ruang ka kawl kho bak lo. A fiangmi cu keimah tinhmi le tuahmi plan a si lo zia a fiang, ka phut ka tawk ruang ah a si lo a fiang, Pathian dawtnak le vel ruang ah le Pathian tinhmi a si ruang ah a si ko mi a fiang. Atu lio harnak a tongmi hi Pathian nih a tlawm deuh a dawt hna tiah ka ruat hrim lo, Pathian nih tinhmi a ngei hrimhrim i a tinhmi cu a ttha hrimhrim fawn ti ka zumh.

A fimmi, a tthawngmi, a tthami, dawtnak in a khatmi Pathian thawngin him tein le pawkhim tein kan um khawhmi a si caah hi bantuk Pathian caah caan a ngei lo phun tein ka ummi hi ka tuak i ka siarem lo tak, puanlu i khuh i ihkhun tang ah i thuh phunphai khi ka tuak. Cun, hi bantuk thluachuah a kan pekmi hi zeiti phunphai in dik mi hrawmh ve hi a kan duh piak tuk lai ti zong ka ruat ngai. Zeitiin kan hrawmh hna lai ti kan hngalh rih lo zong ah, thlacam cu kan tuah khawh cio ko. Kawlram caah, Laitlang caah, Syria caah thlacam cio hna u sih law tiah.

Leave a Reply

Your email address will not be published. Required fields are marked *