London´s Hotel Lily (3 Stars) Review -Budget Travelling

Keimah pumpak ruahnak ah hotel pakhat a za ka ti khawh nak hnga thil 3 a tlin a hau

  • A man a fak tuk lai lo nain a quality a ttha pah lai (kan lo ko!)
  • Internet a free lai
  • Kal umnak a fawinak teah a ummi a si lai.

Ka ruahnak ah dinh ruahah khualtlawn ahcun hotel ttha/man fak mi ah tlun a phu nain, khua zoh duh le vah duh ruahah tlawn ahcun hotel a tthami a hau lem lo ka ti.

11195255_10155490732635263_1981498268_n

Hotel Lily ah kan lakmi hi twin room a si i ihkhun 2 a um, zaan 3 caah minung pakhat nih 1350Kr (117 British Pound) kan liam. Nan hngalh cio bang, Europe cu hmunhma a bi, a man a fah tikah hizat pek cu a za ti awk a si ko.

Hotel kha dot 4 a ummi dot 3nak ah kan um. Elevator 2 an ngei. Internet free a si, nikhat ah minung pakhat nih device pakhat ah 1GB hman khawh a si. Kei phone pakhat le ipad pakhat ka hmang. An internet a rang taktak. Thlalangawng a nganpi a um, TV a um (channel zong a tam ngai), tikholhnak kuang (bath tube) a um i kan i nuamh ning hi. Ka uar bikmi cu tisa sonak le coffee, tea le hrai an chiahmi a si. Flo le kei hi tea le coffee kan ding tuk i free tein kan din khawh tikah phaisa tamtuk kan tlo. Cun an room rong (brown color) hi ka uar, inn a lo deuh ka ti.

IMG_7313

Breakfast hi a man ah aa tel chih i zingkhat te kan va ei manh i a thawt ning bak cu. A kan pekmi cu traditional English breakfast khi a si ko, thim ding a um lo. Pe le bacon le arti le changreu (toast) 4 cio le coffe/tea a si i a thaw tuk kan ti i toast 4 veve kan ei hehe. Kannih cu rawl nganh kan duh lo ;). Cun hotel rianttuan tu pawl hi an ttha ngai ka ti, an service a za, a ttha khunmi zong an um. Hawi nakin a ba deuhmi a lomi zong an um. Aw, cun, samchemnak (hair dryer) zong hlan khawh a si.

Khual tlawn tikah kan philh tawn bik tiah ka ruahmi cu kan kalnak ram ah zei bantuk electric hri dah an hman lai ti ruah hi a si. Norway le UK kan hmanmi electronic thilri pawl kha aa dang, kannih kua 2 pawl kan hmang, annih kua 3 pawl an hmang. Adapter cawk hlanah hotel nih hlan awk an ngei maw ti hal hmasa ah a ttha, tampi an ngei tawn. Hotel Lily cu kan hlan hna i adapter cu a kan hlan lo nain ballpen chin a kan hlanh, an hman mi electric kua i cung bik kua te khi zei huaha a tuahmi a um lo i ballpen chin in phit u law nan electric hri kha hmang ko uh a ti i kan tuah i a ok tak ko.

IMG_6974

Hotel pawng ah zaan bus stop he, vawlei tang he cung a kalmi tlanglawng stop he an um. Minute 2 kal hrawng an si lai. Coffee dawr le 24 hours onmi rawldawr le ttukttak dawr zong a pawng tete ah an um. Transport le herhbau ttukttak kawlnak he pehtlai in cun A++ bak ka pek.

A tthat lo nak lei chim ahcun, a pakhat nak ah hotel kha a hlun ngai i inn an thianhmi a thiang kho tuk lo, a zuangmi hnawm tete an um lengmang. A thianhtu fel lo deuh zong a si kho ko. Pahnihnak ah hotel room a kih le a lum kha central in an control, room chungah heater a um nain a hlan chan ta a si i rian a ttuannak hnga nikhat hrawng hngah a hau. An ti a chuah dan a hme ngai, tilum cu a um ko. Mawttaw lam kam ah a um caah hna a chet pah.

Nain, kan pekmi man he cun zeihmanh lungsi lo awk a um lem lo ka ti. Thil pakhat kong kan complain hlanah khoika dah ka um i zeizat dah ka liam ti tuak hmasaa ahcun a ho paoh caah a nuam ka ti :).

Airport kalnak lam
Airport kalnak lam

London i adang hotel pawl ah ka tlun bal lo caah tahchunh in ka zoh thiam lai lo. Nain, Hotel Lily na ka recommend maw tiah ka hal u law, Yes ka ti ko lai, family in tlunnak zong ah, Yes ka ti tthiam ko lai.

I DO NOT GET PAID FOR THIS REVIEW.

Leave a Reply

Your email address will not be published. Required fields are marked *