Vawlei Cung Thathu Bik Pawl Caah Exercise le Ngandamnak

Tuzing kha kapa a physiotherapist sin ah ka va zul. An zungkhan ah aa tarmi ca pakhat ruangah hi ca hi ttial ka lung a chuah nak a si. Na pum, na thinlung le na thluak caah thil ttha na tuah maw tuah lo timi pawl kong ah biahal nak pawl khi an ttial hna i mah lakah,` nikhat ah a tlawm bik minute 30 tal na cawlcang maw? ´´ ti mi nih khua a ka ruahter ngai. Ka huam lo ngai buin ka tuah tawnmi exercise a design tu nu nih a chim tawnmi a ka theih ter tthan, `minute 30 exercise cu nikhat caah na herh bakmi a si, na thin (heart) a dam khawh nak hnga a biapi tuk,´´ ati.

Lawlawse mit damnak ah kan khua hmanthlak (Aurskog, Spring 2015)
Lawlawse mit damnak ah kan khua hmanthlak (Aurskog, Spring 2015)

Nikum ah kapa a kengruh a kiak sual i atu tiang a doctor sin he physiotherapist sin he a kal lengmang rih nain fiangin a dam kho rih lo. Physiotherapy timi kha Lai dictionary ah ka hmu kho lo, hngalh a duhmi nih mah te cioin kawl si te seh. Minung ngai hi ka ti, Pathian a ser ciami tlawmpal te kan hrawh sual hmanh ah kan remh cawk lo, thideng in kan remh zongah amah ning a si khawh ti lo dan khi ka tuak i ka pum ka dawt tuk hau ti khi ka hei ruat pah. Sibawi le hi bantuk specialist pawl sin kal ah an man hi van a tawng fawn.

Kei hi Pathian nih a ka dawt tuk i ka doctor ka hmu bal lo. Minung sibawi hi suimilam pakhat ah zeizat dah pek an hauh ti fiang in ka chim kho lo. Nain, kan chizawh a rak sual ngai lio ah adang chizawh he aa vel lengmang i a hmat dih caah saram clinic ah kan kal tawn. Adangdang cu chim lo in saram sibawi nih a zoh men te ah khin suimilam 1 a tling lo mi ah 450Kr a kan lak. Kan piah lai lo ti le a ngah lo, saram zohkhenhtu pawl (dyrevern) nih a kan lakpiak lai ti kan phang fawn i voi tam nawn kan kalpi. Atu cu a vei lo te kan chuah i a fel taktak cang. Vah zong zuam ti lo, innhngah rian amah tein aa pe.

Lucky inn hngahdan
Lucky inn hngahdan

Ka chim duh bikmi cu minung caah siseh, chizawh caah siseh zawt man a fak tuk ti hi a si. Zawt hi a man a fah tuk, a nuam fawn lo. A zawtu lawng nih inn ah cun aa ning deuh men hnga, nain a tam deuh cu zawt ahcun pawngkam pawl zong an lung a rit i a miak bak lo. Dam man kan liam lo ti mi kha ka van i thei. Bawipa a ttha tuk.

Norway kan hawi le cu exercise tuah an fel tuk i ngandamnak caah a tuahmi nak in a paw (popular) ruangah a tuahmi an lo tiah kan i ceih tawn. A paw (popular) mi ka dawi lo hei ti pungsan khin ka rak tuah bal lo. Ka huam bak lo. Hawidang a nuam an ti ah khin keimah caah cun rian bak khi a si, ka lu hna a fak hnik, ka huam lo tuk nakah.

Mit dinhnak (Aurskog, Spring 2015)
Mit dinhnak (Aurskog, Spring 2015)

Thil pathum nih exercise kongah ka ruahnak a ka thlen. Pakhatnak ah, phungchim pawl ka ngeih nak thawngin Pathian nih dam hna seh ti a kan duhmi le Pathian nih a kan fialmi kan tuah khawh nakhnga pumsa he thlarau he kan dam a hauhmi kaa fiang. Cun, kan pum cu Jesuh nih a thi in a cawk cangmi a si caah kan zohkhenhmi cu Pathian rian kan bawmhmi a si zia ka lung a pem. Nikhat ah meng 3 kan kal ruangah Jesuh aa lawmh ahcun kan kal ko lai ta, ti ko? Kanmah miaknak a si ko mi.

Pahnihnak cu ka thluak a zor lai ti ka phan caah a si ko, mui chiat ka ngamh ko nain thluak ngeih lo cu kaa ttih tuk. Dr. Daniel Amen nih kan thau a tam deuhdeuh, kan thluak a hme deuhdeuh timi dinosaur theory kong a chimmi rak google te u law.

A pathum nak cu ngandamnak kong ka ruah deuh cang ruangah a si. Pathian nih ngandamnak a ka pekmi kaa ralrin lo ruangah tlawmpal te ka hrawh sual i eiding pakhat khat hna hrial a hauh, asiloah exercise pakhat khat hna na tuah HRIMHIRM a hau, ti ka si ahcun kei cu ka lo lai. Na tuah HRIMHRIM lai lai mi poah khi ka system nih a reject. Mah caah cun aho hmanh nih an ka ti hlanah keimah duhmi te tuah zok ning ka ti.

Mit dinhnak. Lucky hmanthlak lawngte kan post i Dora a ngeihchia sual lai. Dora cu Lucky a nu a si.
Mit dinhnak. Lucky hmanthlak lawngte kan post i Dora a ngeihchia sual lai. Dora cu Lucky a nu a si. Happy Mothers´ Dora, hihi, I hope you read my blog, Dora. 

Keimah tluk in exercise tuah a huam lomi cu an tlawm lai. Nan um sual pingpang ah ka tuah tawnmi, a har lo ngaimi a um, Leslie Sansone timi nih a tuahmi power walk program a si, meng 3 kha a za ka ti. DVD in a zuar rua, nain youtube ah free in a um ko. Innleng chuah khawh lo caan ahcun aa rem ngai. Atu cu nikhua a ttha ngai cang i a leng ah ka kal pah tawn. Innleng chuah zong ka huam lo, Leslie power walk zong ka huam lo ahcun zumba ka laam (ka lih le lih in, nuamh a biapi ka ti). Mah zong ka zuam lo cun mi an tuahmi ka zoh, rawl ei pah in, hehehe.

Kan khua cu kalnak/tliknak a ttha tuk, kan tlawng cio te uh! (Aurskog, Spring 2015)
Kan khua cu kalnak/tliknak a ttha tuk, kan tlawng cio te uh! (Aurskog, Spring 2015)

An chim tawn bang, huam peng phung a si lo, ngol lo a biapi!

Nannih tah zei nih dah an huam ter hna?

2 thoughts on “Vawlei Cung Thathu Bik Pawl Caah Exercise le Ngandamnak

  1. Sayamah Borte,
    Na vun kan hromh lengmang i ka lawm! Nan london tlawnnak Hotel Review le atu nangdamnak kong na tialmi ka hun rel. Ngandamnak caah exercise tuah a biapitnak a thar in na hun ka theihter than. Ka thin hna phangpah. Tulio ka dam pah fawn lo. Nikhat ah lengchuak lo bak in sml. 13 leng ka thu. Course work ka dih cun sianginn kal cu hau ti hlah kaw Inn ah ka erh (library pawl off campus access ka tuah dih.) Sianginn ka kai bel ahcun, zing lei min. 15 zanlei tin ah min. 15 ke in ka kal. a rak i rem ngai hehe…! atuhi, vun cawlcangh than ka hau tinak si ko hih! Ka lawm khah! Vun kan dang lengmang ko

Leave a Reply

Your email address will not be published. Required fields are marked *