Cawsa Lai Chuan/Kio Meh

Tu zingka kanu chuncaw ka rawnhmi meh chuan dan share ka duh. Mah meh tuah hi cu a thiam lo mi nan tlawm tuk lai tiah ka ruah. Nain, a caan caan ahcun kan thiammi kan philh i, zei meh hen ka chuan lai, kan ti caan a um cio cu mu. Mah bantuk caan ca tal ah tthathnem seh!

Cun Lai rawl chuan a cawngka mi kan hawi le caah aa tlak lai tiah ka ruah.

Pungsan a phunphun in tuah khawh a si i voi khat chuan i sau nawn i chiah dingah a ttha ngai. Amah lawng a ummi siangngakchia, tlangval, nungak ca zongah saupi an nguh lai caah tuah a phu ko.

Hi meh ah aa telmi

Cawsa (hi meh ah minta a ttuan ding)

Tihang (soup caah)

Sapalin

Aithing

Tuai

Cawsa Dip (Beef Powder)

Cite

Meh Kionak

Piat Hnah

Chiti

Tuah Dan

Cawsa kha sapalin, cite le cawsa dip he chum hna. Kei cu voi khat chumh ah tampi ka chumh, a ruang cu cawsa hmin cu sautuk a rau i mei zong a pam, thazaang zong a pam ka ti. A hminmi ngai mi te khi ka duh fawn cuh. Ka chumh karah ca ka ttial, silole, TV series ka zoh.

11157508_10155504287855263_5798708838836365287_o

Cawsa a hmin in anthorcar, tuai le aithing ka peih i tihang caah cun a za ko ka ti. Tihanng chuan cu ka thiam ci si lo, ka cawng cuahmah. Cun cawsa kha ka chuah i tthen 2 ah ka tthen. Amah ning tein ei ding tthen khat, thaizing meh caah phomh in kio ding tthen khat, tiah ka tthen hna.

Meh 1nak
Meh 1nak

Phomh in kio ding ah chiahmi le ei dih lomi cawsa chumh a tangmi pawl kha cip tuk lemlo in phomh i phiathnah pan nawn in riammi he kio cun a dih cang ko. Ro te in maw na duh, ro lo nawn in ti cu mah nawl cio.

11209592_10155504285470263_4853260486562630614_n

Duh ahcun cawsa phomhmi kha piat ba le khachuan raang he ro nawn te kio in saupi i chiah khawh a si. Kristiansand ka kal laiah kanu nih bawm ngan piin a ka kio piak tawn i thla 3 chung hoi hna kaa za i a miak ngai ka ti. Mah mehkio cu ka test tikah ka rak share tthan te lai, a ro nawn te i kio a haumi cu caan sau a ruah caah ka ngamh deuh rih lo.

Tutan cu ka chung le cawsa chumh an ngai pah i tam a tang lo, kanu chuncaw ca lawng a zawh. Kanu cu lairawl lawngte bak aa rawnh ko, changreu (bread) a duh lo. Meh thaw nawn tein rawl ka rawnh ahcun aa nuam tuk i ka tha tho ngai.

Borte Nu Chuncaw
Borte Nu Chuncaw

Kristiansand ah keimah tein kum 3 leng ka um hnu hin kanu le kapa nih an rak ka tuahpiakmi pawl zeitluk in dah a tam khi ka lung a fiang tuk i ka dawt chinchin hna. Thil fate ka tuah piak hna hmanh ah an i lawm tuk i ka lung lei ttha lo, an ka cawm hleihlei ah. Innpek, eicawm bak khi ka si ko. Kanu le kapa Pathian nih thluachuah tampi pe hram ko hna seh! Nanmah nan nu le nan pa zong pe ve ko hna seh!

<3

2 thoughts on “Cawsa Lai Chuan/Kio Meh

Leave a Reply

Your email address will not be published. Required fields are marked *