Man Tlawm Deuhin Khualtlawn Thiam- Budget Travelling

Keimah bantuk khualtlawn a huam tak nain phaisa tampi a ngei lomi, a si lo ah, khualtlawnnak ah phaisa tampi a hmang siang lomi tampi nan um lai tiah ka ruah. Zei ruang a va si paohah keimah pumpak nih cun tlawn lo taktak nakin cun phaisa a tlawm khawh chung hman in tlawn ka duh deuh. Khual tlawn ah semrel tukin um le ka uar fawn lo. Cu bang bia cu nan ka ti hnga maw dik J? Chim ka duhmi cu thim thiam a hau: sem zong rel tuk lo, a herh lo ah le hlolh tuk lo khi. Khual tlawmpal ka tlawnnak in ka cawnmi cu a herh lonak ah phaisa ka rak hmang tuk ti hi a si. Fiang lakin ka chim khawh rih lo a si ahcun a tanglei hi rel hmanh.

Eidin

2012 lio ah Norway ka hawi nu le 18 hrawng he Indonesia ah kan kal. Mi tam deuh kha Asian rawl he pehtlai in an paw a tthawn lo tuk caah anmah lei a ummi western restaurant pawl lawng ah kan ei peng tikah eidin ah phaisa a dih tuk. Mah bantuk kha phaisa hman herh lonak tiah ka ruahmi cu a si. Group hme deuh i kan i tthen caan ah cun ka hawi nu, keimah bantuk a cian khang ngaimi (paw lei ah ti bia), he anmah local rawldawr pawlah kan ei i a thawt deuh pinah an man cu van lei vawlei in aa dang. A biana ah, ramdang mi nih an rak onmi western restaurant ah voi khat kan ei ahcun a tlawmbik 150000 Indonesia ringit kan dih, anmah indonesia dawr i kan ei ahcun a tam bik 50000 ringit kan dih cu mu, a thaw deuh tuk fawn. Khi bantuk tete khi tuak a hau ti bia. A ruang cu mah kha ka rak kal lio ah zeidah ka rak ei ti nakin zeidah ka rak zoh/hmuh/ton i zei bantuk fimnak dah kaa chap ti hi a biapi deuh tuk cu mu. 938788_10200308674173465_1086967031_o

Ticket

Kan hngalh cia dih cang bangin zeitik ahdah ticket kan cawk timi le zei bantuk airline ah dah ka cawk ti mi nih phaisa zeizat dah kan ticket caah kan hman ti hi bia a chim ngai. Tuan tein kan cawk cia khawh ahcun airline a tthami ta man fawi tein kan cawk khawh hnga cu mu. Suimilam 2-4 chung hna cit ding si cun kei cu zei airline dah kaa cit ti biapi ah ka chia lo, thing vanlawng a si hmanh ah kaa cit kol ai, tiah ka van porh ta. Nain, suimilam 10 leng hna cit ding a si ahcun ttha tein khua tuak a hau tiah ka ruah. A chia, a ttha, aa thim ngam ding ka si rih lo tiah ka rak ti i, airline a man fawi pahmi suimilam 18 chung ka rak i cit bal i, mah nih cun ka khuaruah dan a ka thlen ngai. An tthutdenh a hmet tuk nak ahhin keimah pe 5, 48 kg hmanh kaa tet, pinah zei entertainment hmanh zong a um lo, a poi bikmi cu ticket man ah rawl aa tel lo i cawk a hau, ka hawi nu nih arsa aa cah i a hmin lo a ti. A biana ah bank card ngei hlah law, a si lo ah na bank card philh law, an lakmi phaisa (currency) ngei hlah law, nangmah lawng in na tlawn lio si law, suimilam 18 chung maw zeihmanh ei lo in nau m hnga mu? Tuak len a hau, ti bia.

Chawhlehnak

Kan tlawnnak ram i public transport (local bus, tlanglawng, tram, metro) a kalum dan cawn hi a miak tuk ka ti mi a si. Taxi kan i bochan ahcun kan dih bak ko, a bikin Europe ah. Malay ka tlawn lio taxi deuh lawngte ka hmanmi zong kaa ngaichih, a herh lo ah phaisa hman a si ka ti. Cun, taxi kan hman lo i kanmah tein kan tlawnnak khua sining kan cawn pah, kan i chawh pah, tlanglawng hna kan i cit, khoika lei hoih in dah a kal ti hna kan cawn ahcun kan phanhnak khua kong a let in kan hngal deuh cu ti. IMG_6906

Thilsenh Ning (Packing)

A donghnak ah thil senh thiam kong ka chim lai i a za lai mu, a sau pah cang hih. Kan airline nih zei tluk rit dah phorh a sian ti hi ttha tein kan hlat cia ah a ttha, a hmun kan phak hnu i a kan hlonh ter ahkhin cu sian a um lo tuk, kilo hleimi (extra kilo) man liam ti ah le a man cu khuaruahhar in a sang fawn. Cu bantuk kan ton tikah a si khawh chungin, hlonh lo le liam lo kan duh ahcun, kan kut in tampi put khawh kan i zuam ah a ttha. A biana ah cauk ti pawl hna kan liang in kan bei khawh ahcun a miak tuk cang. A biapi mi cu, airline rianttuan tu pawl nih kan thil a rih tuk ruangah a kan hlonh ter, iam ter tikah thinhun in i lak lo a hau, an rian an ttuanmi si tiah upat hna an hau. Cu bantuk caan ah kan lungthin dai tein kan chiah, kan stress lo, mithmai panh tein kan um a biapi. An rian na upat i panh tein le nuam tein na mirh ahcun extra kilo tlawmpal hna an in phorh ter khawh men si, hodah theih ;).

Airline ka uarmi pawl, hotel kong le nai London ni 3 ka tlawn ah phaisa zeizat dah ka hman ti a dang tein ka rak post te lai. Ka bia a sau tuk i tutan cu za rih seh. A dang ruahnak (advice) ttha ttha a ngeimi nih rak chim cio u law tampi fim kan i chap lai i a nuam tukl ai ka ti. Comment kan sawm hna.

A tawinak in

  1. Eidin kong ah local dawr pawl i thim hna, an man a fawi deuh pinah na tlawnnak hna ram na bawmh hna zong a si.
  2. Tuan nawn tein ticket cawk cia i zuam. Lam nai te a si ahcun a ttha tukmi i thim lem hlah. Caan saupi naa cit ding a si ahcun na cawkmi airline kong ttha tein hlat hmasa.
  3. Na tlawnnak ram public transport kong hman thiam i zuam. Taxi i bochan lo ding.
  4. Hlathlai cia le tuaktan bu tein thil senh, extra kilo pawl an man a fak tuk.

A biapi bikmi cu khual tlawn naa thawh cang vevek ahcun a nuam lo mi kong le thinhunnak vialte philh dih i zuam. Phaisa tampi dih in na kalmi si. Thil hme tete nih hna in hnawh hlah seh. A phu lo. Na tlun tikah na huam cun na tuak tthan te lai ;). IMG_0503

<3

Leave a Reply

Your email address will not be published. Required fields are marked *